Jerem%EDas 40
40
Ukanajik ma Jeremías ru' ma Gedalías
1I Ajwal xlapan ru' ma Jeremías, chrijil chik ro'taxik b'ik pa Ramá rumal ma Nabuzaradán aj-ok'al utzam i ajchajinelab'. Ma Nabuzaradán xuriqa chi kitz'apim xaq kiyut'um ru' karena chkixol i winaq re i Jerusalén xaq i Judá chi xe'elsax b'i pa cho'ab' chwach kulew, i xek'am b'i chila pa Babilonia.
2I aj-ok'al utzam i ajchajinelab' xuk'am b'i ma Jeremías junla xaq xub'ij che: I Awajwal chi a-Dios uch'ach'am utaqik li k'oqom laj taq k'ax che i k'ijib'ali, 3xaq wo'or xu'ano wach xub'ij. Iri xik'ulmaj yix man xixmakun chwach i Ajwal xaq xixkojon ti che. 4Xaq lik wo'or kintor i karena chi at yut'tal ru'. We kawaj petik wu' yin pa Babilonia, chatsa'aj; yin katinchajij na. Xwiri we kawaj taj, chat-ol kan uri chi. Lik o ronojel i tinimit pa'ab': Jat chila ipa kach'ob' wi yet chi utz. 5We kach'ob' tzalijik, chattzalij b'i ri ru' ma Gedalías, uk'ojol ma Ahicam xaq umuq uxikin ma Safán, chi ajawinel re i Babilonia uya'om kanoq re aj-ok'al utzam i tinimit re i Judá xaq chila katjeqi wi ru' xaq chkixol i tinimit. Jat chila pa kach'ob' wi yet chi utz. Te'uri i aj-ok'al utzam i achiyab' chi je yij che i ch'oj xuya jun sipon, xuya b'i ronojel ni'pa kutij pa taq b'e xaq xuya b'i rutzil uwach ma Jeremías. 6I ma Jeremías x-e ru' ma Gedalías chila pa Mizpa, xjeqi ru' xaq ku' i winaq chi xekanaj kan che i nim laj tinimit le.
Uch'ob'ik ch'oj chrij ma Gedalías
7I aj-ok'al utzam xaq i achiyab' chi je yij che i ch'oj aj Israel, chi k'a je o chila pa taq es are xkita chi ajawinel re i Babilonia xuya kan ma Gedalías, chi uk'ojol ma Ahicam, pa aj-ok'al utzam i jalajuj taq tinimit, chi are ire o pu'ab' keuchajij i achiyab', ixoqib' xaq i ak'alab' ke i winaq chi mas je nib'a' che i nim laj tinimit chi xetaq tu b'i pa Babilonia, 8xe'e ku' kiwinaq pa Mizpa, chrilik ma Gedalías. Chkixol ike le je o: Ma Ismael, uk'ojol ma Netanías; ma Johanán xaq ma Jonatán, je uk'ojol ma Carea; ma Seraías, uk'ojol ma Tanhumet; je uk'ojol ma Efai aj Netofa; xaq ma Jezanías, uk'ojol jun achi aj Maacat, xaq i je uwinaq. 9I ma Gedalías lik xusaqij ru' jun tzij chi xub'ij pub'i Ajwal: “Mixij iwib' chu'anik ipatan chkij aj Caldea. Chixjeqel kan chi pa nim laj tinimit, chi'ana ipatan chrij i ajawinel aj Babilonia, xaq lik utz uri kixel ru'. 10Yin kinkanaj kan pa Mizpa, man keje ile yin kink'iji chkiwach aj Caldea are kek'unik. Yix chik'olo i uwa'al uva muqb'am, echa' xaq i aceite, xaq keje ile kixkanaj kan uri pa tinimit chi yix xik'amo.” 11Konojel aj Israel chi je o chila Moab, Amón, Edom xaq jub'an chik nimaq taq tinimit xketamaj chi ajawinel re Babilonia xuya chke jujun aj Israel chi kekanaj kan prulew, xaq are ire xuya kan ma Gedalías pacha aj-ok'al utzam ke ike. 12Konojel aj Israel chi kikichersam b'i kib' pa jalajuj taq k'ijib'al xetzalij chub'i pa Judá, xaq xkik'utu kib' che ma Gedalías chila pa Mizpa. Xaq ike le xkik'ol i k'iyal uwa'al uva muqb'am xaq i echa'.
Ma Ismael kuch'ob' u'anik ch'oj chrij ma Gedalías
13I ma Johanán, uk'ojol ma Carea xaq konojel i jub'an chik aj-ok'al utzam i achiyab' chi je yij che i ch'oj chi je kanajnaq kan pa taq es, xe'e pa Mizpa chrilik ma Gedalías, 14Xaq xkib'ij che:
—¿Aweta'am ti b'ari chi ajawinel ma Baalis, aj Amón, xutaq ma Ismael chi uk'ojol ma Netanías, chakamsaxik?
Xwiri ma Gedalías xukoj ti chke. 15Are uri ma Johanán xani'al xub'ij che ma Gedalías:
—Chaya chwe chi kin-e chukamsaxik ma Ismael. Lik mijun kretamaj pachin k-anawik. ¿B'uchak wa kqaya che chi katukamsaj yet? Ile xa keukichersaj b'i aj Israel chi kimolom kib' chawij, Xaq kk'is ni uri kiwach aj Judá.
16Xwiri ma Gedalías xub'ij:
—¡Ma'an ile! I kab'ij chi ku'an ma Ismael le, qatzij taj.
Currently Selected:
Jerem%EDas 40: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
