Jerem%EDas 31
31
Kitzalijik li aj Israel pa kulew
1I Ajwal keje iri kub'ij: “Che taq i ij le Yin in ki-Dios konojel ni'pa i tzob'ajil aj Israel xaq ike je are ni intinimit.”
2I Ajwal keje iri kub'ij:
“Pa tz'inilik jyub' chaqij lik xink'ut i rutzil ink'ux
che i tinimit chi laj xkam chwach i ch'oj.
Are i aj Israel kkitzukuj te'eq jun k'ijib'al re ke'uxlanik,
3are uri Yin xink'ut wib' chinaj che ire.
Yin lik ronojel ij saq k'ax kixinna'o;
rumali chi lik kixinchajij ni ru' nim laj rutzil ink'ux.
4Katinyak chik, Israel.
Xaq kixk'un tan chik ru' i chilchil,
lik kixxajaw ru' i kikotemal.
5Xaq lik katik tan chik i uva
tzam taq jyub' Samaria,
i ni'pa i ketikawik,
lik kkiqusij ni uwach.
6Kuriqa ni jun ij chi i chajinelab'
kesik'in na li chwa taq jyub' re ma Efraín.
Chixwalijoq, chojel b'i puwi i Sion,
ipa o wi Qajwal Dios.”
7I Ajwal kub'ij:
Chixb'ixan ru' kikotemal rumal i tinimit re ma Jacob,
chi lik are mas o u'ij chkiwach i jub'an chik.
Lik ko chixb'ixanoq xaq chib'ij:
“I Ajwal xuto utinimit
chi k'a je k'as kan pa Israel.”
8Kixintzalijsaj chal che i k'ijib'al chi o pa moxab',
kinmol ni ichi' kixink'ama na li che i k'isb'al taq rokraq re uwach i jyub' ta'aj.
Xaq ku' ike le kepe ni i ketzun taj xaq i kejetz'pinik,
ixoqib' chi je raxwinaq xaq ni'pa i je alannaq chik;
¡lik je k'i i winaq ketzalij ni chaloq!
9Are kek'unik lik kelapan wu' xaq lik ke'o'ik.
Xaq keink'am nu b'i chi taq ralaxb'al ya,
xaq che jun b'e chi lik k'im uwach, man keje ile kkitakij ti kaqan.
Lik in kiqajaw aj Israel
xaq ma Efraín are nab'e wak'al.
10Nimaq taq tinimit, chita utzij i Ajwal,
xaq chitzijoj chuchi' taq mar naj:
I Ajwal xeukichersaj b'i aj Israel,
xwiri kumol ni kichi' xaq keuchajij na
pacha ku'an i ajyu'ul chij.
11Man i Ajwal xresaj utinimit ma Jacob chwach i kamik,
xresaj pu'ab' jun nim laj tinimit chi lik mas o ucho'ab'.
12Lik kekikot na kek'unik xaq keb'ixan ni chwi jyub' Sion,
xaq lik keb'ixan ni rumal i k'axnab'al uk'ux i Ajwal chi xuya chke:
Are i trigo, uwa'al uva muqb'am, aceite,
chij xaq i chikop.
Lik ke'on na pacha jun tikonb'al chi ja'talik
xaq lik kk'is ti chik kicho'ab'.
13I altom lik kekikotik kexajaw na,
xaq keje i alab'om xaq i rijab'.
Yin kinkub'saj ni kik'ux:
Kin-an ni che i ro'ej chi kikotemal na,
xaq kinya ni jun kikotemal mas nim chwach i k'ax.
14Kin-an na chi ajsujul sipon kkitij ni wa chi lik mas utz,
xaq intinimit kuqusij ni ronojel ni'pa kinya chke.
Yin in Ajwal, xinb'iw ile.
15I Ajwal kub'ij:
“Ktataj jun ch'awb'al pa tinimit Ramá
chi lik ko'ik.
Ile are ati Raquel chi ko' kumal i rak'al,
xaq kraj taj chi kkub'sax uk'ux
man je kamnaq chik rak'al.”
16Xwiri i Ajwal keje iri xub'ij che:
Ati Raquel, mato' chik,
me'el chik uwa'al awach,
man i k'ax chi at o wi le lik kya' ni utz chawe puk'exel:
I awak'al ketzalij chal che i tinimit chi ku'an ch'oj chawij.
Yin in Ajwal, xinb'iw ile.
17Matk'achirik chawoy-ej na man jun utz at roy-em pa k'aslemal,
man i awak'al ketzalij chali pkulew.
Yin in Ajwal, xinb'iw ile.
18Intom utinimit ma Efraín chi kejilawik:
“Yin in keje te'eq pacha jun ral me' chi mijun ktiki chupek'ik,
xwiri yet at tikinaq chwe;
cha'ana chwe chi kintzalij chik awu',
man yet at Wajwal Dios.
19Yin injek'om te'eq wib' awu',
xwiri xinjalwachij inno'oj
xaq lik kinya wib' chupam inmak,
xaq kinch'ay i wa' ru' in-ab';
lik kink'ix che xaq lik xqaj in-ij
rumal inmak chi xin-an pwak'alil.”
20I utinimit ma Efraín lik keje pacha jun wak'al chi lik k'ax kinna'o.
Are i wak'al ile chi lik k'ax kinna'o.
Tupu kinyajo,
lik ksach ti chink'ux,
i wanima lik ktujuwik,
lik kinna jun nim laj k'axnab'al k'uxij che.
Yin in Ajwal, xinb'iw ile.
21Ix, aj Israel, chikojo kan retalil ib'e,
man keje ile k'ax ti uriqik ki'an che;
chikojo retalil ib'e ipa xixik'aw wi.
¡Ix, aj Israel, chixtzalij chaloq,
chixtzalij chal pa nim laj itinimit!
22¿K'a junpa nawi kat-e chik che jun chik k'ijib'al,
pacha ku'an jun qelqel laj ali?
Yin, chi in Ajwal, innojim jun b'iroxik k'ak' chwach i jyub' ta'aji:
Jun ixoq are ire kutzukuj chik rachijil.
Kelik aj Israel chisaq k-on panoq
23I Ajwal, chi ronojel ktiki che, chi ki-Dios aj Israel, keje iri kub'ij: “Are keink'am chal utinimit ma Judá, xaq ike are je o tan chik pkulew xaq pkitinimit, keje iri kkib'ij na: I Ajwal chuya ni utzil chomal puwi i ch'am laj jyub'i ipa o wi i suk'ul laj atb'al tzij. 24I winaq aj Judá xaq i je aj pa taq kitinimit, ni'pa i ajtikanel xaq ajyu'ul i jalajuj taq chikop, kejeqi ni chila. 25Kinya ni k'i kiwa xaq kiya', ni'pa i je kosnaq chik xaq lik nti chik kicho'ab'.” Xcha.
26Are uri xk'un saq chinwach, xinjaq inb'a'wach. Lik chom i wachik' xin-ano.
27I Ajwal kub'ij: Kuriqa ni jun ij chi kin-an na chi winaq xaq i jalajuj taq chikop kek'iyar ni pa Israel xaq pa Judá. 28Keje pacha xin-ano chi lik xinyijb'a wib' chusachik uwach, chuyojik, chutzaqsaxik, chuwulijsaxik, xaq chu'anik ronojel i k'ax, keje ile kinyijb'a tan chik wib' chuyakik xaq chutikik. Yin in Ajwal, xinb'iw ile.
29Che taq i ij le kb'ix ti chik: I qajawxelab' kkitij i uva muqb'am ch'am, i kalk'uwal k-on ni k'ax kiware rumal. 30Man pachin jun kutij i uva muqb'am ch'am k-on ni k'ax uware rumal. Chkijujunal kekam ni rumal kimak.
31I Ajwal kub'ij: “Kuriqa ni jun ij chi kin-an ni jun trat k'ak' ku' aj Israel xaq ku' aj Judá. 32I trati keje taj pacha i trat chi xin-an ku' iwatit imam, are xinchap li che ki'ab' are xewesaj li pa Egipto; man ike xki'an taj pacha kub'ij intrat, tupu lik Yin in Kajaw. Yin in Ajwal, xinb'iw ile. 33Iri are i trat chi kin-an ku' aj Israel k-on panoq: Kinya ni in-atb'al tzij pkik'ux xaq pkijolom. Yin in ki-Dios na, xaq ike je intinimit na. Yin in Ajwal, xinb'iw ile. 34Rajwaxik ti chik chi kkik'ut taq chkiwach, chke i amiy, chke alk'uwal wach retamaxik uwach i Ajwal, man konojel, che ch'utiq che nimaq, kketamaj ni inwach. Yin kinkuy ni kimak, xaq ksach ni chink'ux ni'pa i mak atzalal chi ki'anom. Yin in Ajwal, xinb'iw ile.”
35I Ajwal chi xukoj i ij re ktzun pa'ij,
i ik' xaq i ch'umil re ktzun cha'ab',
chi xaq ku'an che i mar chi krojoj uretum i ya,
are ub'i ile Ajwal, chi ronojel ktiki che, kub'ij:
36“We xuriqa jun ij chi k-antaj taj
pacha i kub'ij i atb'al tzij le, chi inyijb'am,
che i ij uri le i tinimit Israel, intinimit ti chik.
Yin in Ajwal, xinb'iw ile.
37We o jun ij k-an tikilem chupajik i kaj
xaq we o jun ij k-ani tikilem chi ksolix ukub'ib'al i jyub' ta'aj,
are ij, uri, ile chi Yin keinxutuj aj Israel,
rumal ronojel ni'pa i ki'anom.
Yin in Ajwal, xinb'iw ile.”
38I Ajwal kub'ij: “Kuriqa ni jun ij chi i nim laj intinimit kyak tan chik, kjeqan li k'a che i tak'tik ja re ma Hananeel k'a chwach Uchija re i Ch'uk. 39I uchi' ulew le suk'ulik k-ek, kjeqan b'i chila k'a keuk'isa chwi jyub' Gareb, chila kkikotij b'i pa tinimit Goa. 40Ronojel uwa ta'aj ipa kemuq wi i kamnaq xaq kk'aq wi i chaj xaq ronojel ni'pa i ulew chi o rajsik i raqana Cedrón, k'a puch'uk i Uchija ke i Kaway, chila ipa kel wi li i ij, ronojel ile, lik cha'om chik chi lik we Yin, ronojel ile lik kwulijsax ti chik ronojel ij saq.”
Currently Selected:
Jerem%EDas 31: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
