Jerem%EDas 51
51
Usachik uwach i tinimit Babilonia
1I Ajwal kub'ij:
Kintaq nu b'i jun nim laj tew re kuk'is kiwach
aj Babilonia xaq aj Caldea.
2Kin-an ni chke chi je ajch'oj chkij kki'an ni che i Babilonia
pacha trigo chi kk'aq b'i pa tew;
kin-an ni che chi mijun winaq kkanaj kan prulew.
Are keuriqa i ij re i kamik,
lik k'ulala kek'un ni ajch'oj chrij.
3¡Lik chkiyijb'a i kich'ab' i ajk'aqanel!
¡Chkikojo i tob'al kib'!
¡Lik miwil tob'al kiwach i k'ojolab' winaq re Babilonia;
lik chisachsaj kiwach konojel achiyab' chi je yij che i ch'oj!
4Che ronojel i tinimit ke aj Caldea
i winaq kejab'i ni kan xol taq b'e,
5tupu i tinimit Israel xaq i tinimit Judá je makunnaq chinwach Yin
xaq lik kinojsam i kitinimit che i mak atzalal,
Yin in Ajwal, chi ronojel kintiki che,
chi in lo'laj Dios ke aj Israel,
lik je wo'tam ti kanoq.
6¡Chix-anmaj pa Babilonia!
¡Pachin ktiki che chuto rib'!
¡Mixkam taq rumal umak ire le!
Iri lik are u'oril i woywal re u'anik uk'exel che,
lik kinya ni utojb'alil pacha kmajaw che.
7I tinimit Babilonia are te'eq jun tu'b'al an-o'oj pin-ab' Yin
chi lik ke'u'ab'arsaj konojel winaq chwach i jyub' ta'aj.
I nimaq taq tinimit kkitu' te'eq uwa'al uva muqb'am le
xaq lik ksach kinojb'al.
8Xwiri i tinimit Babilonia lik juntir xtub'krijik.
¡Lik chixo' rumal ire!
Chik'ama li kunb'al re kukunaj i sokonik,
ilb'al re we kkuntajik.
9Ya xqakoj kunb'al che i tinimit Babilonia,
xwiri lik xkuntaj taj.
¡Chiya kanoq! Jo'; chojel b'i chi,
chqajujunal jo pqatinimit,
man i kamik chi x-anik kupon k'a chikaj,
kwalijik kupon k'a pa taq sutz'.
10I Ajwal xuya u'ij ronojel i o qe che.
Chixpetoq, jo chulapik pa Sion
wach u'anom i Ajwal chqe, chi qa-Dios.
11I Ajwal kraj kusach uwach i tinimit Babilonia,
xaq xuk'unsaj saq chkiwach i aj ajawinelab' re Media
anb'al re jun ch'ob'onik chke konojel.
Lik are u'anik uk'exel i le xu'an i Ajwal chke rumal
xki'an che i rachoch.
¡Chiyijb'a i ch'ab'! ¡Cheikojo i tob'al ib'!
12¡Chiya ilb'al re i ch'oj chrij i tapial re i tinimit Babilonia!
¡Cheikojo mas ajchajinelab'!
¡Cheikojo chik mas ajchajinelab' chi je yij che i ch'oj!
¡Lik chisutij kij!
Man i Ajwal lik xuyijb'a xaq lik xu'an i anik
chi uch'ob'om xaq utzijom
chkij konojel i winaq re i tinimit Babilonia.
13Yet, tinimit Babilonia, chi at o naqaj chke i nimaq taq raqana
chi xaq lik k'i ab'eyomal olik,
¡Lik ya xupon i ij re kk'is ak'aslemal,
re usachik awach!
14I Ajwal chi ronojel ktiki che lik usaqim puk'aslemal:
“¡Chi lik kinya ni k'iyal taq ajch'oj chawij, pacha ral taq sak',
ike le lik kkib'ixaj ni i ch'akanik chawij yet!”
B'ix re kojb'al u'ij i Dios
15I Ajwal, ru' ucho'ab', xu'an ulew;
ru' uno'oj xukub'a i jyub' ta'aj;
ru' ub'iwil xurip i kaj.
16Ru' uch'awb'al i jab' ku'an che i ya chi krujuj pa taq sutz' chila chikaj,
ku'ano chi kewalij b'i sutz' k'a pa taq uchi' i jyub' ta'aj,
xaq lik ku'ano chi kreplaj utzunb'al i ray chupam i jab'
xaq kresaj li tew ipa uk'olom wi.
17Lik konojel i winaq je b'uy xaq lik nti kino'oj.
I tiox chi xaril je antalik kkiya kk'ix i je aj-anol ke,
man lik je t'oronel laj taq k'exwach chi xaq lik nti kik'aslemal;
18ile xa je b'iroxik chi nti ki'ij, xa ktze'ex kipalaj,
man i Ajwal, kusachsaj ni kiwach are ku'at tzij.
19¡Lik junwi i Dios re ma Jacob,
chi xu'an ronojel ni'pa olik!
Ire xucha i tinimit Israel xaq x-on re che.
Ub'i: Are i Ajwal chi ronojel ktiki che.
Babilonia, chapb'al re i Ajwal re yab'al utojb'alil
20¡Tinimit Babilonia, yet lik at keje pacha jun inch'ayb'al nim,
xaq at inch'ojb'al re i ch'oj!
At inchapb'al na re kinwulijsaj i nimaq taq tinimit
xaq re kinsachsaj ni kiwach i nimaq taq ajawinik.
21Katinchapb'ej na re keinmutma i kaway, xaq i winaq chi je ajrij taq kaway,
ch'ich' re b'inb'al xaq i je aj-ok'anel ch'ich' le.
22Katinchapb'ej re keinmutma i achiyab', ixoqib',
rijab', k'ojolab',
alab'om xaq altom.
23Katinchapb'ej re keinmutma ajyu'ul chij xaq konojel i chij,
aj-anol uwach ulew xaq i b'oyexab',
aj-ok'al utzam i jalajuj taq tinimit xaq i nimaq kipatan.
Tojb'alil puwi i Babilonia
24Xwiri lik chiwach yix
kinya ni utojb'alil chke aj Babilonia xaq chke konojel aj Caldea
pacha kmajaw chke, rumal i utz taj chi xki'an che i Sion.
Yin in Ajwal, kinb'ij.
25Yin inya'om ti inwach awu', utzam jyub' sachanel,
chi kasachsaj uwach ronojel i jyub' ta'aj.
Yin in Ajwal, kinb'ij.
Kinyak ni in-ab' re uya'ik utojb'alil chawe,
katinb'alk'atij na li pa taq siwan ab'aj,
lik kin-an ni chawe pacha jun jyub' k'atnaq uwach.
26Lik mijun chke i ab'aj re atinimit chi wulijnaq
utz re kyak taq ja tak'taq.
Lik at keje na pacha jun tz'inilik jyub' chaqij ronojel ij saq.
Yin in Ajwal, xinb'iw ile.
27¡Chiya jun k'utb'al pa tinimit re i ch'oj!
¡Chixut'ij i trompeta xaq cheiyijb'a i nimaq taq tinimit
re kki'an ch'oj chrij i tinimit Babilonia!
¡Chiyaka i ajawinik re i Ararat chrij ire,
re Mini xaq re i Askenaz!
¡Chitzukuj jun aj-ok'al utzam i ch'oj!
¡Chkich'ija i b'e i kaway chi je ajch'oj pacha i sak' chi petnaq koywal!
28Cheiyijb'a i nimaq taq tinimit re kki'an ch'oj chrij;
cheiyijb'a i ajawinelab' aj pa Media,
xaq i aj-ok'al utzam i jalajuj taq tinimit xaq i nimaq kipatan,
xaq ronojel i jyub' ta'aj chi kki'at tzij ike puwi.
29I ulew lik kyikyatik xaq lik ksiksatik,
man i Ajwal lik ktijin chu'anik wach xuch'ob' u'anik
che i Babilonia chi ku'an na pacha jun tz'inilik jyub' chaqij chi lik tzel ktzunik.
30I achiyab' chi je yij che i ch'oj aj Babilonia, lik xkimayij u'anik ch'oj;
Man nti chik kikowil xaq lik xk'is kicho'ab',
lik je pacha taq chik ixoqib'.
I nimaq taq kitinimit lik xmaj kan chke
i kachoch xnak' a' chke.
31Lik kiterb'em kib' i ajb'il tzijonik tzij
chub'ixkil che i ajawinel re Babilonia,
chi utinimit lik ronojel xch'akik.
32I ajch'oj chrij xk'iji che ik'awb'al chke i raqana,
xunak' a' chke i k'ijib'al re tob'al ib',
i achiyab' chi je yij che i ch'oj lik xkixij kib'.
33Man i Ajwal chi ronojel ktiki che,
chi ki-Dios aj Israel, kub'ij:
“¡I tinimit Babilonia lik keje pacha i k'ijib'al ipa kya'yax wi trigo pu'ijlal,
man ya kuriq i ij re i molonik!”
34-35Kub'ij i Jerusalén, tinimit Sion:
I ma Nabucodonosor, chi ajawinel re i tinimit Babilonia,
xu'an ch'aqa taq chwe xaq xinutijo, xu'an kan chwe pacha jun laq chi nti chik upam.
Xinub'i' b'ik pacha jun nim laj itzel chikop aj pa mar;
lik xunojsaj upam che i chom laj tijawik re chwe. Ronojel i xk'is taj xuk'aq b'ik.
¡Wo'or chtzaq ni puwi i tinimit Babilonia uqajik in-ij xaq ronojel i k'ax chi xu'an chwe le!
¡Xaq lik chtzaq ni pkiwi i winaq aj Caldea kumal i winaq chi xinkikamsaj!
Sujunik che i tinimit Israel
36I Ajwal kub'ij:
“Yin kin-an ni atb'al tzij chawe,
kin-an ni uk'exel chke i ajch'oj chawij.
Lik keinchaqijsaj i raqana
xaq i ralaxb'al taq ya re i tinimit Babilonia,
37lik kkanaj na pacha jun k'ijib'al wulijnaq,
chi lik kik'ijib'al chik tz'i aj pa taq es,
lik are jun k'ijib'al chi lik mijun winaq kjeqi chik chwach,
konojel kkixij ni kib' che ru' jun nim laj xib'rikil.
38Konojel ike le lik keyerer na pacha koj
xaq keraqaw na pacha ral taq koj ch'utiq.
39Are lik kejuluw rumal uk'axk'ol i ij, Yin kinya ni chke chi kkitu'
kiya' chi keu'ab'arsaj
xaq lik kusachsaj kijolom.
Keje ile ketzaq ni che jun nim laj waram
chi lik kk'un ti chik saq chkiwach.
Yin in Ajwal, xinb'iw ile.
40Te'uri keink'am b'i pa kamsab'al,
pacha kik'amik b'i ral taq chij, me', xaq i ti'ojib' taq chij.”
Utzaqik i tinimit Babilonia
41¡Babilonia, tinimit chi lik nim u'ij chwach ronojel i jyub' ta'aj,
lik xtzaqik, lik xch'akik!
¡Lik kkixij kib' i nimaq taq tinimit are kkilo!
42I mar lik xumuq b'i tinimit Babilonia,
lik xuch'uq ru' nimaq taq ub'olol.
43I utinimit lik xeu'an pacha jun ch'am ti laj tz'inilik jyub' chaqij,
lik chaqij ulew chi xaq lik utukel,
lik mijun winaq jeqel chila,
xaq lik mijun kik'aw chila.
44Kinya ni utojb'alil che i dios Bel pa Babilonia,
kin-an ni che chi kuxab'uj na li utijom b'ik,
xaq lik mijun chke i nimaq taq tinimit ktzalij chal chutzukuxik.
¡Ya xetzaq i tapial re Babilonia!
45Intinimit, chat-el chila.
¡Lik chkijujunal chkito kik'aslemal
chwach i nim laj woywal!
46Lik mixok il, xaq mixij iwib'
che i utz ti laj taq tzij chi klap pa tinimit.
Junab' junab' jalajuj i utz ti laj taq tzij klapik,
tzij re ch'oj pa tinimit
xaq i ch'oj chkixol aj-ok'al utzam i jalajuj taq tinimit.
47Lik keje uri ile, kuriq ni ij
chi kinya utojb'alil chke i tiox chi xaril je antal pa tinimit Babilonia,
ronojel i tinimit kqajsax ni u'ij
xaq knoj ni uwach che kich'akul i kamnaq.
48I kaj xaq i ulew xaq ronojel ni'pa i o chwach
kekikot na are ktzaq i tinimit Babilonia,
are kek'un i ajsachsanel ke pa moxab'.
Yin in Ajwal, xinb'iw ile.
49Lik qatzij, i tinimit Babilonia ktzaq na
rumal i kamsanik chi xu'an che i tinimit Israel,
xaq rumal i kamik chi xu'an chwach ronojel i jyub' ta'aj.
Tzijonik chke aj Judío chi je o pa tinimit Babilonia
50Yix, chi xixtotaj chwach i kamik,
chix-anmajoq, lik mixtak'i che i anem,
tupu are k'a naj chik ix o wi, chich'ob'o i Ajwal
xaq chk'un chik'ux i tinimit Jerusalén.
51Yix kib'ij: “Kqana i k'ixb'alil
are kqata wach i utz ti laj taq tzij chi kkib'ij chqij.
I uqajsaxik qa'ij k-aljin che i qapalaj,
man i winaq aj naj je oknaq
chupam i k'ijib'al chi lik ch'am prachoch i Dios.”
52Xwiri i Ajwal kub'ij:
“Lik kuriq ni ij
chi kinya utojb'alil chke i tiox chi xaril je antal chila pa tinimit Babilonia,
xaq lik che ronojel i rulew kejilaw ni je soktajnaq.
53Tupu i tinimit Babilonia kel b'i k'a chikaj
re kukoj u'ij xaq kukub'a li ucho'ab' chila,
lik nti k-ono man k'a chila na kintaq nu b'i i ajch'oj chrij re kusachsaj uwach.
Yin in Ajwal, xinb'iw ile.”
Uwulijsaxik i tinimit Babilonia
54K'a pa tinimit Babilonia ktataj i sik' re uk'axk'ol,
lik k'a pa tinimit ke aj Caldea kupon utayik jun nim laj luk'latik.
55Are i Ajwal, chusachsaj uwach i tinimit Babilonia
xaq chu'atij i ch'oqowik.
I je ajch'oj, pacha i ya chi lik krojoj uwi,
ketzaq ni puwi ire pacha uch'awb'al jun nim laj ya.
56Xek'un chusachsaxik uwach i tinimit Babilonia;
xaq chkichapik i achiyab' chi je yij che i ch'oj
xaq lik xki'an ch'aqa taq che i k'aqb'al kich'ab'.
Man i Ajwal lik are jun Dios
chi lik chkijujunal kuya utojb'alil chke pacha kmajawik.
57I Ajawinel, chi are i Ajwal, chi ronojel ktiki che, kub'ij:
“Kein-ab'arsaj ni je aj-atzil re i tinimit Babilonia,
chke o kino'oj xaq chke aj-ok'al utzam i jalajuj taq tinimit,
xaq i nimaq kipatan xaq i achiyab' chi je yij che i ch'oj,
lik ketzaq ni che jun nim laj waram ronojel ij saq
chi lik kk'un ti chik saq chkiwach.
58Yin in Ajwal, chi Ronojel Kintiki Che, kinb'ij:
I tapial chi nimaq uwach re i tinimit Babilonia,
lik kewulijsax ni konojel, xaq i nimaq taq uchija kjuluw ni pa a'.
Lik nti rajwaxik i kichak i nimaq taq tinimit chi xki'ano,
man i kichak lik kk'at ni pa a'.”
Uk'amik b'i tzijonik re ma Jeremías pa tinimit Babilonia
59Che ukaj junab' re rajawinik ma Sedequías, ajawinel re Judá, i profeta ma Jeremías xuya jun tzijonik che ma Seraías, chi uk'ojol ma Nerías xaq ri umam ma Maasías. Ma Seraías rachi'ilam b'i ajawinel ma Sedequías che u'enam pa tinimit Babilonia, chi o chuqul kuyijb'a ipa kwar wi i ajawinel. 60I ma Jeremías utz'ib'am te'eq jun tzijonik chupam jun wuj chrij ronojel i k'ax chi kpe puwi i tinimit Babilonia, chi are ronojel ni'pa tzib'tal chrij i tinimit. 61Xaq xub'ij che ma Seraías: “Are katupon pa tinimit Babilonia, lik chariqa u'anik are kawajlaj ronojel i tzijoniki. 62Te'uri kab'ij na: Ajwal, Yet lik ab'im chi kasachsaj uwach i k'ijib'ali, man keje ile lik mijun kjeqi chik chi, mitene i winaq xaq mitene i chikop, man lik ka'an ni jun tz'inilik jyub' chaqij che ronojel ij saq. 63Xaq are kamayij rajlaxik uwach i wuji, chaxima jun ab'aj che te'uri chak'aqa b'i pa raqana Éufrates, 64te'uri chab'ij: Keje umuqtajik b'i tinimit Babilonia ile, xaq lik kyaktaj ti chik che i k'ax chi Ajwal kutaq li puwi.”
Chi kk'is wi utzijonik ma Jeremías.
Currently Selected:
Jerem%EDas 51: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
