Oseas 14
14
I ma Oseas k'iyal mul xutz'onoj utzil che i tinimit Israel chi chtzalij chal ru' i Ajwal
1¡Chattzalij chaloq, Israel, ru' awajwal Dios,
yet chi xattzaq rumal amak!
2Chixtzalij chal ru' i Ajwal
xaq chik'ama b'i tz'onb'eniki iwu':
Chakuyu ronojel i qamak
xaq chak'ama ru' ronojel ak'ux
i qab'ix chi kqasujuj chawe yet, Ajwal Dios.
3I tinimit Asiria ktiki ti chqato'ik,
xaq mitene koj-anmaj rij taq kaway.
Kqab'ij ti chik qa-Dios
che taq ronojel i qayijb'am yoj,
man xwi awu' yet, Ajwal,
i ak'alab' chi nti chik kiqajaw kichuch kuriq ni tob'al wachij.
I Ajwal kusujuj k'ak' k'aslemal che i tinimit Israel
4Kub'ij i Ajwal:
Keinkunaj ni rumal i kiqelanik;
lik k'ax ni keinna'o tupu kmajaw ti chke,
man i woywal nti chik chke.
5In keje na che i tinimit Israel pacha i uxaqk'aj,
ire kuya ni kotz'ij, pacha i lirio.
I ra' lik ko
pacha i jyub' Líbano;
6i u'ab' lik kekicher nu b'ik
lik chomiq pacha u'ab' i che' olivo,
i umuyal lik keje na pacha umuyal i che' chakalte' re i Líbano.
7I tinimit Israel kjeqi chik chuxe' intob'al;
are uri kek'iy na pacha i trigo,
xaq kpe ni usij pacha uche'lal uva
xaq lik o ni ki'ij pacha i uwa'al uva muqb'am re i Líbano.
8I tinimit Efraín kub'ij na: ¿Wach chik we chke i tiox chi xaril je antalik?
¡Are Yin kwilo xaq kinchajij intinimit!
Yin in keje pacha jun che' chaj chi lik arewi rax uxaq,
lik chwe Yin kuriq ni uwachinik intinimit.
K'isb'al taq tzij
9Ni'pa i o kino'oj xaq i utz kich'ob'onik
chkita ub'e i tzijoniki:
I ub'e i Ajwal lik suk'ulik,
xaq ni'pa i je suk'ul laj taq winaq keterej chrij;
xwiri i je utz ti laj taq winaq xa kkitakij ni kaqan che i b'e le.
Currently Selected:
Oseas 14: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
