Jerem%EDas 5
5
Kimak aj Jerusalén
1I Ajwal kub'ij:
“Chixsutin pa taq b'e re i Jerusalén,
lik chiwila, chitzukuj pa taq k'ijib'al ipa kkimol wi kib' i winaq re i tinimit,
we kiriq jun chi lik utz i ku'ano,
chi lik kraj saqil kch'awik,
we kiriqo, kinkuy uri umak i Jerusalén.
2Je o jujun chi kkib'ij i tzij pub'i i Ajwal,
xwiri i tzij chi kkib'ij pub'i i Ajwal le lik qatzij taj.”
3Ajwal, yet are katzukuj i winaq chi lik saqil kch'awik.
Xaya utojb'alil pkiwi, xwiri k'ax taj xkina'o,
xa'an chke chi xaqmanal xkik'ulmaj, xwiri xkaj ti nawik.
Lik je b'uy, mas ko kik'ux chwach i ab'aj,
xkaj ti tzalijik che i utz laj b'e.
4Xinch'ob' taq yin:
Chi xwi i nib'a'ib' kki'an che kib' chi nti kinojb'al,
man keta'am taj wach kraj i Ajwal,
xaq keta'am taj wach utaqom u'anik i Dios.
5Xwiri juntir kin-e ku' i winaq chi nimaq ki'ij
xaq kinlapan ni ku'.
Ike lik keta'am wach kraj i Ajwal
xaq wach utaqanik i Dios.
Xwiri konojel kiyakom kib' chu'anik ch'oj chrij i Dios,
xaq xkaj ti xekojon che.
6Rumali ke'el na li koj pa taq k'achelaj xaq ke'ok chkikamsaxik i winaq,
xaq i utiw je aj pa taq tz'inilik jyub' chaqij kki'an ni mutmut chke,
i b'alam kekoy-ej ni chila rij taq kitinimit,
keki'an ni ch'aqa taq chke are ke'el loq;
man k'i kimak ki'anom,
xaq lik k'i i anik re keb' kipalaj ki'anom chke i kachi'il.
7I Ajwal kub'ij:
“¿Wach ukuyik ronojel ile kin-an chawe?
I awak'al in ko'tam kanoq
xaq kkib'ij tzij pkib'i i dios chi je dios taj.
Lik k'i i tijawik re xinya chke k'a xenoj na,
xwiri xkijikb'a ti kik'ux chwe,
lik pa taq k'iyal ke'e chi kachoch i ixoqib' chi chwach kich'akul kkich'ak wi kimer.
8Pacha mama'ib' taq kaway chi lik je tzuqtalik xaq re ke'etz'an ku' atitab',
kki'an ch'oj puwi rixoqil ulok'anij.
9¿Xatab'a kinya ti utojb'alil chke rumal wach kki'ano le?
¿Xatab'a kinya ti utojb'alil che jun tinimit chi ku'an keje ile?
10¡I je ajch'oj chkij lik che'okoq xaq chkisacha uwach ronojel i tikon chi o chila pa tikb'al uva,
xwiri lik ronojel taj kkisach uwach.
¡Chki'oqij u'ab' taq i uva,
man ile tikb'al ti chik in-uva!
11¡Aj Israel xaq i aj Judá lik ki'anom keb' kipalaj che kib' chwij!
Yin in Ajwal, xinb'iw ile.
Utzijoxik i uya'ik i tojb'alil
12Aj Israel xaq aj Judá kuwam uwach i Ajwal,
kib'im: I Dios ntaj.
Lik nti jun utz taj kqak'ulmaj,
mitene ch'oj xaq wa'jal re numik.
13-14I profeta lik xa je tew,
man i utzij i Ajwal lik nti ku' ike.
B'ay, iri are ub'im i Ajwal chwe,
chi are i Dios chi ronojel ktiki che:
Rumal xkib'ij i b'iroxik le
kkik'ulmaj iri:
Kin-an ni che intzij
chi pacha a' o pachi',
xaq i winaq je keje na pacha i si',
i a' le keujarsaj nu b'ik.”
15I Ajwal kub'ij:
“Ix aj Israel, kink'am li jun tinimit chu'anik ch'oj chiwij
chi naj kpe wi,
jun tinimit chi lik o ucho'ab' xaq lik ujer laj tinimit.
Yix iweta'am ti kich'ab'al
xaq kita ti ub'e wach kkib'ij.
16Konojel ike le je aj-anol ch'oj chi lik ko kiwach,
xaq i kich'ojb'al ke'eloq are i kamik.
17Kkitij nu b'i uwach atikon, awa,
xaq kekib'i' ne b'i ak'ojol xaq i ami'al.
Kekitij nu b'i achij, achikop,
a-uva, xaq i a-higo.
Ru' kich'ojb'al kkiwulijsaj ni
nimaq taq tinimit chi sutim rij ru' tapial chi akub'am ak'ux yet che.”
18I Ajwal kub'ij: Che taq i ij le, lik kinsach ti iwach iwonojel. 19Are ktz'onox chiwe: “¿B'uchak xu'an ronojel I Qajwal Dios ile chqe?” Keje ula'ik uwach iri chi'ana chke: Keje pacha ro'taxik kan i Ajwal xi'ano xaq xiya iwib' chu'anik ipatan chkij jub'an chik dios aj naj chila piwulew, xaq keje u'anik ipatan ile ki'an chkij i winaq je aj naj chwach jun ulew chi iwe taj.
Usaqixik i k'ax chke aj Israel
20Chiya utzijol iri, che i ajawinik re i Israel,
xaq chib'ij chke aj Judá:
21Chita iri, tinimit chi nti inojb'al, chi xaq lik kixch'ob'on taj,
chi o ib'a'wach xwiri kixtzun taj,
o ixikin xwiri kixtan taj.
22Yin in Ajwal kinb'ij iri:
¿I yix kixij ti iwib' chwe?
¿Kixsiksat ti b'ari chinwach?
Yin xinkoj uchi' i mar re atb'al re,
jun atb'al re chi kuya ti che i mar kik'aw puwi.
I retum re i ya lik krojojik kel chikaj,
xwiri ktiki ti che ik'awik puwi uchi'.
23I ik'ux yix lik chikop chik xaq lik qelqel,
man xiniwo'taj kanoq xaq xix-ek.
24Xich'ob' ti ub'e xaq xib'ij taj:
Chqaya u'ij i Qajwal Dios,
chi lik pu'ijlal kuya li jab' chqe,
pa taq alaj,
xaq pu'ijlal i molonik re uwach i qatikon.
25Xwiri imak yix ujalwachim i b'iroxik,
rumali kitij ti ni'pa i utz chi kuya'o.
26Man pintinimit je o i utz ti laj taq winaq
chi kkikoj tzaqsab'al, xwiri chapb'al ti ke i tz'ikin kki'ano,
xa tzaqsab'al ke i winaq kki'ano.
27Kkinojsaj i kachoch che i b'iroxik chi kel-am,
pacha kinojsaxik i tz'ikin chupam i k'olb'al ke.
Keje kib'eyomarik ile xaq uriqik ki'ij.
28Lik je ti'ojib' xaq lik utz utzuqik kib' kki'ano.
I kimak lik nti roqxik:
Man kki'an ti atb'al tzij chke i ak'alab' chi nti chik kiqajaw kichuch,
xaq mitene kkiya chke i nib'a'ib' wach o ke che.
29¿Xatab'a kinya ti utojb'alil chke rumal wach kki'ano le?
¿Xatab'a kinya ti utojb'alil chke i winaq chi kki'an keje ile?
Yin in Ajwal, xinb'iw ile.
30Lik b'isb'al xaq xib'in ib'
ktijin uk'ulmaxik che i tinimiti.
31Ni'pa i kkitzijoj i profeta lik saqil laj t'oronik,
i je ajsujul sipon to' keje u'anik kipatan kki'ano pacha urayijb'al kik'ux ike.
¡Xaq intinimit lik keje ile kkaj ike!
Xwiri ¿Ipa nawi keik'isa wi pa k'isb'al re?
Currently Selected:
Jerem%EDas 5: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
