Jerem%EDas 36
36
Ma Baruc krajlaj uwach i b'orom tz'um prachoch i Ajwal
1Che ukaj junab' re rajawinik ma Joacim, chi uk'ojol ma Josías, ajawinel re i tinimit Judá, i Ajwal xlapan ru' ma Jeremías, xub'ij che: 2“Chak'ama pan jun b'orom tz'um re kattz'ib'an chwach, chatz'ib'aj chwach ronojel ni'pa inb'im chawe chrij i tinimit Israel, chrij i tinimit Judá xaq i jub'an chik nimaq taq tinimit, k'a are xinjeq li lapanik che taq i ij re ma Josías k'a arewi wo'or. 3Moqxa aj Judá are kketamaj chi kwaj kintaq li i k'ax laj taq yob'il, moqxa kkimayij i utz ti laj taq kik'aslemal, xaq yin kinkuy ni uri kimak atzalal chke.” Xcha i Ajwal.
4Are uri ma Jeremías, xusik'ij ma Baruc, chi uk'ojol ma Nerías, xub'ij ronojel che ni'pa xb'ix che rumal i Ajwal, i ma Baruc xutz'ib'aj chupam i b'orom tz'um. 5Te'uri ma Jeremías xub'ij jun tzijonik che ma Baruc: “Chawila pe wach in o yin chupam, ile lik kuya ti chwe chi kin-e prachoch i Dios. 6Rumali, yet jat che i ij chi knaqajab'ik re kmayix wa'im rumal utz'onoxik che i Dios, xaq chawajlaj i b'orom tz'um, chi xinb'ij chawe chi katz'ib'aj, man keje ile i tinimit xaq konojel i winaq re i nim laj tinimit Judá, chi xek'un waral, chkita ni utzij i Ajwal. 7Moqxa kkitz'onoj kuyb'al mak che i Dios, xaq kkimayij i utz ti laj kik'aslemal, man i nim laj roywal i Ajwal, ru' ile xuch'ach'a kikamsaxik i tinimit le lik xib'in ib'.” 8Are uri ma Baruc xu'an ronojel ni'pa xub'ij ma profeta Jeremías che: X-e prachoch i Dios xaq xrajlaj uwach i b'orom tz'um, chi are utzij i Ajwal.
9Che ub'elej ik' re ujo' junab' re rajawinik ma Joacim, chi uk'ojol ma Josías, ajawinel re i tinimit Judá, x-an jun ch'ob'onik chi i winaq aj Jerusalén, xaq i jub'an chik chi xa je k'unnaq, kkimayij ni kiwa'im man kelapan ru' i Ajwal. 10I ma Baruc x-e chwaja nim re rachoch i Dios chi o ajsik chi o pa okb'al re i Uchija K'ak', k'a chila loq pa ja re ma Gemarías, chi uk'ojol ma Safán, chi ajtz'ib'anel re anoj, xrajlaj uwach i b'orom tz'um chkiwach konojel i winaq ipa tz'ib'tal wi ronojel tzij chi xub'ij ma Jeremías.
Ma Baruc krajlaj uwach i b'orom tz'um chkiwach i nimaq taq ajpatanib'
11I Ma Micaías, chi uk'ojol ma Gemarías, chi ri umam ma Safán, xuta ronojel utzij i Ajwal chi xrajlaj uwach ma Baruc, chi o chupam i b'orom tz'um. 12Te'uri x-e pa nim laj rachoch i ajawinel, pa ja ipa o wi i ajtz'ib'anel re anoj, ipa kimolom wi kib' konojel ni'pa i nimaq taq ajpatanib', ma Elisama, chi ajtz'ib'anel re anoj, Delaía chi uk'ojol ma Semaías, ma Elnatán, chi uk'ojol ma Acbor; ma Gemarías chi uk'ojol ma Safán; ma Sedequías chi uk'ojol ma Hananías xaq jub'an chik ajpatanib'. 13Are uri ma Micaías xulap ronojel chke ni'pa xuta, are xrajlaj uwach i b'orom tz'um ma Baruc chkiwach konojel i winaq re i tinimit. 14I ajpatanib' xkitaq b'i ma Jehudí, chi uk'ojol ma Netanías, ri umam ma Selemías xaq uxikin ma Cusi, chub'ixkil che ma Baruc chi chuk'ama b'i i b'orom tz'um chke chi xrajlaj chkiwach i winaq re i tinimit. Are uri ma Baruc xuk'am pan i b'orom tz'um xuk'ut chke, 15te'uri ike xkib'ij che:
—Chatkuloq, chawajlaj uwach i b'orom tz'um chqe.
Are uri ma Baruc xrajlaj uwach chke. 16Are xutzin rajlaxik uwach chkixikin, lik xkixij kib' xkitaqej kib' chkiwach xaq xkib'ij:
—Ronojel iri kqab'ij ni che i ajawinel.
17Te'uri xkib'ij che ma Baruc:
—Chalapa chqe wach utz'ib'axik xa'an che ronojel iri.
18I ma Baruc xub'ij:
—Are ma Jeremías xub'ij ronojel chwe, yin xintz'ib'aj ru' tz'ajb'al chwach i b'orom tz'um.
19Te'uri xkib'ij che ma Baruc:
—¡Wo'or, yet xaq ma Jeremías jix chiwuwaj iwib', xaq lik mijun kretamaj ipa kixk'iji wi!
I ajawinel ma Joacim kunak' a' che i b'orom tz'um
20I nimaq taq ajpatanib' xkiya kan i b'orom tz'um pa ja ru' ma Elisama, chi ajtz'ib'anel re anoj, te'uri xe'e pa nim laj rachoch i ajawinel chub'ixkil ronojel che. 21I ajawinel xutaq ma Jehudí chuk'amik i b'orom tz'um pa ja ru' ma Elisama, chi ajtz'ib'anel re anoj, are ya xuk'am li ma Jehudí, xrajlaj uwach chwach i ajawinel, xaq chkiwach konojel i nimaq taq ajpatanib' chi kisutim rij. 22Che taq i ij le are i ub'elej ik', i ajawinel o chupam i tasaj re i ja re i alaj, chwach jun yab'al a'al chi kwon a' che. 23I ma Jehudí are kutzin chrajlaxik keb' o oxib' lemaj, i ajawinel le ku'at ru' jun kuchil, te'uri kuk'aq pan pa a' yab'al a'al chi kwon a' che. Keje xu'an ile k'a xuk'is nu b'i ronojel i b'orom tz'um. 24Mitene i ajawinel xaq i nimaq taq ajpatanib' chi xkita ronojel ni'pa kub'ij i b'orom tz'um le, xkixij ti kib' xaq xkik'ut taj we o taq jun k'ax pkik'ux. 25I ma Elnatán, ma Delaía xaq i ma Gemarías, lik xkitz'onoj utzil che i ajawinel chi kuk'at ti i b'orom tz'um, xwiri ire xkojon ti chke. 26Are xu'ano, xutaq ma Jerameel, chi lik rak'al i ajawinel, ma Seraías, chi uk'ojol ma Azriel, ma Selemías, chi uk'ojol ma Abdeel, chi kkimin i profeta ma Jeremías prexil, xaq i ma Baruc chi rajtz'ib'. Xwiri ike xeuwax rumal i Ajwal.
Ma Jeremías kutaq utz'ib'axik jun chik b'orom tz'um
27Chrijil chik uk'atik i b'orom tz'um rumal i ajawinel, chi o i tzij chupam chi ma Jeremías utaqom ma Baruc chutz'ib'axik, i Ajwal xlapan ru' ma Jeremías, xub'ij che: 28“Chak'ama chik jun b'orom tz'um xaq chatz'ib'aj chik chupam ronojel wach atz'ib'am te'eq chupam i nab'e, chi xuk'at ma Joacim, ajawinel re i Judá. 29Keje iri chab'ija che: Keje iri kub'ij i Ajwal: Yet xak'at i b'orom tz'um xaq xayaj ma Jeremías rumal utz'ib'am chupam chi ajawinel re i Babilonia, lik kk'un ni chusachik uwach i tinimit xaq lik nti chik winaq, chikop kuya kan chwach. 30Rumali, chi Yin in Ajwal, kinb'ij chawe ma Joacim, Ajawinel re i Judá, chi lik nti jun amuq axikin kk'iji ni pukub'ib'al ma David chi o u'ij. Are katkamik i ach'akul kmuq taj, lik kkanaj ni chwach i ij xaq chwach i chun tew re i cha'ab'. 31Yet, amuq axikin, xaq awajpatanib' kinya ni utojb'alil imak. Xaq kin-an na chi piwi yix, pkiwi konojel aj Jerusalén, pkiwi aj Judá, ktzaq ni ronojel i k'ax laj taq yob'il chi inb'im chik, chi xikoj ti retalil.”
32Are uri ma Jeremías xuk'am chik jun b'orom tz'um, xaq xuya che ma Baruc chi rajtz'ib', xutz'ib'aj ronojel wach xub'ij ire che, ke'eloq chi kutz'ib'aj ronojel wach utz'ib'am te'eq chupam i b'orom tz'um chi xuk'at ma ajawinel Joacim. Ma Jeremías xuya b'i uwi i tzij chi laj xaqjun ke'eloq.
Currently Selected:
Jerem%EDas 36: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
