Jerem%EDas 39
39
Utzaqik i Jerusalén
1Che ulajuj ik' re i ub'elej junab' re rajawinik ma Sedequías chila Judá, ma Nabucodonosor, ajawinel re Babilonia, junam ku' i achiyab' chi je yij che i ch'oj, xe'e chu'anik ch'oj chkij aj Jerusalén xaq xkisutij rij. 2Che i b'elejeb' ij, che ukaj ik', che julajuj junab' re rajawinik ma Sedequías, i achiyab' chi je ajch'oj chkij, xe'ok b'i pa tinimit. 3Xaq konojel i je rajpatan i ajawinel aj Babilonia xe'ok b'ik, xekub'i chila chwach uchija chi o pa nik'aj. Ike le, je ma Nergal-sarezer, ma Samgar-nebo, ma Sarsequim, jun nim laj aj-atzil, xaq i jun chik nim laj aj-atzil are ma Nergal-sarezer.
4I ajawinel ma Sedequías xaq i achiyab' chi je yij che i ch'oj are xkilo ni'pa ktijin uk'ulmaxik, xe'anmaj b'i pa nim laj tinimit le. Lik cha'ab' xe'el b'i che i b'e re i tikonb'al kotz'ij re i ajawinel, che i uchija chi o chuxol i keb' tapial xaq xkimaj b'i b'e chi k-e chwa ta'aj re i Jordán. 5-6Xwiri i achiyab' chi je yij che i ch'oj aj Caldea xeterej b'i chkij, xekimaja ma Sedequías chwa ta'aj re i Jericó. Xkichapo, te'uri xkik'am b'i chwach i ajawinel ma Nabucodonosor chi o pa Ribla, che i ulew Hamat. Chila ma Nabucodonosor xu'an i atb'al tzij. Xuwor pkiqul i rak'al ma Sedequías chila Ribla lik chwach ire x-an wi chke, xaq keje ile xu'an chke konojel i winaq chi nimaq ki'ij je aj Judá. 7Xwiri i ma Sedequías xutaq relsaxik ub'a'wach, te'uri xutaq uximik ru' karena re kkik'am b'i Babilonia.
8Te'uri i aj Caldea xkinak' a' che i nim laj rachoch i ajawinel xaq chke i ja chi je o chila pa tinimit, xaq xkiwulijsaj i tapial re i Jerusalén. 9Pa k'isb'al re, ma Nabuzaradán, aj-ok'al utzam i ajchajinelab' re i rachoch ajawinel, xeuk'am b'i winaq pa Babilonia chi k'a je kanijnaq te'eq xaq i jub'an chi xe'ax ku' aj Caldea; ke'eloq chi ronojel i tinimit xeuk'am b'ik. 10Rumali chupam i ulew ke aj Judá xwi xeuya kan jujun chi lik je nib'a'ib' chi lik nti o ku', che i ij le xuya tikb'al ki-uva, xaq ulew re jalajuj taq tikon.
Ro'taxik i ma Jeremías
11I ajawinel ma Nabucodonosor aj Babilonia, xuya i taqaniki che ma Nabuzaradán, aj-ok'al utzam i chajinelab', chrij i ma Jeremías xelapan wi: 12“Utz rilik cha'ana che, lik ma'an k'ax che, are ka'ano chaya che ronojel ni'pa i kutz'onoj.” 13Are uri ma Nabuzaradán, junam ru' ma Nabusazbán xaq ma Nergal-sarezer, chi are je keb' nimaq taq ajpatanib' re i aj-atzil, xaq konojel i ni'pa rajpatan i ajawinel aj Babilonia. 14Are uri xkitaq relsaxik ma Jeremías chwaja ipa je o wi i ajchajinelab', xkiya rilik pu'ab' ma Gedalías, chi uk'ojol ma Ahicam, ri umam ma Safán, man kkik'am b'i chi rachoch. Keje uri ile chi ma Jeremías xkanaj pa jeqelem chkixol i winaq re i tinimit.
Sujunik che ma Ebed-melec
15Are k'a tz'apil te'eq ma Jeremías chwaja ipa je o wi i ajchajinelab', i Ajwal xlapan ru', xub'ij che: 16“Jat, chab'ija che ma Ebed-melec, chi aj Etiopía: I Ajwal, chi ronojel ktiki che, chi ki-Dios aj Israel, keje iri kub'ij: Kin-an ni ronojel ni'pa intzijom chrij i tinimiti chi ni'pa i utz taj ktzaq ni chrij, are ti i utz. Are kuk'ulmaj ile, yet lik at o ni chila. 17Xwiri yin lik katinmatzej na, man keje ile kattzaq ti pki'ab' i winaq chi kaxij awib' chke. Yin in Ajwal, xinb'iw ile. 18Yin lik katinto na man keje ile katkamsax taj. Lik ktotaj ni ak'aslemal man xakub'a ak'ux chwe yin. Yin in Ajwal, xinb'iw ile.”
Currently Selected:
Jerem%EDas 39: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
