Jerem%EDas 34
34
Utzijoxik tzij che i ajawinel ma Sedequías
1Ma Nabucodonosor, chi ajawinel re i Babilonia, junam ku' i achiyab' chi je yij che i ch'oj, chi je are i winaq ke konojel ni'pa i nimaq taq tinimit re i uwach i jyub' ta'aj chi je o pu'ab' ire, ketijin chu'anik ch'oj chrij i tinimit Jerusalén xaq chkij i tinimit chi je o naqaj chke, i Ajwal xlapan ru' ma Jeremías, xub'ij che: 2“Yin, chi in Ajwal, chi ki-Dios aj Israel, kinb'ij chawe chab'ij che ma Sedequías, chi ajawinel re i tinimit Judá: Keje iri kub'ij i Ajwal: Kin-an na chi i ajawinel re i Babilonia kuk'am ni i tinimiti xaq kunak' ni a' che. 3Yet lik kattiki ti chrelsaxik awib' pu'ab'; katkichap na xaq katkijach ni pu'ab' ire, chrijil chik ak'amik b'ik chwach ire, te'uri katkik'am b'i pa Babilonia. 4Xwiri, chata pe', ma Sedequías, ajawinel re i tinimit Judá, Yin, chi in Ajwal, kinb'ij chawe: Ru' ti ch'ich' k'ulala o uware katkamsax wi. 5Utz ni kamik ka'ano xaq kporox ni muy laj kunb'al chawe, pacha x-ani chke awatit amam chi xe'ajawin chuxe'el awajawinik yet, xaq kb'ix na: ¡Ay, Ajwal! Lik k'ax ni kuna kik'ux chawe yet. Yin, chi in Ajwal, xinb'ij i tzij le.”
6I ma Jeremías, chi profeta, xukamulij ub'ixkil ronojel ni'pa i tzij le che ma Sedequías chila pa Jerusalén. 7Are uri i achiyab' chi je yij che i ch'oj re i ajawinel aj Babilonia ketijin chu'anik ch'oj chrij i tinimit Jerusalén, Laquis xaq i Azeca, xwi i tinimit ile chi sutim kij ru' i tapial nim uwach re i tinimit Judá chi xewulij taj.
Uqelik i trat re ko'taxik b'i winaq chi je o pa k'ax kumal aj Hebreo
8I Ajwal, xlapan ru' ma Jeremías, chrijil chik u'anik i trat chi xu'an i ajawinel ma Sedequías ku' konojel i winaq aj Jerusalén, re ko'taxik b'i winaq chi je o pa k'ax kumal aj Hebreo. 9I trat kub'ij chi ni'pa i winaq chi je o pa k'ax achiyab' xaq we ixoqib' aj Hebreo, chkiya ni chke chi ke'ek, man keje ile lik mijun uri o taq jun winaq chi o pa k'ax kumal aj Israel. 10Konojel ni'pa i je aj-atzil, xaq konojel i tinimit, lik utz xkita wach kub'ij i trat, are uri ike xko'taj b'i kiwinaq chi je o pa k'ax, xaq xki'an ti chik pen chke chi k'a kechakun ku'. 11Xwiri chrijil chik ile xkijalwachij tan chik kino'oj rumal xeko'taj b'ik, rumali chi xki'an chik chke chi xetzalij chal ku' re keu'on tan chik winaq chi je o pa k'ax.
12Are uri i Ajwal xlapan ru' ma Jeremías, xub'ij che: 13“Yin, chi in Ajwal, ki-Dios aj Israel, xin-an jun trat ku' iwatit imam, are xewesaj li pa Egipto, ipa je winaq te'eq chi je o pa k'ax. Xinb'ij chke 14chi pa wuqub' taq junab' keko'taj b'i aj Hebreo chi je k'ayim ku' chi xechakun waqib' junab' ku'. Xwiri i katit kimam xkikoj ti retalil chwe xaq xinkiqelo. 15Xaq yix wo'or ijalwachim te'eq chik ino'oj xaq i'anom te'eq chik ni'pa i utz kwil Yin chi xiwo'taj b'i iwinaq chi je o pa k'ax. Xaq xiya iwib' chu'anik jun trat chinwach chila pwachoch ipa koksax wi in-ij. 16Xwiri xijalwachij chik inojb'al xaq xitz'ij inb'i, xib'ij chke i winaq chi je o pa k'ax chi je iwo'tam te'eq chub'ik chi ketzalij chal iwu' re iwinaq chi je o pa k'ax. 17Keje uri ile, Yin, chi in Ajwal, kinb'ij: Yix xixkojon ti chwe man xeiwo'taj tu b'i iwinaq chi je o pa k'ax; rumali wo'or Yin kin-an na chi kjeqan ni nim laj ch'oj chixol, wa'jal xaq yob'il, man keje ile lik kkiya ni jun nim laj xib'rikil chiwe xaq che ronojel ni'pa i ajawinik chwach i jyub' ta'aj. Yin in Ajwal, xinb'iw ile. 18-19I aj-atzil re i tinimit Judá xaq re i Jerusalén, junam ku' ajsujul sipon, i ajchakib' pa nim laj rachoch i ajawinel, xaq konojel ni'pa i winaq re i tinimit xki'an jun trat chinwach Yin, xki'an keb' che ral me', te'uri xeik'aw chuxol i ch'aqa taq, xwiri xki'an taj pacha i kub'ij i trat. 20Rumali, keinjach ni pu'ab' i ajch'oj chkij xaq ajkamsanel, xaq i kich'akul i kamnaq le kekitij nu b'i i k'uch xaq i itzel laj taq chikop. 21Xaq kin-an na chi ma Sedequías, chi ajawinel re i tinimit Judá, xaq i je rajpatanib' ketzaq ni pki'ab' i ajch'oj chi kekamsanik, xaq ktzaq ni pki'ab' i achiyab' chi je yij che i ch'oj re i ajawinel aj pa Babilonia, chi wo'or nti ch'oj kki'an chkij. 22Keintaq ni che chi kki'an chik ch'oj chrij i nim laj tinimiti, are ya xetiki chuk'amik te'uri kkinak' ni a' che. Xaq kin-an na chi i jub'an chik tinimit re i tinimit Judá k-on ni tz'inilik jyub' chi nti chik winaq chwach. Yin in Ajwal, xinb'iw ile.”
Currently Selected:
Jerem%EDas 34: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
