Jerem%EDas 9
9
1¡Utz te'eq wetene inb'a'wach keje pacha jun ralaxb'al ya,
pacha uwa'al inwach chi lik ktururik,
re kino' chipa'ij chicha'ab'
rumal ni'pa xekam chke intinimit!
2¡Utz te'eq wetene o jun ink'ijib'al pa tz'inilik jyub' chaqij
ipa kinjeqi wi,
man keje ile naj kin-e wi che intinimit!
Man lik konojel kijikb'am ti kik'ux,
xaq lik je jutzob'aj chi kkiya kiwach ku' ajch'oj chwij.
3Lik arewi je yijil chub'ixkil i nuk'um tzij,
pacha taq uk'aqik ch'ab'.
Pa nim laj tinimit lik are krajawin i tzij chi xa nuk'um, lik are ti saq laj tzij;
ktijin mas u'enam chunimal,
xaq lik are i Ajwal kub'ij iri:
“Lik kkaj ti retamaxik inwach.”
4Rajwaxik kakub'a ti ak'ux che awamiy;
xaq mitene che jun awatz acha'
man i katz kicha' kib' kkit'or kib' chkiwach.
Xaq i je amiy kkinuk' tzij chkiwach.
5Lik kkiyo'ya kib' chkiwach,
xaq nti jun kub'ij i saq laj tzij.
Uk'amom rib' chke chi to' kkinuk' tzij,
lik xaqmanal kki'ano, ketiki ti chu'atixik kib' che i wach kki'ano.
6I Ajwal kub'ij:
¡K'iyal taq k'ax
xaq k'iyal taq t'oronik!
Intinimit kraj ti kretamaj inwach.
7Rumali yin in Ajwal chi ronojel kintiki che, kinsaqij:
¿Wach chik wa jun b'iroxik kin-an che intinimit,
xwi kinmin pa a' anb'al ch'am che?
8I utzam ka' lik are i kamsanel laj taq ch'ab',
chi xwi nuk'uj taq tzij kki'ano.
Lik utz taq uya'ik rutzil uwach i kamiy kki'ano,
xwiri saq laj tzij xa kkikoj i tzaqsab'al ke.
9¿Xatab'a kinya ti utojb'alil chke rumal ile?
¿Xatab'a kinya ti utojb'alil che jun tinimit pacha ile?
Yin in Ajwal, xinb'iw ile.
10Chixo'oq xaq chixjilaw rumal i jyub',
chixwuywat che i b'is rumal i tzam taq jyub',
man je k'atnaq chik, xaq mijun chik kik'aw chwach;
ktataj ti chik kich'awb'al i chikop chwach
xaq xe'anmaj ne i tz'ikin xaq itzel taq chikop chwach.
11Kin-an ni che i tinimit Jerusalén pacha jun t'ub'aj ab'aj,
pacha kiwarb'al i tz'i aj pa taq es;
i tinimit Judá kin-an ni che pacha jun tz'inilik jyub',
xaq lik ktali ni kan uwach.
12¿Pachin nawi jun chi lik o uno'oj chi kuta ub'e wach ktijin uk'ulmaxik? ¿Pachin che yatal wi retamaxik i b'iroxiki che rumal i Ajwal, man are ire kub'ij usuk' chke i jub'an chik? ¿B'uchak xtzaq i nim laj tinimit puyej, lik chaqij pacha jun tz'inilik jyub' chaqij chi mijun kik'aw chwach?
13I Ajwal kub'ij: “Ronojel ile xuk'ulmaj man aj Israel xko'taj kan i k'utunik chi xinya chke; xekojon ti chwe xaq xki'an taj pacha kub'ij i k'utunik. 14Lik xeterej chrij urayijb'al i utz ti laj kik'ux, xaq xkikoj ki'ij i tiox chi nti kkichakuj pacha xk'ut chke kumal kiqajaw kichuch. 15Rumali, Yin in Ajwal chi ronojel kintiki che, Dios ke aj Israel, kinb'ij: Kin-an ni chke chi kkitij i b'iroxik chi lik k'a xaq kkitu' ni ya chi o b'enen ru'. 16Keinkichersaj nu b'i chkixol i nimaq taq tinimit, chi keta'am ti kiwach, chi xaq i kiqajaw kichuch xketamaj ti kiwach.”
O'ej pa Jerusalén
17I Ajwal chi ronojel ktiki che kub'ij:
“¡Chita pe'! Chitaqa kik'amik ixoqib'
chi lik are kichak i o'ej.”
18¡Qatzij, juntir chek'unoq
xaq cheo' chqawach man keje ile xaq kki'an chqe yoj;
chi kojok che i o'ej, lik knoj qab'a'wach che uwa'al qawach,
xaq i qamuqwach kmu'i rumal qo'ej!
19Ronojel ni'pa i jilawik chi o chila pa tinimit Sion lik ktataj k'a waral:
¡Ay, b'uchak xojtzaq puyej!
¡Lik qatijom i k'ax rumal uqajsaxik qa'ij!
Wo'or rajwaxik kqo'taj kan qatinimit,
man ni'pa i qamuj qasok tzaqnaq chik puyej.
20Ixoqib', chita utzij i Ajwal,
chikojo retalil che utzij.
Chik'utu o'ej chke iwalit
xaq chik'utu i o'ej chke i kamiy keje iri:
21“I kamik xok pqamuj pqasok,
xok k'a pa nim laj rachoch i ajawinel,
keukamsaj ak'alab' pa taq b'e
xaq keukamsaj i k'ojolab' pa taq k'eb'al.
22I kich'akul i achiyab' xejab'krij kanoq
pacha achaq pa taq es,
pacha rij i trigo chi ktzaq kan chrijil i ajmolonel,
chi mijun kmolowik.”
Are i Ajwal xub'ij ile.
23I Ajwal kub'ij:
“I jun chi o uno'oj mukoj u'ij ru' uno'oj,
xaq i jun chi nim u'ij mukoj u'ij ru' u'ij,
xaq i b'eyom mukoj u'ij ru' ub'eyomal.
24Jun we kraj kukoj u'ij,
chukojo u'ij uri rumal xretamaj inwach yin, rumal xretamaj chi yin in Ajwal,
chi kin-an i anik chwach i jyub' ta'aj ru' k'axnab'al k'uxij,
u'anik i utz xaq i suk'ul laj atb'al tzij,
man are ile kumaj inwach Yin.
Yin in Ajwal, xinb'iw ile.”
25I Ajwal kub'ij: Kuriqa ni ij chi kinya utojb'alil chke konojel i tinimit, chi kki'an i circuncisión che kib': 26Chi je are aj Egipto, aj Judá, aj Edom, aj Amón xaq i aj Moab, xaq chke konojel ni'pa je jeqel pa tz'inilik jyub' chaqij, xaq kkisol b'i kiwi chwach kixikin. Man konojel ni'pa i tinimit le xaq ronojel ne i tinimit Israel, lik je ajkojol ki'ij i tiox chi xaril je antalik.
Currently Selected:
Jerem%EDas 9: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
