Jerem%EDas 30
30
Usujunik i Ajwal re k-on panoq
1Are tzij iri xub'ij i Ajwal che ma Jeremías: 2“I Ajwal, chi ki-Dios aj Israel, keje iri kub'ij: Chatz'ib'aj chupam jun wuj ipa kub'ij wi ronojel ni'pa inb'im chawe. 3Kuriqa ni jun ij chi keink'am chali intinimit Israel xaq i Judá ipa je elnaq wi b'ik. Yin in Ajwal, xinb'iw ile. Xaq kin-an ni chke chi ketzalij chal chwach ulew chi xinya chke kiqajaw kichuch re kek'iji chwach.”
4Are tzij iri chi xub'ij i Ajwal chrij i Israel xaq i Judá. 5I Ajwal keje iri kub'ij:
¡Ktataj i sik' re xib'in ib',
re ti chomb'al ib'!
6Chitz'onoj pe
we jun achi kalax rak'al.
Man yin kwilo chi i achiyab' kkib'ak'ak'ej kib' ru' uk'axk'ol i k'ax
pacha taq uk'axk'ol chi kuna jun ixoq are kalanik,
xaq lik to' je saqt'ur.
7¡Lik knaqajab' ni ij chi lik k'ax,
jun ij chi lik nti chik jun pacha ile!
Lik are ni jun ij chi kuya jun nim laj b'is chke uwinaq ma Jacob;
xwiri yin kewesaj ni chwach i kamik.
8Yin in Ajwal, chi ronojel kintiki che, lik kinb'ij:
Kewesaj ni intinimit chwach i k'ax laj chak,
xaq ke'on ti chik winaq chi je o pa k'ax kumal aj naj.
9Xaq kki'an ni kipatan chwij yin, chi in Kajwal Dios, xaq kki'an ni kipatan chrij ma David chi kinya yin pa ajawinel chke.
I Ajwal kuto ni utinimit
10Yin, chi in Ajwal, kinb'ij:
Mixij iwib', uwinaq ma Jacob, chi wajpatan;
maxij awib' Israel,
man yet xaq i awak'al kixinto ni
che i k'ijib'al naj le ipa xixk'am wi b'ik.
Lik utz na kixk'iji'ik man o tan chik utz olem iwu', lik utz na kixk'iji'ik,
xaq lik mijun kixxib'iwik.
11Yin, chi in Ajwal kinb'ij,
chi in o iwu' re kixinto.
Kinsach ni kiwach konojel ni'pa i nimaq taq tinimit
ipa xixinkichersaj wi b'ik.
Xwiri yet kinsach ti awach;
xwi kinya utojb'alil chawe chrij pacha kmajawik,
Man lik to' ti ksach utojb'alil i amak.
12I Ajwal kub'ij:
I asokonik le lik kutzir ti chik.
I ayob'il lik nti chik kunb'al kmajaw che.
13Lik mijun kb'ison chiwe;
lik mijun kkunaw asokonik,
xaq lik kutzir ti chik.
14Konojel ni'pa i qus katkilo xatsach chkik'ux,
keb'ison ti chik chawe.
Man yin xin-an k'ax chiwe pacha taq yin in jun ajch'oj chiwij,
xinya i k'ax laj utojb'alil chiwe
rumal i k'iyal taq imak, xaq i k'iyal taq mak atzalal,
15¿B'uchak kixjilaw rumal uk'axk'ol isokonik?
I iyob'il lik kutzir ti chik,
rumal i k'iyal taq imak chi i'anom,
xaq i k'iyal taq mak atzalal,
rumali in-anom keje ile chiwe.
16Xwiri i jun chi kixukamsaj xaq kkamsax ni uri,
xaq konojel ni'pa i je ajch'oj chiwij ke'elsax nu b'i pa cho'ab' chwach kulew;
xaq kel-ax ub'itaq ke i jub'an chi kkel-aj ub'itaq iwe yix chi xaq kekel-aj ni jub'an chi kixkel-aj ni yix.
17Kinya chik rutzil iwach,
kwutzirsaj ni isokonik,
tupu lik kkib'ij i je ajch'oj chiwij:
“I tinimit Sion lik o'tam,
lik mijun kb'ison chik che.”
Yin in Ajwal, xinb'iw ile.
18I Ajwal kub'ij:
Kin-an chik utz che utinimit ma Jacob,
lik kwil ni tob'al uwach i nim laj kitinimit;
ni'pa i tinimit chi wulijnaq, lik kyijb'ax chik usuk',
xaq i rachoch i ajawinel lik kya' ni puk'ijib'al.
19Lik keb'ixan ni rumal tioxb'al re
xaq lik ketzen ni rumal i kikotemal.
Lik kek'is taj, man Yin kin-an na chi kpax ni kiwach
xaq kqajsax ti ki'ij man yin kinya ni ki'ij.
20I aj Israel ke'on tan chik pacha ujer;
i utinimit lik chinwach yin kk'iji wi xaq lik o ni ucho'ab',
xaq yin kinya ni utojb'alil chke i ajch'oj chrij.
21-22Lik chkixol kel wi jun aj-atzil,
jun chke ike aj-ok'al utzam i tinimit.
Kin-an ni che chi ktejeb' li wu' yin.
¿O nawi jun ktejeb' li wu' yin? Yix ni uri ix intinimit xaq yin uri in i-Dios.
Yin in Ajwal, xinb'iw ile.
23I roywal i Ajwal lik pacha jun nim laj jab' tew upam
xaq pacha jun kaqsut,
lik ku'an k'ax chke itzel laj taq winaq
24I roywal i Ajwal lik kik'aw taj,
lik k'a ku'an na wach i uch'ob'om.
Kuriqa ni jun ij chi yix
kita ni ub'e ronojel iri.
Currently Selected:
Jerem%EDas 30: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
