Jerem%EDas 41
41
Ukamsaxik ma Gedalías
1Che uwuq ik', i ma Ismael, chi uk'ojol ma Netanías, chi ri umam ma Elisama, ukwenta i ralk'uwal i ajawinel, x-e pa Mizpa chu'anik jun tz'onb'enik chkiwach ru' ma Gedalías. Je rachi'ilam i lajuj achiyab' xaq xkitij kiwa junam chila pa Mizpa, 2i ma Ismael xaq i je lajuj achiyab' chi je rachi'ilam b'ik, lik juntir xewalij chukamsaxik ma Gedalías ru' ch'ich' chi k'ulala o uware, chi ch'iktal te'eq rij re aj-ok'al utzam i jalajuj taq tinimit rumal i ajawinel re Babilonia. 3Xaq i ma Ismael xeukamsaj konojel aj Israel xaq i achiyab' chi je yij che i ch'oj aj Caldea, chi je o te'eq ru' ma Gedalías chila pa Mizpa.
4Che ukab' ij re ukamik ma Gedalías, are lik k'a mijun etamawnaq wach xk'ulmaxik, 5xeupon aj Siquem, aj Silo xaq aj Samaria kajwinaq (80) achiyab', chi lik kisolom b'i kismachi', i ki'u' lik raqch'ijnaq xaq i kich'akul lik k'iyal soktajnaq o che, chi xa are ike je anawnaq che kib'. Xwi ta la ile, xaq kik'amom li sipon ch'irajil xaq pom, re kkiporoj chwach i Ajwal chila prachoch. 6Are uri ma Ismael lik ko'ik xel li pa Mizpa, x-e chkik'ulaxik pa taq b'e. Are xkiriq kib' xub'ij chke:
—Chixpetoq chiwila ma Gedalías, chi uk'ojol ma Ahicam.
7Xwiri are k'ate xeupon pa nik'aj che i tinimit, ma Ismael xaq i achiyab' chi je rachi'ilam xekikamsaj xaq xekik'aq b'i chupam jun k'otom chaqij. 8Xwiri je lajuj achiyab' che i tzob'aj chi xeupon chila, xkib'ij che ma Ismael:
—Mojakamsaj; man qu' yoj o trigo, cebada, aceite xaq uwa'al kab' chi quwam pa taq es. Are uri i ma Ismael xukuy kimak rumali xeukamsaj taj pacha x-on chke i kachi'il.
9I k'otom chaqij chi xuk'aq kich'akul i winaq ma Ismael chupam chi xeukamsaj, ile xaq are i k'otom chaqij chi i ajawinel ma Asa utaqom u'anik are xuto rib' chwach ma Baasa, chi ajawinel re Israel. I k'otom chaqij le lik nim xwiri lik xnoj che kich'akul i kamnaq chi xeukamsaj ma Ismael. 10Xwi ta la ile, i ma Ismael xeuchap i umi'al i ajawinel xaq i winaq chi k'a je o kan chila pa Mizpa, are ma Nabuzaradán, chi aj-ok'al utzam ajchajinelab', chi xeuya te'eq chuxe' utaqanik ma Gedalías. I ma Ismael xeuchapo, te'uri xumaj b'i ub'e re kik'aw pa ulew Amón.
11Ma Johanán, are uk'ojol ma Carea xaq aj-ok'al utzam chke i achiyab' chi je yij che i ch'oj chi je o te'eq ru', xkita i kamik chi xu'an ma Ismael, chi uk'ojol ma Netanías, 12xkimol kiwinaq xaq xe'e chu'anik ch'oj ru' ire. Xkiriq chila pa o wi nim laj k'olb'al ya chi o pa Gabaón. 13I winaq chi je rok'am b'i ma Ismael prexil are xkil ma Johanán xaq konojel i aj-ok'al utzam i achiyab' chi je yij che i ch'oj chi je kachi'ilam b'ik, lik xekikotik, 14xetzalij chub'ik, te'uri xkimol kib' ru' ma Johanán. 15Xwiri i ma Ismael xaq je wajxaqib' achiyab' xetiki che anmajik chwach i ma Johanán i xe'e pa nim laj tinimit Amón.
16Are iri xki'an ma Johanán xaq i aj-ok'al utzam i achiyab' chi je yij che i ch'oj chi je rachi'ilam b'ik, are ike xkiya kib' chkilik i achiyab' chi je yij che i ch'oj, ixoqib', ak'alab' xaq nimaq taq ajpatanib' chi ma Ismael xeuchap b'i te'eq pa Mizpa chrijil chik ukamsaxik ma Gedalías, chi are ma Johanán xeutzalijsaj li pa Gabaón. 17Xe'ek xaq xejeqi kan pa tinimit Gerutquimam, chila xe'uxlan wi chutzal i tinimit Belén, man k'a pa Egipto ke'e wi 18man kkuwaj kib' chkiwach aj Caldea rumal kkixij kib' che ma Ismael chi xukamsaj ma Gedalías, chi ajawinel re i Babilonia uch'ikom te'eq rij re aj-ok'al utzam i jalajuj taq tinimit.
Currently Selected:
Jerem%EDas 41: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
