Jerem%EDas 35
35
I ma Jeremías xaq i je aj Recab
1Che taq i ij, re ma Joacim, chi uk'ojol ma Josías, chi ajawinel te'eq re i tinimit Judá, i Ajwal xlapan wu' yin, chi in ma Jeremías, xub'ij chwe: 2“Jat pkikomon aj Recab, chatlapan ku'. Te'uri cheak'ama b'i chupam jun chke upam ja chi o pwachoch, xaq chaya'a i uwa'al uva muqb'am chke.” 3Are uri, yin, chi in ma Jeremías, xin-e chutzukuxik ma Jaazanías, chi uk'ojol jun chik ma Jeremías, chi ri umam ma Habasinías, xaq i ratz ucha', xaq i rak'al xaq konojel ni'pa aj Recab, 4Te'uri xeink'am b'i prachoch i Dios, chupam i jun upam ja ke i rak'al i ma Hanán chi uk'ojol ma Igdalías, chi are jun achi re i Dios. I upam ja le o chila putzal ke i aj-atzil re i rachoch i Dios xaq rajsik i upam ja re i ma Maasías, chi uk'ojol ma Salum, chi are i ajchajinel re uchija re i rachoch i Dios. 5Are uri, xinya chke aj Recab ulew xar xaq tu'b'al ya chi nojnaq che i uwa'al uva muqb'am xaq xinb'ij chke: ¡Chitu'u pich' i uwa'al uva muqb'am!
6Are uri ike xkila' uwach: “Yoj kqatu' ti uwa'al uva muqb'am, man ma Jonadab, chi uk'ojol ma Recab, chi qatit qamam ujer, lik xoju'atij chutu'ik ronojel ij saq, rumali chi yoj xaq i qamuq qaxikin kqatu' ti uwa'al uva muqb'am. 7Xaq xoju'atij chu'anik qachoch, che i tikanik, xaq xoju'atij chutikik i uva. Xaq xojutaq che i k'ijilem chuxe' i wu'waq k'ul ja, re kojk'asi ni naj chwach ulewi pacha oj aj naj. 8Yoj lik oj kojonnaq che ronojel ni'pa i taqanik chi uya'om qamam ma Jonadab, rumali lik mijuyak kqatu' taq i uwa'al uva muqb'am, kqatu' ti yoj, qixoqil xaq i qak'al, 9xaq kqayak ti qachoch, re kojk'iji chuxe', xaq mitene o tikon re uva xaq mitene ulew re tikonb'al. 10Oj o chuxe' wu'waq taq k'ul ja, xaq kqa'ano pacha xub'ij i qamam ma Jonadab chqe. 11Xwiri are ma Nabucodonosor chi ajawinel re i Babilonia xtiki kan chuk'amik i nim laj tinimiti, are uri yoj xqach'ob' k'unik pa Jerusalén, re koj-anmaj chkiwach i achiyab' chi je yij che i ch'oj chi aj Caldea xaq aj Siria. Rumali chi oj jeqel chi Jerusalén.”
12Are uri i Ajwal xlapan ru' ma Jeremías, xub'ij che: 13“Yin, chi in Ajwal, chi ronojel kintiki che xaq ki-Dios aj Israel, Kinb'ij chawe chi: Jat xaq chab'ij chke i winaq aj Judá xaq chke aj Jerusalén: Chixnaw che i k'utuniki xaq chixkojon che intaqanik. Yin in Ajwal, xinb'iw ile. 14I je umuq uxikin ma Jonadab, chi uk'ojol ma Recab, lik ki'anom i taqanik chi xuya ire chiwe, chi kitu' ti uwa'al uva muqb'am, xaq k'a are o wi wo'or, lik kitu' taj, man lik ix kojonnaq che i taqanik ke iwatit imam ujer. Xaq yin inya'om taqanik le chiwe yix, lik k'iyalmul inya'om chiwe xwiri ix kojonnaq ti chwe. 15Xaq lik k'iyal taq wajpatanib' je intaqom b'i iwu' chi profeta, re kkib'ij chiwe: Chimayij u'anik i utz taj chupam i k'aslemal xaq i xaqmanal taq ki'ano. Mixterej b'i chkij jub'an chik dios, xaq mikoj taq ki'ij, man keje ile k'a kixk'iji ni chwach i ulew chi uya'om chiwe yix xaq chke iwatit imam. Xwiri yix xiwaj ti ukojik retalil chwe xaq ix kojonnaq ti chwe. 16I je umuq uxikin ma Jonadab, chi uk'ojol ma Recab, ki'anom wach kub'ij i taqanik chi xya' kan chke kumal i katit kimam; xwiri i tinimit Israel je kojonnaq ti chwe. 17Rumali, Yin, chi in Ajwal, chi ronojel kintiki che, ki-Dios aj Israel kinb'ij: Kin-an na chi puwi i Judá xaq pkiwi i winaq aj Jerusalén ktzaq ni k'ax laj yob'il chi intzijom. Man yin inb'im chiwe, xwiri yix ikojom ti retalil chwe; in ch'awnaq chiwe xwiri yix ila'om ti uwach chwe.”
18Xwi ta la ile, i ma Jeremías xaq xub'ij chke aj Recab: I Ajwal, chi ronojel ktiki che, xaq ki-Dios aj Israel keje iri kub'ij: Yix chi ix kojonnaq che utaqanik imam chi ma Jonadab, xaq i'anom pacha i uk'utunik xaq lik i'anom ronojel ni'pa ix utaqom che. 19Yin, chi in Ajwal, chi ronojel kintiki che, xaq ki-Dios aj Israel, lik kinb'ij chiwe chi lik kramtaj ti jun umuq uxikin ma Jonadab, chi lik arewi k-on upatan chwij.
Currently Selected:
Jerem%EDas 35: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
