Jerem%EDas 49
49
Tzijonik re i Dios chkij aj Amón
1Utzijonik i Ajwal chkij aj Amón:
¿Ipa je o wi i rak'al ma Israel?
¿Ipa je o wi i je rajaw kan ub'itaq re?
¿B'uchak chi i dios Milcom wo'or lik are ire rajaw i Gad?
¿B'uchak chi aj Amón je jeqel pa nimaq taq kitinimit ike?
2Rumali, Yin in Ajwal, kinb'ij:
Kuriqa ni ij
chi kin-an che i tinimit Amón aj Rabá
chi kuta i sik' re i ch'oj;
lik k-on ni pacha jun tinimit wulijnaq,
xaq kiwinaq chi je jeqel chwach, kejuluw ni pa a'.
Are uri tinimit Israel kuyak chik utinimit.
Yin in Ajwal, xinb'iw ile.
3¡Chato'oq Hesbón, man i tinimit Hai wulijsam!
¡K'ax chuna ik'ux yix ixoqib' aj Rabá!
¡Chikojo i'u' re o'ej rumal i kamik, chich'aya uwach taq ik'ux!
¡Chi'ana i anem pacha taq ix ch'uj, chisoko ich'akul!
Man i dios Milcom kelsax nu b'i pa cho'ab' chwach rulew,
junam ku' i rajsujul sipon xaq i winaq chi lik nim ki'ij.
4¿B'uchak kakoj a'ij ru' acho'ab'?
¿Kawil ti b'ari chi lik ktijin chik uk'isik acho'ab'?
B'uy laj tinimit, chi lik akub'am ak'ux che ab'eyomal chi amolom uchi', xaq kab'ij:
¿Pachin taq wa ku'an ch'oj chwij?
5B'ay, xwiri pa taq ronojel k'ijib'al ipa
katk'iji wi kintaq b'i xib'rikil pawi.
Yin in Ajwal, chi Ronojel Kintiki che, kinb'ij:
Yix lik chijujunal kixel nu b'i pa'anem,
xaq lik mijun kumol chik ichi'.
6Xwiri k-on panoq kinjalwachij chik i kik'aslemal i je aj Amón.
Yin in Ajwal, xinb'iw ile.
Tzijonik re i Dios chrij i tinimit Edom
7Utzijonik i Ajwal chi ronojel ktiki che chkij aj Edom:
Lik nti chik no'oj pa Temán.
Lik nti chik kkiriq u'anik i je b'iw.
Lik xsach uwach i kinojb'al.
8¡Winaq aj pa Dedán, chixel b'i pa'anem,
jix chiwuwaj iwib'!
Man kinsachsaj uwach i tinimit re Esaú;
lik ya xuriq i ij re kinya utojb'alil che.
9Are kuriq i ij re umolik i uva,
kkiya kan jujun taq ch'uyaj;
are keupon ili'omab' cha'ab',
xwi i rajwaxik chke kkik'am b'ik.
10Xwiri yin lik nti o xinya kan che i utinimit ma Esaú,
xwetamaj pa kkuwaj wi kib'
rumali kkiriq ti chik jun k'ijib'al ipa kkuwaj wi kib'.
I kak'al, kachlal xaq i kib'esin,
konojel xk'is kiwach;
Mijun xkanaj kanoq we kub'ij taq:
11“Cheaya i ak'alab' chi nti chik kiqajaw kichuch chwe yin, man yin lik kewil ni chawe.
Xaq cheaya ixoqib' malkanib' chwe, man yin lik keinto na.”
12I Ajwal kub'ij: “I jub'an chi kmajaw ti te'eq chke xkitu' ke che i tu'b'al re i tojb'alil, xwiri lik xkitu'u, kmajaw ti uri we katu' ti utojb'alil yet, lik katu' ni uri awe che i tu'b'al re tojb'alil. 13Yin in Ajwal, lik kinsaqij pinb'i: I tinimit re Bosra k-on ni pacha jun tz'inilik jyub', xaq lik kwulij na, lik are jun k'utb'al re che chi xqajsax u'ij xaq xutij i k'oqb'al, xaq i jub'an chik nimaq taq tinimit kekanaj ni puyej ronojel ij saq.”
14Xya' jun tzijonik chwe re i Ajwal,
utaqom li ajk'amol tzij re kutzijoj chkixol i nimaq taq tinimit:
¡Chimolo iwib', jix chu'anik ch'oj chrij i tinimit Edom,
lik chiyijb'a iwib' re i ch'oj!
15Yin kin-an ni chawe chi lik mas at pich' chkiwach i jub'an chik tinimit,
xaq lik mas tzel ni kat-il kumal konojel i winaq.
16Xaya awib' chi xatt'ortaj rumal ukojik a'ij,
man lik nim i xib'rikil kaya te'eq.
Yet chi at jeqel pa taq pek ab'aj,
chi uchapom rib' che i nimaq taq jyub'.
Xwiri tupu pacha at kotxik chi ku'an usok chwi taq jyub' naj uwi,
chila katinqajsaj wi loq.
Yin in Ajwal, xinb'iw ile.
17I usachik uwach i tinimit Edom lik nim rumali lik kuya ni xib'rikil. Konojel pachin keik'aw chila lik kkixij ni kib' are kkil i tojb'alil, 18man kkanaj ni kanoq pacha i tinimit Sodoma xaq i Gomorra xaq i tinimit chi je o chrij chwach, are xsachsax kiwach. Lik mijun kjeqi chik chila, xaq mitene to' keik'aw taq chik chila. Yin in Ajwal, xinb'iw ile. 19Pacha jun koj chi kel li pa taq es re i Jordán chi xaq k-e pa taq k'ijib'al ipa o wi es chi lik rax, chila kin-an na chi ke'anmaj ni aj Edom, xaq kin-an na chi krajawin i winaq chi kin-ul yin. Xwiri, ¿Pachin nawi kupaj rib' wu' Yin? ¿Pachin nawi kinuch'ak Yin? ¿Pachike ajyu'ul chij kupek' rib' wu' Yin? 20Chita i ch'ob'onik chi Yin in Ajwal, inyijb'am chrij i tinimit Edom, i anik chi xaq inyijb'am chkij i winaq aj Temán: Xwi ta la ile, xaq kek'am nu b'i i ral taq chij ch'utiq, xaq ronojel ipa ke'esan wi ksachsax ni uwach. 21I utzaqik i tinimit Edom lik naj ktataj wi uch'awb'al, man ulew lik ksiksat ni rumal; ksik'in ni chutz'onoxik tob'al ib', i kisik' lik ktataj ni k'a pa Mar Kaq. 22I ajch'oj chrij kuk'aq ni rib' chrij i Bosra pacha jun kotxik kripip uxik', che i ij le i achiyab' chi je yij che i ch'oj re Edom kesiksat na pacha jun ixoq are kalanik.
Tzijonik re i Dios chrij i Damasco
23Tzijonik chrij i Damasco:
“I nimaq taq tinimit re Hamat, xaq Arfad lik je o pa k'ixb'alil,
man xupon utz ti laj taq tzijonik ku'.
Lik to' pa xib'rikil chik je o wi, lik utz ti je olik.
24I Damasco, lik nti chik ucho'ab', kuch'ob' anmajik.
Kqajsax u'ij rumal i xib'in ib', b'is xaq i k'ax,
pacha taq jun ixoq chi ya kalanik.
25I tinimit chi lik o u'ij, i tinimit chi lik kikotik,
lik xo'tax kanoq.
26Che i ij le kekanaj ni kan i kak'al chi je alab'om xaq altom, lik je jab'ernaq ni kan pa taq b'e,
xaq konojel i kajch'oj chi are i achiyab' chi je yij che i ch'oj, kekam na.
Yin in Ajwal, chi ronojel kintiki che, xinb'iw ile.
27Kinnak' ni a' chke i tapial re i tinimit Damasco,
i a' le kusachsaj ni i nim laj ja re i tinimit Ben-adad.”
Tzijonik re i Dios chrij Cedar xaq Hazor
28Tzijonik re i Ajwal chrij i lemajil Cedar xaq chrij i je aj-atzil re i lemajil Hazor, chi are xeuch'ak i ma Nabucodonosor, chi ajawinel re Babilonia:
“¡Jix, yix, chi'ana ch'oj chrij i tinimit Cedar!
¡Cheisachsaj i lemajil le chi je aj prelb'al ij!
29Cheimaja i ral taq ja wu'waq chke, xaq chik'ama i kichij,
xaq i kik'ul re mujb'al i ronojel ub'itaq ke.
Chimaja i kikamey xaq lik chixsik'in chke:
¡Lik xaipa o xib'rikil!
30¡Lik pa'anem chix-anmajoq, winaq re Hazor!
¡Jix chiwuwaj iwib'!
Yin in Ajwal, kinb'in ile.
Man ma Nabucodonosor, chi ajawinel re Babilonia,
u'anom jun ch'ob'onik chiwij yix.
31Yin in Ajwal, kixintaqo:
¡Jix, chi'ana ch'oj chrij i tinimit le
chi lik jeqelik xaq lik kul uk'ux, chi lik nti uchija xaq nti silik' che,
lik utukel olik!
32¡Chiwel-aj i kikamey xaq konojel i kichikop!
Keinkichersaj nu b'i che i jalajuj taq k'ijib'al
konojel i winaq le chi kkisol b'i kismachi' xaq rij taq kixikin;
xaipa kink'am na li k'ax pkiwi.
Yin in Ajwal, xinb'iw ile.
33I tinimit Hazor k-on ni ronojel ij saq
pacha jun tz'inilik jyub', xaq kik'ijib'al i tz'i aj pa taq es.
Lik mijun kjeqi chik chila, lik keik'aw ti ne chik che i k'ijib'al le.”
Tzijonik re i Dios chrij Elam
34I ma Sedequías are xujeq ajawinik pa Judá, i Ajwal xub'ij i tzijoniki che ma Jeremías chrij i tinimit Elam:
35“Yin in Ajwal, chi ronojel kintiki che, kinb'ij:
Kinpatz' ni k'aqb'al kich'ab' aj Elam,
chi lik are kikowil re anb'al ch'oj.
36Kink'am na li tew puwi i tinimiti
che i kajib' usuk' i jyub' ta'aj,
re keukichersaj b'i che i jalajuj taq k'ijib'al,
k'a kk'is ni uwach,
lik mijun tinimit kkanaj kanoq we nti taq jun aj Elam utom rib'.
37Kin-an ni che i tinimit Elam chi kb'arb'at chkiwach ajch'oj chrij,
kintaq nu b'i k'ax laj taq yob'il pkiwi,
xaq ronojel i woywal,
xaq kintaq nu b'i ch'oj chkij k'a kk'is ni uwach ronojel.
Yin in Ajwal, xinb'iw ile.
38Kinkub'a ni inkub'ib'al chi o u'ij pa tinimit Elam,
xaq kin-an ni che chi kekam ni rajawinelab' xaq i je kaj-atzil.
Yin in Ajwal, xinb'iw ile.
39Xwiri k-on panoq kinjalwachij ni uk'aslemal i tinimit Elam.
Yin in Ajwal, xinb'iw ile.”
Currently Selected:
Jerem%EDas 49: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
