Jerem%EDas 10
10
Ukojik u'ij i tiox chi xaril je antalik xaq ukojik u'ij i saqil laj Dios
1Ix aj Israel, chita i tzijoniki chi kub'ij i Ajwal chiwe. 2I Ajwal kub'ij:
“Mixterej chrij wach kki'an i jub'an chik nimaq taq tinimit
xaq mixij iwib' che wach taq kiwil chwa taq kaj,
pacha kki'an i nimaq taq tinimit le.
3I kojonik ke i tinimit le lik nti uchak.
Kkik'atzij jun kutam pa k'achelaj,
te'uri jun aj-anol tak'tik k'exwach kuyijb'a ru' tz'uqub',
4chrijil chik ile kuwiq ru' saq-o'oj xaq ru' i an-o'oj,
xaq kkikoj klawux che, man keje ile ktzaq taj.
5I tiox keje ke'anawik pacha taq poy
pa taq ab'ix;
kech'aw taj,
xaq xa ke'eqaxik man keb'in taj.
Mixij iwib' chke ike le
man nti jun utz kki'ano, xaq nti jun utz taj kki'ano.”
6Ajwal, lik nti chik jun chik pacha yet,
chi nim acho'ab',
i ab'i lik nim xaq lik ronojel ktiki che.
7¿Pachin taq wa kuxij ti rib' chawe yet chi at Ajawinel ke i nimaq taq tinimit?
Yet lik kmajaw chawe chi koksax a'ij.
Chkixol konojel i o nimaq kino'oj xaq i ajawinelab' chwach i jyub' ta'aj,
lik nti jun chik pacha yet.
8Konojel ike le lik je b'uy,
nti pich' kino'oj.
¡Lik nti kuk'ut jun ch'aqap che' chke!
9I kitiox lik xa saq-o'oj chi k'amtal li pa Tarsis,
xaq i an-o'oj k'amtal li pa Ufaz,
b'iroxik chi antal kumal i aj-anol taq k'exwach tak'taq,
xaq i aj-anol chomiq taq ab'aj re wiqb'al ib', chi xaq kojtal ki'u' kaqxar xaq kaq ktzunik,
ronojel ile lik antal kumal i winaq chi keta'am u'anik.
10I Ajwal are i saqil laj Dios,
are i k'aslik Dios, are i Ajawinel ronojel ij saq.
Are kpe roywal lik kyikyat ulew rumal,
i nimaq taq tinimit ketiki ti chu'atixik i roywal.
11Yix ix aj Israel chib'ija chke i kkikoj ti u'ij i Dios: Ni'pa i dios chi xki'an ti kaj xaq jyub' ta'aj, ksach ni kiwach chwach i jyub' ta'aj, xaq lik mijun chik chke ike kkanaj kan chuxe' i kaj.
B'ix re kojb'al u'ij i Dios
12I Ajwal ru' ucho'ab' xu'an i jyub' ta'aj,
ru' uno'oj xukub'a i jyub' ta'aj;
ru' ub'iwil xuli b'i uwach i kaj.
13Ru' uch'awb'al i jab' chikaj chi kwululik,
ku'ano chi kewalij b'i i sutz' k'a chi taq uchi' jyub' ta'aj,
ku'ano chi kreplaj utzunb'al i ray chupam i jab'
xaq kresaj li tew ipa uk'olom wi.
14Konojel i winaq lik je b'uy xaq lik nti kino'oj.
I tiox kkiya kik'ix i xe'anawik,
lik nti kkichakuj man lik nti kik'aslemal.
15Ile xa je b'iroxik chi nti ki'ij, xa je ajya'ol k'ix,
i Ajwal kusachsaj ni kiwach are ku'at tzij.
16¡Lik junwi u-Dios i ma Jacob,
chi anol b'itol re ronojel ni'pa i olik!
Ire xeucha aj Israel pacha je re ire.
I ub'i ire are iri: Ajwal chi ronojel ktiki che.
Ulapanik i profeta ru' i nim laj tinimit
17—Yet, nim laj tinimit chi at o chupam i tapial nim uwach,
chamolo b'i ub'itaq awe.
18Man i Ajwal kub'ij:
“Che iri naj keink'aq wi b'i
ni'pa je jeqel chupam i nim laj tinimiti.
Kin-an ni chke chi kkitij i k'ax,
kwilb'ej re we kinkitzukuj.”
19—¡To' inwach yin, chi in tzaqnaq puyej!
¡Insoktajik lik nti rutzirik!
¡Xinch'ob' taq yin
chi kinch'ij uk'axk'ol i k'ax le!
20Ink'ijib'al lik wulijnaq,
ronojel ni'pa i laso je t'uqkrijnaq.
I wak'al in ko'tam kanoq,
¡Lik je nti chik!
Lik nti chik jun kuyijb'a chik ral taq wachoch wu'waq,
pachin chik jun kurip chub'i i k'ul puwi.
21—I je ajk'amol i tinimiti lik je b'uy,
kkitzukuj ti Ajwal.
Rumali je elnaq ti utz ru' wach kki'ano
xaq konojel i jalajuj taq kichikop to' je kichernaq b'ik.
22¡Chita pe', xk'un jun tzijonik!
Lik k'a che jun nim laj tinimit pa moxab' kpe wi jun nim laj pacha uch'awb'al ray,
chi ku'an che i nim laj tinimit Judá
pacha jun tz'inilik jyub', ipa ke jeqi wi i tz'i aj pa taq es.
23Ajwal, yin weta'am chi i winaq are ti ire rajaw uk'aslemal,
chi xaq ktiki ti chusuk'b'axik uk'aslemal re k-on panoq.
24Chojasuk'b'a chrij pacha i suk'ul laj a'atb'al tzij yet,
xwiri ru' ti awoywal man moqxa kasach taq qawach.
25Chawesaj awoywal chke i nimaq taq tinimit
chi kkaj ti kketamaj awach,
xaq pkiwi i tinimit chi kkikoj ti a'ij,
man kisachom uwach utinimit ma Jacob,
chi lik ronojel kisachom uwach
xaq lik xkiya kan puyej.
Currently Selected:
Jerem%EDas 10: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
