Jerem%EDas 4
4
Lapanik chrij ujalwachixik i nojb'al
1I Ajwal kub'ij:
“Ix aj Israel, we kiwaj kixtzalij chik,
lik wu' yin uri kixtzalij wi chaloq.
We keiwesaj b'i itiox chi lik titb'al pamaj
xaq we kijek' ti iwib' wu' yin,
2utz uri kikuxtaj inb'i puwi itzij
chi lik saq laj tzij, u'anik i utz laj atb'al tzij xaq u'anik i suk'ulik.
Inb'i le lik utzil chomal ni chke i nimaq taq tinimit
xaq lik kkib'ixaj na.”
3I Ajwal kub'ij chke i winaq aj Judá xaq chke i winaq aj Jerusalén:
Chixtikan chwach ulew chi chapb'em taj,
mixtikan chik xol taq k'ix.
4Winaq aj Judá xaq ix aj Jerusalén
chi'ana i circuncisión, xaq chiwetamaj chi yin in Iwajwal,
chi'ana ch'am che ik'ux,
moqxa rumal i utz taj chi ki'ano
kmi' woywal pacha i a' chi lik kjuluwik,
mijun ktiki chuchupik.
I majanik keuxib'ij aj Judá
5Chitzijoj iri pa Jerusalén xaq pa Judá,
chixsik'in chub'ixkil ru' usonil i trompeta chupam ronojel i nim laj tinimit,
lik ko chixsik'inoq:
¡Jo', chqamolo qib'
pa taq nimaq taq tinimit chi o tapial nim uwach chrij!
6Chiyaka i k'ul chi kuk'ut u'ij jun tzob'aj, kuk'ut b'i pa tinimit Sion;
¡Chitzukuj i k'ijib'al re tob'al iwib', mixuxlan chutzukuxik!
Man pa moxab' kink'am wi li
nimaq taq uyej xaq i sachanel wachij.
7I koj elnaq chal pujul,
i jun chi ksachaw uwach i nimaq taq tinimit lik o chik pa b'e,
elnaq li putinimit re sachb'al uwach atinimit yet,
re ku'an kan che pacha taq jun tz'inilik jyub' xaq pacha jun nim laj tinimit wulijnaq.
8Rumali, chiwiqa iwib' ru' i'u' as,
chixo'oq xaq chixjilaw rumal uk'axk'ol,
man ik'awnaq ti i nim laj roywal
i Ajwal chqe.
9I Ajwal kub'ij:
“Are kuriqa i ij le,
i ajawinel xaq i je aj-atzil lik keb'arb'at ni rumal kixib'rikil,
i je ajsujul sipon, kkina ni jun nim laj xib'rikil
xaq keje ile kkina i profeta.”
10Yin xinb'ij: “¡Ay, Ajwal,
b'uchak je at'orom i winaq aj Jerusalén!
Xasujuj i chomb'al ib' chke,
xwiri wo'or xa jun kuchil mintal pkiqul.”
11Are kuriqa i jo'taj tan le,
kb'ix ni che i tinimit Jerusalén:
“Jun tew k'atan aj pa tz'inilik jyub' chaqij
kjuk'uk' puwi intinimit.
Are ti i tew chi to' kpuypatik
re pub'al uwach i trigo.
12I tew chi kinpetsaj lik are jun tew chi nti usuk' xaq lik mas nim chwach ile,
rumali wo'or kinch'ik uya'ik utojb'alil chke.”
Usutik kij aj Israel kumal ajch'oj chkij
13Chiwila pe', i ajch'oj chiwij ktijin kitejeb'ik pacha jun sutz',
i kich'ich' re anb'al ch'oj lik keje pacha jun nim laj jab' tew upam,
xaq i kikaway mas kkich'ij b'e chkiwach i kotxik.
¡To' qawach yoj, man wo'or kqariq i tojb'al re!
14Ix aj Jerusalén, chiwesaj i utz taj che iwanima,
man keje ile kixtotaj uri.
¿K'a junpa kimayij uch'ob'ik xaq kijalwachij i nojb'al chu'anik
i utz ti laj taq b'iroxik?
15K'a pa Dan, xaq k'a chwi taq jyub' re ma Efraín,
kupon wi utzijoxik i utz ti laj taq tzijonik:
16Su' chisaqij chke i nimaq taq tinimit, xaq che i tinimit Jerusalén,
chi che jun tinimit naj kek'un wi i je ajch'oj chkij.
Kesik'in chu'anik ch'oj
chkij i nimaq taq tinimit Judá.
17Kkisutij ni rij i Judá pacha uchajixik ulew re i tikanb'al,
man xuyak rib' chu'anik ch'oj chrij i Ajwal.
Yin in Ajwal, xinb'iw ile.
18Are i utz ti laj ak'aslemal xaq ni'pa i'anom
x-anaw chawe ni'pa i xak'ulmaj;
i amak are xyaw i uyej chawe
xaq ku'an k'ax che awanima.
Ma Jeremías kutij k'ax rumal utinimit
19¡Kinb'ak'ak'ej wib' rumal uk'axk'ol
xaq i wanima lik ko ktujuwik! ¡Lik kink'achirik, kintiki ti chu'atixik wib' chub'ixkil wach xinta!
Lik intom juxut'aj uch'awb'al trompeta,
xaq jun sik'inik re i ch'oj.
20Lik uterb'em rij utzijol i xaqmanal taq anik,
xaq ronojel i nim laj tinimit lik xaqmanal ktijin chuk'ulmaxik.
Xaqte'et xkiwulijsaj ink'ijib'al,
lik mutmut x-on kan i wu'waq taq ja re wachoch.
21¿Ni'pa nawi chik ij kwil i k'ul chi kuk'ut u'ij jun tzob'aj,
xaq kinta uch'awb'al i trompeta?
22“Intinimit lik nti unojb'al man lik reta'am ti inwach,
—keje ile kub'ij i Ajwal.
Lik je are i jub'an k'uwalxelab' nti kino'oj man lik kech'ob'on taj.
Lik je sik'aj chu'anik i utz taj,
xwiri keta'am ti u'anik i utz.”
I ma Jeremías krilo wach i utz taj chi kk'ulmaxik k-on panoq
23Xintaqej i jyub' ta'aj, are uri xwilo chi keje pacha jun tz'inilik jyub' chaqij chi yijil ti usuk';
xintaqej uwa taq kaj, are uri xwilo chi lik nti saq chwach.
24Xintaqej ni'pa i jyub' are uri xwilo chi keyikyatik;
xaq ronojel ni'pa i uwi i nimaq taq jyub' keseyawik.
25Are uri xintaqej xwiri mijun chik winaq xwil uwach,
xaq konojel i tz'ikin je anmajnaq chik.
26Xintaqej are uri xwil i tikb'al kotz'ij yijinaq chik che i tz'inilik jyub' chaqij,
xaq konojel i nimaq taq tinimit lik xaqmanal chik kik'ulmam.
Are i nim laj roywal i Ajwal
x-anaw che ronojel ni'pa ile.
27I Ajwal kub'ij:
Lik kch'aj nu b'i uwach ronojel jyub' ta'aj,
xwiri kinsach ti uwach ronojel.
28I jyub' ta'aj knoj ni uwach che i b'is,
xaq i kaj kk'iji ni pa b'is.
Inb'im chik xaq kinjalwachij ti chik intzij,
inch'ob'om chik xaq kinjalwachij ti chik innojb'al.
29Are kesik'in i winaq chi je ajrij taq kaway xaq i je ajk'aqol ch'ab',
konojel i winaq ke'elmajik kkuwaj kib' pa taq es,
xaq ke'el b'i puwi i nimaq taq ab'aj,
ronojel ni'pa i nimaq taq tinimit lik xetali kanoq,
lik nti chik winaq xek'iji kan chila.
30Yet tinimit chi at wulijnaq chik.
¿Wach uchak kawiq taq awib' ru' chom laj k'ul kaqxar?
¿Wach uchak kawiq taq awib' ru' chomiq taq ab'aj re wiqb'al ib' an-o'oj?
¿Wach uchak katz'aj rij taq awach ru' tz'ajb'al eq?
Lik kuriq ti uchak chawe chi ka'an taq chom che awib',
man ni'pa i je awe ani'al lik kik'aqom chub'i a'ij,
wo'or xa are akamik kkitzukuj.
31Kinta i sik' re uk'axk'ol pacha jun ixoq
are kralaj i nab'e rak'al, are i sik' re i tinimit Sion,
chi kjilawik, kurip b'i u'ab' xaq kub'ij:
“¡To' inwach yin, chi kinkikamsaj i kamsanelab'!”
Currently Selected:
Jerem%EDas 4: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
