Jerem%EDas 50
50
Utzaqik i Babilonia
1Tzijonik chrij i Babilonia, nim laj tinimit ke aj Caldea, tzij chi xub'ij i Ajwal che ma Jeremías chi profeta:
2“Chitzijoj iri, chiya retamaxik pa nimaq taq tinimit.
Chiyaka i k'utb'al re i tzijonik; lik miwuwaj uwach.
Chib'ij: ¡I Babilonia xchap b'ik!
¡I tiox Bel xkanaj pa k'ixb'alil,
i dios Merodac lik nojnaq che xib'rikil!
¡I kitiox chi xaril je antalik, chi lik je saqil taj,
lik xekanaj pa k'ixb'alil xaq pa nim laj xib'rikil ib'!”
3Man pa moxab' kel b'i jun nim laj tinimit chu'anik ch'oj chrij,
chi lik ku'an ni jun tz'inilik jyub' che utinimit.
Lik mijun winaq xaq mijun chikop
kek'asi chik chila,
lik konojel ke'anmaj na.
Kitzalijik aj Israel
4I Ajwal kub'ij: Che taq i ij le i winaq aj Israel xaq i aj Judá lik ke'o'ik kek'un ni chintzukuxik Yin, chi in Ajwal ki-Dios. 5Kkich'ob' ni raqan i b'e chi k-e pa Sion. Man k'a chila ke'e wi, kkib'ij: “Jo ru' i Ajwal xaq chqa'ana junam che qib' ru' che jun trat chi lik nti uk'isik ronojel ij saq, chi lik arewi ksach taj.”
6Intinimit keje te'eq pacha chij chi je sachnaq, chi utz ti kilik k-ani kumal i ajyu'ul ke, chi xaq xekisach kan pa taq es. Chi to' ke'e chwi jalajuj taq jyub', chi xaq xsach i kik'ijib'al chkik'ux. 7I ajch'oj chkij, are kekiriqo, kekitij nu b'ik xaq kkib'ij: Lik qamak ti yoj, man ike xemakun chwach i Ajwal, chi lik uya'om te kk'ijib'al pa rax laj taq jyub', chi kul te kik'ux i katit kimam che.
8¡Chixel chila Babilonia, lik chix-anmajoq chixel che kitinimit aj Caldea!
¡Chixel b'ik pacha taq ix aj-ok'al utzam chke taq i chij!
9Kin-an na chi jun tzob'aj tinimit
chi lik o kicho'ab' chi aj pa moxab'
kki'an ni ch'oj chrij i tinimit Babilonia.
Kkitus nu b'i kib' xaq lik kkich'ak na.
Lik are achiyab' chi je yij che i ch'oj,
chi are kk'aq i kich'ab' lik kemajanik.
10Kkel-aj ni ub'itaq ke aj Caldea;
lik ronojel kkel-aj nu b'i chke.
Yin in Ajwal, xinb'iw ile.
Utzaqik i tinimit Babilonia
11Yix, aj Caldea, chi xiwel-aj b'i intinimit,
¡Chixkikotoq xaq chi'ana wach kiwaj!
¡Chixsak'linoq pacha taq jun ral b'akil pa taq es!
¡Chixsik'inoq pacha taq kaway!
12Xwiri utinimit ipa xalax wi
kkanaj ni pa k'ixb'alil.
Are ni uri k'isb'al re chke konojel i nimaq taq tinimit;
chi pacha jun tz'inilik jyub' chaqij chi lik utukel.
13Man lik kmi' woywal rumali lik mijun winaq kinya ni kan chwach,
lik qatzij k-on ni pacha tz'inilik jyub' chaqij.
Konojel i keik'aw chila lik kkixij ni kib'
are kkil utojb'alil chi xinya che.
14¡Jix pik'ijib'al, ajk'aqol ch'ab', lik chisutij rij i tinimit Babilonia!
¡Chixk'aqan ru' konojel i ch'ab' chkij ike!
Man xemakun chinwach Yin, chi in Ajwal.
15¡Chixsik'in ru' i sik' re i ch'oj che ronojel taq k'ijib'al!
¡I tinimit Babilonia lik ya kujam rib'!
¡Xtzaq li nimaq taq tak'taq ja, xaq xewulij i tapial!
¡Iri lik are u'anik uk'exel: Chi'ana uk'exel che ire!
¡Chi'ana che ire pacha xu'an ire chiwe yix!
16Lik mijun winaq miya kan pa tinimit Babilonia re ktikanik xaq re kmolonik.
Are kik'aw i ch'oj re sachanel wachij,
i je aj naj ketzalij chub'i pkitinimit,
lik chkijujunal ke'anmaj nu b'ik ke'e pa kulew.
Utzalijik li tinimit Israel
17I tinimit Israel keje pacha jun ral chij sachnaq, chi kiterb'em b'i koj. Nab'e xutij b'i ma ajawinel re Asiria; te'uri i ma Nabucodonosor chi ajawinel re Babilonia, xumutma ub'aqil. 18Rumali, Yin in Ajwal, chi ronojel kintiki che, chi ki-Dios aj Israel, kinb'ij: Kinya ni utojb'alil che i ajawinel re i tinimit Babilonia xaq chke konojel utinimit, pacha xin-an che i ajawinel re i tinimit Asiria. 19Kin-an ni che i tinimit Israel chi ktzalij chali putinimit pacha jun chij chi lik o ni k'i u'es re kutijo che i jyub' Carmelo, pa Basán, chwi taq jyub' rax re ma Efraín xaq pa Galaad. 20Yin in Ajwal, kinb'ij: Che taq i ij le, i tinimit Israel xaq i tinimit Judá lik xkuytaj kimak xaq i kimak atzalal, man yin kinkuy ni kimak konojel ni'pa xek'asi kanoq.
Uch'akik i tinimit Babilonia
21¡Lik chi'ana ch'oj chkij i winaq aj Merataim
xaq chkij i winaq aj Pecod!
¡Cheiterb'ej, lik chisachsaj kiwach konojel!
¡Lik chi'ana ronojel intaqanik!
Yin in Ajwal, kinb'ij.
22Pa taq tinimit ktataj uch'awb'al i ch'oj,
re jun nim laj kamik.
23¡I Babilonia chi lik ko uwach chwach ronojel i jyub' ta'aj,
lik x-an k'ax che xaq xwulijsaxik!
¡Lik xib'in ib' kkina i jub'an chik tinimit
are kkilo wach xuk'ulmaj i Babilonia!
24Lik yet, Babilonia, xayijb'a jun atzaqsab'al,
i lik xawil taj, xattzaq chupam.
Lik xatchaptaj na xaq xatkanaj prexil,
man lik xaqel i Ajwal.
25I Ajwal xujaq i k'olb'al re uch'ojb'al,
te'uri xeresaj li uch'ojb'al re roywal,
man i Ajwal chi ronojel ktiki che
o jun anik ku'an
pa nim laj tinimit ke aj Caldea.
26¡Chixch'ojin chrij che ronojel taq k'ijib'al!
¡Chijaqa i kik'olb'al!
¡Cheit'ub'a i winaq xaq chik'isa kiwach!
¡Lik mijun kk'asi kanoq!
27¡Cheikamsaj konojel i achiyab' chi je yij che i ch'oj,
cheataqa b'i pa kamsab'al!
¡To' kiwach ike! ¡Lik ya xuriq u'ij xaq u'oril
re utojb'alil pkiwi!
28I winaq chi xe'anmaj li pa Babilonia xeupon k'a pa Sion xaq kkilapo wach x-on i Ajwal, chi qa-Dios, chi xuya utojb'alil che i tinimit Babilonia, chi lik kmajaw che rumal i xu'an che i rachoch i Ajwal.
29¡Cheisik'ij konojel ajk'aqol ch'ab',
re kki'an ch'oj chrij i tinimit Babilonia!
¡Chisutij rij i nim laj tinimit
man keje ile mijun k-anmajik!
¡Chi ya utojb'alil chke pacha kmajawik!
¡Chi'ana che ire pacha xu'an ire!
Man ire xu'an nim che rib' chinwach Yin,
chi in Ajwal, lo'laj Dios ke aj Israel.
30Rumali iwak'al chi je k'ojolab' kekam ni xol taq b'e
xaq konojel i achiyab' chi je yij che i ch'oj kekam ni che i ij le.
Yin in Ajwal, xinb'iw ile.
31I Ajwal chi ronojel ktiki che kub'ij:
“Nim laj tinimit chi ka'an nim che awib',
yin lik inya'om ti inwach awu';
lik ya xuriq i ij, xaq u'oril re kinya utojb'alil pawi.
32Nim laj tinimit chi ka'an nim che awib', katakij ni awaqan xaq kattzaq na,
xaq lik mijun katuyak na.
Kinnak' a' che konojel atinimit,
i a' le kusachsaj ni kiwach ronojel ni'pa i je o chawij chawach.”
33I Ajwal, chi ronojel ktiki che, kub'ij: I tinimit Israel xaq i tinimit Judá je o ni puyej rumal uqajsaxik ki'ij. I je ajch'oj chkij xekimin prexil xaq lik kkaj ti ko'taxik b'ik. 34Xwiri i Tol ke lik ko uwach xaq lik o ucho'ab' i ub'i are i Ajwal chi ronojel ktiki che. Ire ku'at ni tzij pkiwi; kuk'am na li chomb'al ib' pa tinimit, xwiri kuk'am na li xib'in ib' chke i winaq re tinimit Babilonia.
35I Ajwal kub'ij:
¡I ch'oj pa tinimit Babilonia xaq chke uwinaq chi je jeqel chila!
¡Chke i kaj-atzil xaq chke i o kino'oj!
36¡I ch'oj chkij i kajnanel: Lik chech'ujer na!
37¡I ch'oj chkij i achiyab' chi je yij che i ch'oj: Cheb'arb'at rumal i xib'rikil!
¡I ch'oj chkij i kikaway xaq chkij i kich'ich' re b'inb'al!
¡I ch'oj chkij i achiyab' chi je yij che i ch'oj chi je aj naj:
Chetzalijoq pacha taq je ixoqib'!
¡I ch'oj chkij i ub'itaq ke chi lik o u'ij, xaq che'el-ax ni chke!
38¡I ch'oj chkij raqana: Chechaqijoq!
Man i tinimit Babilonia lik are jun tinimit chi k'i utiox je olik chi xaril je antalik,
i rumal ile xsach uno'oj.
39Rumali chila pa Babilonia kki'an ni kiwarb'al i yak xaq i tz'i aj pa taq es, xaq chila kejeqi wi i chak'nos. Lik arewi k-e ij saq nti chik winaq kjeqi chila. 40Kkanaj na pacha i tinimit Sodoma xaq i tinimit Gomorra i jub'an chik tinimit chrij chwach, are xewulijik. Lik mijun kjeqi chik chila, lik mitene kkich'ob' taq ik'awik chila. Yin in Ajwal, xinb'iw ile.
41Lik k'a naj che i ulew pa moxab',
jun nim laj tinimit chi ronojel ktiki che, xaq lik je k'iyal taq rajawinelab'
kkiyijb'a kib' re kepe pa ch'oj.
42Lik kiwiqom li kib' ru' i k'aqb'al ch'ab' xaq ru' i che' chi ch'ich' utzam;
lik je k'an, lik nti k'axnab'al kik'ux,
i kich'ab'al lik keje pacha i rojojik re i mar,
xaq lik je annaq rij taq kaway.
Lik je yijil chu'anik i ch'oj chrij i tinimit Babilonia.
43I ajawinel re Babilonia, are xuta i tzijoniki,
lik xsikir rumal uxib'rikil,
xaq lik kuna i b'is xaq i k'ax
pacha uk'axk'ol kuna jun ixoq are kalax rak'al.
44Lik xaqte'et kink'un la pacha taq jun koj chi kel li pa taq patzalaq es chila Jordán, chi k-e chila pa taq k'ijib'al ipa arewi o i es chom rax, rumali kin-an ni chke aj Babilonia chi je o chila lik ke'anmaj na, xaq kin-an na chi krajawin i winaq chila chi kin-ul Yin. Man ¿Pachin nawi kujunamsaj rib' wu' Yin? ¿Pachin nawi kinuch'ak Yin? ¿Pachin nawi jun ajyu'ul chij kutak'b'a rib' chinwach Yin? 45Chita i anik chi Yin in Ajwal, inyijb'am li chkij aj Babilonia; i anik chi inyijb'am li chkij i tinimit Caldea: I ral taq kichij chi mas je ch'utiq kek'am nu b'ik, xaq i kik'ijib'al lik ksach na. 46Utzaqik i tinimit Babilonia lik ktataj na, man ulew lik ksiksat na, usik'inik lik ktataj ni k'a pa taq jub'an chik nimaq taq tinimit.
Currently Selected:
Jerem%EDas 50: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
