Jerem%EDas 32
32
I ma Jeremías kulo' jun ulew
1I Ajwal xch'aw che ma Jeremías che i ulajuj junab' che rajawinik ma Sedequías pa tinimit Judá, chi are uwajxaqlajuj junab' rajawinik ma Nabucodonosor. 2Che taq i ij le i achiyab' chi je yij che i ch'oj re i ajawinel re i tinimit Babilonia ketijin chu'anik ch'oj chkij i winaq aj Jerusalén; ma Jeremías, chi profeta, tz'apim chwaja ipa je o wi i chajinelab' chila pa nim laj rachoch i ajawinel. 3I ajawinel ma Sedequías xutaq utz'apixik ma Jeremías, rumal xub'ij: I Ajwal keje iri kub'ij: “Kin-an na chi i tinimiti ktzaq ni pu'ab' i ajawinel re i tinimit Babilonia, 4xaq i ajawinel ma Sedequías lik ktotaj ti chik pki'ab' aj Caldea man ktzaq ni pu'ab' i ajawinel re i Babilonia xaq lik keuk'utu ni rib' chwach. 5I ma Nabucodonosor kuk'am nu b'i ma Sedequías pa Babilonia, chila kkanaj wi k'a kinupon ni yin ru'. Tupu yix ki'an ch'oj chkij aj Caldea, xwiri ile nti uchak. Yin in Ajwal, xinb'iw ile.”
6Are uri ma Jeremías xub'ij: I Ajwal xch'aw wu' yin xaq xub'ij chwe: 7Chata pe', i ma Hanameel, chi rak'al awikan ma Salum, kk'un chusujuxik jun ulew chi o pa tinimit Anatot, ile o awe che chi kalo'o man lik je awachalal. 8Lik pacha xub'ij i Ajwal chwe, keje ile x-antajik, man i ma Hanameel chi rak'al i wikan, xk'un wu' chwaja ipa je o wi i chajinelab', xaq xub'ij chwe chi kinlo' i ulew le che chi o pa Anatot, chi ukwenta utzob'ajil ma Benjamín; yin lik o we che i ulew le man lik je wachalal. Are xinnab'ej chi ile utaqanik i Ajwal, 9-10xinlo' i ulew che ma Hanameel chi uk'ojol i wikan, xeinsik'ij jub'an ajsaqinel tzij, lik chkiwach ike xintoj wuqlajuj saqpwaq, xaq xin-an i juch' chwach i wuj re ulew le, xaq keje xki'an ike lik xki'an i kijuch' chwach i wuj le. 11Te'uri xink'am pan i keb' k'exwach re uwujil i ulew chi re i lo'onik, i jun o uk'exwach i b'aq re uwi in-ab' chwach re i lo'onik, chrij pacha kub'ij i atb'al tzij; xaq xink'am pan i jun chik uwujil ulew chi xaq xa k'exwach chik, chi xapachinoq utz krajlaj uwach. 12Te'uri xinya che ma Baruc, uk'ojol ma Nerías, chi ri umam ma Maasías, lik chwach i ma Hanameel, chi rak'al i wikan, xaq chkiwach i ajsaqinel tzij chi xki'an i juch' chwach i uwujil i ulew, xaq chkiwach konojel i aj Judío chi je kul chila chwaja ipa je o wi i chajinelab'. 13Lik chkiwach konojel ike le, xinb'ij che ma Baruc: 14“I Ajwal chi ronojel ktiki che, chi ki-Dios aj Israel, keje iri kub'ij: Chik'ama chekeb' uwujil i ulew, chi o uk'exwach i b'aq re uwi in-ab' chwach, xaq i jun chik chi xa k'exwach chi xapachinoq utz krajlaj uwach, te'uri chak'olo chupam jun ulew b'oj, man keje ile k'iyal junab' kuch'ijo. 15Man i Ajwal, chi ronojel ktiki che, chi ki-Dios aj Israel, keje iri kub'ij: Che i ulewi, i winaq kkilo' tan chik kachoch, kulew xaq kitikonb'al.”
Ulapanik i ma Jeremías ru' i Dios
16Chrijil chik uya'ik i uwujil i ulew chi re lo'onik che ma Baruc, chi uk'ojol ma Nerías, are uri xin-an jun lapanik chwach i Ajwal: 17Yet, Ajwal, ru' i nim laj acho'ab' xa'an i kaj xaq i ulew. Lik nti jun b'iroxik we kattiki ti yet chu'anik. 18Yet kak'ut i k'axnab'al ak'ux chke i k'iyal taq lemajil, xwiri xaq kaya utojb'alil chke i winaq rumal kimak kiqajaw kichuch. ¡Ajwal Dios, nim a'ij xaq nim i acho'ab', ab'i yet are iri: Ajwal chi ronojel kattiki che! 19I ach'ob'onik yet lik nim, xaq lik nim acho'ab' chu'anik. Yet lik kawilo wach kki'an konojel i winaq, xaq lik chkijujunal kaya utojb'alil chke chrij wach i kki'ano. 20Yet xa'an nimaq taq anik xaq nimaq taq il chila pa Egipto, xaq k'a arewi ka'an pa Israel xaq chkixol konojel i winaq, rumali i ab'i lik o u'ij, xaipa kkuxtax wi. 21Yet, Ajwal, ru' i nim laj a'ij xaq ru' acho'ab' xeawesaj li atinimit Israel pa Egipto, ru' nimaq taq anik xaq ru' nimaq taq il, xapetsaj jun nim laj xib'rikil chke ni'pa i je o chila. 22Chke aj Israel xaya ulewi ipa klemem wi uwa'al kab' xaq i leche pacha taq ya, chrij pacha xasujuj chke i katit kimam. 23Xwiri ike le are xeupon che i nim laj tinimit, xekojon ti chawe xaq xkikoj ti retalil chawe wach i xab'ij chke, xaq xki'an taj wach i xeataq chu'anik; rumali yet xataq li i k'ax laj yob'ili pkiwi.
24Rumali wo'or i aj Caldea, ki'anom elb'al b'ik anb'al ch'oj chrij i nim laj tinimit. I nimaq taq ch'oj, wa'jal, xaq i itzel laj taq yob'il, kki'an na chi ronojel i nim laj tinimit ktzaq pki'ab' i je ajch'oj chkij. Ajwal, Yet kawilo chi ktijin u'antajik ronojel ni'pa i ab'im. 25Xwiri, Yet Ajwal, Yet xinataq che chi kinlo' i ulew xaq lik chkiwach i ajsaqinel tzij, tupu i tinimit ktzaq pki'ab' aj Caldea.
26Are uri i Ajwal xula' uwach che ma Jeremías: 27Yin in Ajwal Dios ke konojel ni'pa i o kik'aslemal. Lik nti jun b'iroxik we kintiki ti Yin chu'anik. 28Rumali chi Yin kinb'ij chawe: Kin-an na chi i nim laj tinimiti ktzaq ni pu'ab' ma Nabucodonosor, ajawinel re i Babilonia xaq ke aj Caldea. 29I aj Caldea chi kki'an ch'oj chrij i nim laj tinimit, lik ke'ok nu b'i chupam xaq kkinak' ni a' che; kkinak' ni a' che junam ru' i ja chi je o li k'a puwi, chila ipa kkiporoj wi pom che i tiox Baal xaq kkisujuj uwa'al uva muqb'am chke i tiox chi etamam ti kiwach, kki'an ile qajsab'al in-ij. 30Lik chuxeb'al loq i tinimit Israel xaq i tinimit Judá lik kki'an ile chi tzel kwil yin; i aj Israel kimayim ti uqajsaxik in-ij ru' ukojik ki'ij i tiox chi xa je are ike je anawnaq. Yin in Ajwal, xinb'iw ile. 31I tinimit le, lik k'a che taq ij are xjeqan u'anik k'a arewi wo'or, lik xwi umi'sam i woywal, rumali chi kinsach uwach, 32ru' ronojel ni'pa uqajsaxik in-ij chi ki'anom, rumal ni'pa i utz taj chi i tinimit Israel xaq i tinimit Judá, xaq i kajawinelab', kaj-atzil, kajsujul sipon, profeta xaq konojel ni'pa i winaq chi je jeqel pa Judá xaq pa Jerusalén. 33Kiya'om uchel kij chwe, are ti kipalaj kiya'om chwe. Tupu lik mijuyak inmayim taq uya'ik i k'utunik chke, xwiri lik kikojom ti retalil xaq je kojonnaq ti chwe. 34Xaq lik i'anom ch'am taj che i wachoch chi isujum chwe Yin, man chila iya'om wi i ch'am ti laj taq itiox. 35Xaq xiyijb'a sujb'al sipon che i tiox Baal chila chwa ta'aj Ben-hinom, xaq chila xiporoj wi iwak'al chwach i tiox Moloc. Rumal ile ki'an che i tinimit Judá chi kmakunik, ile are b'iroxik chi tzel kwil yin, ile xixintaq ti chu'anik, xaq mitene xik'aw taq pinjolom.
Sujunik re i k-on panoq
36Yin in Ajwal, chi ki-Dios aj Israel, kinb'ij iri chrij i nim laj tinimiti chi kab'ij yet, chi ktzaq ni pu'ab' i ajawinel aj Babilonia, rumal i nimaq taq ch'oj, wa'jal, xaq itzel laj taq yob'il. 37Kinmol ni kichi' konojel ni'pa i winaq pa taq jalajuj taq tinimit ipa xeinkichersaj wi b'ik, are xmi' jun nim laj woywal, te'uri keintzalijsaj chal che i k'ijib'ali, man keje ile lik utz na kek'iji chwach. 38Ike ke'on ni intinimit xaq Yin kinu'on ni ki-Dios. 39Kin-an na chi xaqjun ni kich'ob'onik, man keje ile kkikoj ni in-ij Yin, xaq utz ni ke'el ru' kik'aslemal ike xaq ke i kak'al ronojel ij saq. 40Kin-an ni jun trat ku' chi ronojel ij saq uwach: Lik kinya wib' chuxe' chi lik kinmayij ti u'anik i utz chiwe, xaq lik kin-an ni chiwe chi lik kpe jun nim laj urayijb'al ik'ux chukojik in-ij man keje ile lik kijek' ti iwib' wu'. 41Yin lik kinkikot ni chu'anik i utz chiwe, lik ru' ronojel ink'ux, xaq lik ru' saqil k'uxij, kinya ni chiwe chi kixjeqi che i nim laj tinimiti.
42I Ajwal xub'ij chik: “Keje pacha utaqik i k'ax laj taq yob'il xin-an puwi i tinimiti, xaq keje utaqik li ronojel ni'pa i b'eyomal chi insujum chiwe. 43Che i nim laj tinimiti chi kab'ij yet chi kkanaj pacha jun tz'inilik jyub' chaqij, chi lik nti winaq xaq nti chikop chwach, chi xaq xab'ij chi ktzaq pki'ab' aj Caldea, xaq kkilo' ni chik kulew. 44Klo' na xaq kki'an ni uwujil, kok ni uk'exwach b'aq re uwi ab'aj chwach, xaq i juch' ke i saqinel tzij. Iri kk'ulmax ni prulew ma Benjamín, chrij chwach i Jerusalén, xaq pa tinimit Judá, xaq tzam taq jyub' xaq chwa taq ta'aj, xaq pa tinimit re i Neguev, man Yin keink'am chal che i k'ijib'ali ni'pa i je k'amtal b'ik. Yin in Ajwal, xinb'iw ile.”
Currently Selected:
Jerem%EDas 32: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
