Jerem%EDas 48
48
Tzijonik chkij aj Moab
1Utzijonik i Ajwal chi ronojel ktiki che, chi ki-Dios aj Israel chrij i tinimit Moab:
¡To' uwach i tinimit Nebo,
lik wulijsam chik!
¡I tinimit Quiriataim xechap b'ik xaq xqajsax ki'ij!
¡I ukowil kik'ux lik xqajsax k'a pulew!
2I ukojik u'ij i tinimit Moab xk'isik.
Pa Hesbón i je ajch'oj kki'an jun ch'ob'onik
man keje ile i nim laj tinimit Moab ksachsax ni uwach.
Xaq keje yet Madmena, katsachsax na,
xaq i ch'oj lik katro'taj taj.
3Pa Horonaim ktataj ni i sik':
“¡Uyej xaq i sachsanik!”
4I tinimit Moab o puyej;
i kisik' re i k'ax kupon k'a pa Zoar.
5Lik ru' o'ej xaq ru' uwa'al kiwach ke'el b'i
jub'an che i jyub' pa Luhit;
xaq i jub'an chi keqaj li pa Horonaim
lik kesik'in rumal uk'axk'ol i k'ax.
6¡Chix-anmajoq! ¡Jun we ktiki'ik, chuto rib'!
¡Chi'ana che iwib' pacha i lokej pa tz'inilik jyub' chaqij!
7Moab, yet lik kul te'eq ak'ux che acho'ab'
xaq che ab'eyomal,
xwiri yet katchaptaj nu b'ik.
I a-dios chi Quemos ub'i, kelsax nu b'i pa cho'ab' chwach rulew,
junam ku' i ajsujul sipon xaq i winaq chi lik o ki'ij.
8I sachanel kupon ni ku' nimaq taq tinimit,
xaq mijun ktotaj na;
i ta'aj xaq i setsik jyub' chi o puwi i tzam taq jyub' kewulij na.
Yin in Ajwal, xinb'iw ile.
9Chikojo jun perpik ab'aj pa tinimit Moab k'utb'al re
chi ksachsax uwach;
xaq i nimaq taq utinimit kewulij na
xaq lik mijun winaq kkanaj kan chwach.
10(¡K'oqom i jun chi k-on ti uchak ru' ronojel uk'ux chi yatal chuqul rumal i Ajwal! ¡K'oqom i jun chi kraj ti kumin rib' chu'anik i kamik!)
11Moab lik arewi k'ijinaq pa chomb'al ib', lik mijuyak elsam b'i pa cho'ab' chwach rulew. Lik keje pacha uwa'al uva muqb'am chi k'oltalik, chi to' ti k-atsax chik chupam jun xar, rumali lik kel ti ujelal xaq i umuyal.
12Xwiri i Ajwal kub'ij: Kuriq ni jun ij chi yin kintaq b'i jub'an winaq chi kki'atsaj uwa'al uva muqb'am le chupam jub'an chik xar, xaq i xar chi nti upam kki'an mutmut che. 13Are uri i tinimit Moab kuna ub'e chi xqajsax u'ij rumal u-dios Quemos, xaq keje pacha i tinimit Israel lik xuna'o chi xqajsax u'ij rumal Bet-el, chi ukub'am te'eq uk'ux che.
14Mub'ij uri i tinimit Moab: “Lik ko qawach,
oj aj-anol ch'oj chi ronojel kojtiki che.”
15Ya kupon i kwulijsaw i tinimit Moab xaq i nimaq taq utinimit;
lik kekam ni k'ojolab' chi je re ire chi xaq lik ko kiwach.
Kub'ij i Ajawinel, chi ub'i are i Ajwal chi ronojel ktiki che.
16I k'ax re i tinimit Moab ya knaqajab'ik,
utzaqik pa k'ax lik ya kupon ru'.
17B'esin re i tinimit Moab,
xaq konojel jub'an chi keta'am chi o u'ij,
chixo' che ire xaq chib'ij:
“¡Chiwila pe wach uqajsaxik u'ij xaq relsaxik ucho'ab'
chi lik nim te'eq u'ij!”
18Chatqaj li che ak'ijib'al chi o u'ij, nim laj tinimit Dibón,
xaq chatkul pulew chi lik chaqij uwach,
man i ajsachanel re i Moab ya kupon awu'
xaq lik uwulijsam chik i atapial nim uwach.
19Tinimit re Aroer,
chattak'al chutzal i b'e xaq chawila;
chatz'onoj chke i k'a je k'as kanoq
wach xk'ulmaxik.
20Tinimit Moab lik qajsam u'ij, lik o pa xib'rikil.
¡Lik chixo' rumal i k'ax chi kina rumal ire!
¡Chitzijoj chi taq raqana Arnón
chi tinimit Moab lik xsachsax uwach!
21Xupon uya'ik utojb'alil chke i tinimit chi je o che i setsik jyub' chi o puwi tzam taq jyub': Aj Holón, aj Jahaza aj Mefaat, 22aj Dibón, aj Nebo, aj Bet-diblataim, 23aj Quiriataim, aj Bet-gamul, aj Bet-meón, 24aj Queriot, aj Bosra xaq konojel nimaq taq tinimit re Moab, naqaj xaq i je aj naj.
25I Ajwal kub'ij:
I ucho'ab' i tinimit Moab xk'isik,
ronojel u'ij xsach uwach.
26Chi'ab'arsaj i tinimit Moab
man xuqajsaj u'ij i Ajwal.
Are uri i tinimit Moab kub'alk'atij ni rib' chupam uxo'oj
xaq konojel kkitze'ej ni ire.
27Tinimit Moab, ¿yet ti b'awa katze'ej i tinimit Israel
xaq k'ax te katch'aw chrij ire ru' titb'al pamaj,
chi xaq lik kab'ij chi Israel keje pacha taq jun ili'om?
28Winaq re Moab, chixel pa nimaq taq tinimit;
jix pa taq siwan ab'aj, pa jeqelem chila pacha taq palomax
chi kki'an kisok chuchi' taq siwan.
29Lik qeta'am chi i tinimit Moab lik kukoj u'ij:
Lik ku'an nim che rib', lik b'uy.
30I Ajwal lik reta'am ub'uyil,
xaq i kiloxowik xaq i kik'anil.
31Rumali kino' na xaq kintz'uyunej na
kumal konojel i winaq re i tinimit Moab
xaq rumal konojel i winaq re Kir-hares.
32Kino' ni chawe, tikonb'al uva chila che i k'ijib'al Sibma,
lik mas chwach i o'ej chi xin-an che i k'ijib'al Jazer.
I u'ab' ache'lal lik mas xik'aw puwi i mar
xaq kupon ni k'a pa Jazer.
Xwiri wo'or i amolonik re uva
lik ntaj.
33Ktataj ti chik i sik' re kikotemal
pa taq tikonb'al kotz'ij re Moab.
I uwa'al uva muqb'am lik xk'is pa taq k'olb'al re.
Lik mijun chik ku'ut i uva ru' raqan,
lik nti chik mas b'ix re kikotemal.
34I winaq pa tinimit Hesbón kesik'in che i b'is,
xaq i kisik' kupon k'a pa Eleale, Jahaza,
pa Zoar k'a pa Horonaim xaq Eglat-selisiya,
man ralaxb'al ya pa Nimrim lik je chaqijnaq chik.
35I Ajwal kub'ij:
“Yin kinsachsaj ni kiwach i winaq re i tinimit Moab,
chi ke'el b'i tzam jyub' pa lo'laj taq k'ijib'al kitiox,
re kkisujuj i sipon xaq pom che i kitiox.”
36Rumali i wanima lik kjilawik man k'ax kuna i tinimit Moab
xaq kumal konojel i winaq re Kir-hares;
ru' uch'awb'al i su' re kamnaq
man i b'eyomal chi xumol uchi' xsachik.
37Konojel i winaq is kisolom b'i kiwi che kijolom xaq ronojel i kismachi' is kisolom b'ik;
xaq konojel ki'anom sokonik che i ki'ab'
xaq kikojom ki'u' as.
38“Che ronojel uwi i ja re tinimit Moab
xaq ronojel pa taq b'e
lik xwi ktataj o'ej,
man yin lik xinwulijsaj i tinimit Moab
pacha jun ulew xar paxnaq.
Yin in Ajwal, xinb'iw ile.”
39¡Chixb'ison che i tinimit Moab!
¡Man lik xib'rikil u'anom!
¡Man xtzaq chupam i utz taj xaq pa k'ixb'alil!
Lik xu'an pacha jun b'iroxik ch'am taj xaq lik nti chik uchak
chke konojel ub'esin.
40I Ajwal kub'ij:
I ajch'oj chrij i tinimit Moab kkik'aq b'i kib' chrij
pacha jun kotxik chi uripipem uxik'.
41Nimaq taq tinimit xaq ronojel ukowib'al
ktzaq ni pki'ab' i ajch'oj chrij.
Che taq i ij le i achiyab' chi je yij che i ch'oj re i tinimit Moab
kesiksat na pacha jun ixoq chi ya kalax rak'al.
42I tinimit Moab kb'ix ti chik jun nim laj tinimit che,
man xu'an nim che rib' chinwach Yin, chi in Ajwal.
43Rumali, Yin in Ajwal, kinb'ij:
I winaq re i tinimit Moab keu'on ni
pacha taq chikop chi je terb'em kumal i ajmontiyar
xaq je o che jun xib'in ib' chi ketzaq chupam jun jul o xaq chupam jun tzaqsab'al.
44Pachin k-anmaj chkiwach ajmontiyar ktzaq ni chupam i jul,
i jun chi kel li chupam i jul ktzaq ni pa tzaqsab'al,
Man Yin kink'am li puwi i tinimit Moab,
i ij re utojb'alil.
Yin in Ajwal, xinb'iw ile.
45O jub'an chi lik nti chik kicho'ab',
ke'anmaj chutzukuxik tob'al kib' che umuj i tinimit Hesbón;
xwiri i Hesbón, i tinimit re ajawinel Sehón,
lik o purep a', i a' lik ktijin u'enam
xaq lik kuk'at b'i uwach i tinimit Moab,
tinimit chi ch'am ti unojb'al.
46¡To' awach yet, Moab!
¡Tinimit re Quemos, lik at tzaqnaq!
¡Je ak'ojol xaq i je ami'al ke'elsax nu b'i pa cho'ab' chwach kulew!
47Xwiri pa k'isb'al re Yin kinjalwachij ni uk'aslemal i tinimit Moab;
Yin in Ajwal, xinb'iw ile.
Are uya'ik utojb'alil ile xu'an i Ajwal che i tinimit Moab.
Currently Selected:
Jerem%EDas 48: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
