Jerem%EDas 29
29
Ma Jeremías xutaq b'i wuj chke i winaq chi xe'elsax b'i pa cho'ab' chwach kulew
1-2Chrijil chik relik b'i i ajawinel ma Jeconías chi je elsam te b'i pa cho'ab' chwach kulew, junam ru' uchuch, ku' ni'pa i kki'an kipatan xaq i je aj-atzil chi je aj Judá, xaq ke aj Jerusalén, aj-anol taq ulew laq xaq jalajuj taq b'iroxik re chapb'al xaq ajch'ayol ch'ich'. I ma Jeremías chi profeta, xutaq b'i ub'ixkil i tziji chwach jun wuj, chi xutaq b'ik are o te'eq pa Jerusalén; xutaq b'i chke i rijab' chi k'a je k'aslik, chke ajsujul sipon, chke i profeta xaq chke konojel i winaq, chi xeuk'am b'i ma Nabucodonosor pa Babilonia. 3I wuj le are ma Elasa xejachawoq, chi uk'ojol ma Safán, xaq ma Gemarías, chi uk'ojol ma Hilcías. Are ma Sedequías ajawinel re i tinimit Judá xetaqaw b'i pa Babilonia re ke'elb'ej chwach ma Nabucodonosor chi ajawinel re i tinimit Babilonia. I wuj keje iri kub'ij:
4Keje iri kub'ij i Ajwal, chi ronojel ktiki che, chi ki-Dios aj Israel, konojel i winaq chi xewesaj b'i Jerusalén, xeik'am li chi Babilonia: 5Chiyaka iwachoch, chixjeqel chupam, chitika k'iyal taq uche'lal echa' xaq chitija uwach. 6Chixk'ulanoq, chalax ni iwak'al alab'om xaq altom, xaq ike le chek'ulanoq xaq chalax ni kak'al xaq lik chixk'iyaroq, lik mix-ob'ik. 7Lik chi'ana che i k'ijib'al ipa kixk'am wi b'ik lik o ni chomb'al ib', lik chitz'onoj chwe yin puwi, man we o chomb'al ib' che i k'ijib'al le xaq o ni chomb'al ib' uri iwu' yix. 8Yin in Ajwal, chi ronojel kintiki che, chi ki-Dios aj Israel, lik kinb'ij iri chiwe: Mixt'ortaj kumal i ajt'oronel laj taq profeta xaq kumal ajnanel chi je jeqel chixol; mikoj taq retalil i kachik' chke. 9Ni'pa kkitzijoj ike pinb'i yin, ile xa nojim tzij. Yin nti je intaqom b'ik. Yin in Ajwal, xinb'iw ile.
10I Ajwal kub'ij: I tinimit Babilonia are kutz'aqatsaj lajuj oxwinaq (70) junab', kink'un ni iwu' xaq kin-an ni i utz laj sujunik chi in-anom chiwe, chi kin-an chiwe chi kixtzalij chal che i k'ijib'ali. 11Yin weta'am wach inch'ob'om chiwe yix, lik jun ch'ob'onik chi lik utz ke'eloq, re kinyab'ej jun utz laj roy-exik chiwe. Yin in Ajwal, xinb'iw ile. 12Are uri yix kinikuxtaj kininataj xaq kixlapan ni wu' yin, i yin kixinta na. 13Kinitzukuj na xaq kiniriq na, man lik ru' ronojel ik'ux kinitzukuj na. 14Yin in Ajwal, kinb'ij iri: Kin-an na chi yix kiniriqo xaq kin-an na chi kixtzalij chali ipa xixel wi b'ik, yin kinmol ni ichi' xaq kixink'ama na li pa nimaq taq tinimit ipa ix inkichersam wi b'ik; xaq kixintzalijsaj chal che i k'ijib'al ipa xixwesaj wi b'ik.
15Yix keje iri kib'ij: “I Ajwal uya'om profeta chqe pa tinimit Babilonia.” 16I Ajwal keje iri kub'ij chrij i ajawinel chi kul pukub'ib'al ma David chi o u'ij, xaq chkij i winaq chi je jeqel waral pa nim laj tinimiti, chi je iwachalal yix, chi xe'elsax tu b'i iwu' are xixelsax b'i yix pa cho'ab' chwach iwulew. 17Yin in Ajwal chi ronojel kintiki che kinb'ij: Kintaq li ch'oj, wa'jal xaq k'ax laj taq yob'il piwi. Kin-an ni chiwe pacha i higo chi aynaq chik, lik utz ti chik ktijawik. 18Lik kin-an ni chiwe chi kixinterb'ej ru' nimaq taq ch'oj, wa'jal xaq ru' k'ax laj taq yob'il. Kin-an na chi konojel i winaq re uwach i jyub' ta'aj kixkil na pacha taq ix xib'inel, xaq kin-an ni chiwe chi kixtzaq ni chupam i k'ixb'alil, yo'yanik xaq i k'oqonik che ronojel i nimaq taq tinimit ipa ix inkichersam wi b'ik. 19Man xikoj ti retalil are xb'ix chiwe chuxe'el kumal i kki'an kipatan chwij chi je profeta, chi lik k'iyalmul xeintaq chub'ixkil xwiri yix xixkojon taj. Yin in Ajwal, xinb'iw ile. 20Chixkojon che intzij, iwonojel yix chi xixwesaj b'i pa Jerusalén chi xix-e pa Babilonia.
21I Ajwal chi ronojel ktiki che, chi ki-Dios aj Israel, keje iri kub'ij chrij ma Acab, chi uk'ojol ma Colaías, xaq chrij ma Sedequías, chi uk'ojol ma Maasías, chi kkib'ij b'iroxik qatzij taj chiwe yix pub'i i Ajwal: “Kin-an ni chke chi ketzaq pu'ab' ma Nabucodonosor, chi ajawinel pa Babilonia, xaq ire keukamsaj ni chiwach yix. 22Man keje ile ni'pa i je k'amtal b'i pa Judá chi je o pa Babilonia are kkaj uk'oqoxik jun chke, kkib'ij ni keje iri: I Ajwal chu'ana ni chawe yet pacha xu'an che ma Sedequías xaq che ma Acab, chi xek'at pa a' rumal i ajawinel re i tinimit Babilonia. 23Are kik'ulmaj ile rumal u'anik b'iroxik chi lik utz taj pa Israel: Man ximin iwib' ku' winaq chi je k'ulinaq ti iwu', xaq ku' kixoqil i jub'an chik, xaq xinojij tzij pinb'i yin chi ix intaqom ti chub'ixkil. Yin lik weta'am ile. Yin in Ajwal, xinb'iw ile.”
Utzijoxik tzij che ma Semaías
24I Ajwal xutaq ma Jeremías, chi kub'ij che ma Semaías chi aj Nehelam: 25I Ajwal chi ronojel ktiki che, chi ki-Dios aj Israel, keje iri kub'ij: “Yet xataq b'i jun wuj chke konojel i winaq chi je o pa tinimit Jerusalén xaq che ajsujul sipon, chi ma Sofonías, chi uk'ojol ma Maasías, xaq chke i jub'an chik ajsujul sipon. Chupam i wuj xab'ij che ma Sofonías: 26I Ajwal at ukojom re ajsujul sipon puk'exel ma Joiada, man at uya'om re aj-atzil re kachajij i rachoch i Ajwal. We o taq jun ch'uj chi kujeq lapanik pacha taq jun profeta, are uri rajwaxik chi yet chak'ama b'i prexil xaq kayut' chwach che' ru' karena. 27¿B'uchak, ut, a'atim ti ma Jeremías, chi aj Anatot, chi lik ch'awnaq pacha taq jun profeta chiwach yix? 28Xwi ta la ile, xaq xutaq li jun wuj chqe yoj chila Babilonia, chi keje iri kub'ij: I elik b'i pa cho'ab' chwach ulew lik k'iyal junab' kuch'ijo xaq utz chiyaka iwachoch chixjeqel chupam, chitika k'iyal taq che' chi ktijaw uwach xaq chitija uwach.”
29I ajsujul sipon, chi ma Sofonías, xrajlaj uwach i wuj che ma Jeremías. 30Are uri i Ajwal xub'ij che i profeta: 31Chataqa ub'ixkil chke ni'pa je elsam b'i pa cho'ab' chwach kulew, chi Yin in Ajwal, kinb'ij: Rumal ma Semaías aj Nehelam lapannaq pinb'i yin, chi intaqom tu b'ik xaq ix ut'orom ru' b'iroxik chi qatzij taj, 32Yin, chi in Ajwal, kinb'ij chi kinya ni utojb'alil che ma Semaías xaq chke umuq uxikin. Lik nti umuq uxikin chuxol intinimit, xaq kuqusij ti kikotemal chi kinya che intinimit, man ru' utzij le xu'an che intinimit chi jun ajch'oj chwij. Yin in Ajwal, xinb'iw ile.
Currently Selected:
Jerem%EDas 29: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
