Jerem%EDas 21
21
Utzijoxik i tojb'alil puwi i Jerusalén
1-2I ajawinel ma Sedequías xutaq b'i ma Pasur, chi uk'ojol ma Malquías, xaq i ajsujul sipon, chi ma Sofonías, chi uk'ojol ma Maasías, chrilik ma Jeremías xaq chub'ixkil che: “Cha'ana utzil chqe, chatz'onoj che i Ajwal pqawi, man i ma Nabucodonosor, ajawinel re i Babilonia, ktijin chu'anik ch'oj chqij. I Ajwal moqxa kraj ku'an jun nim laj il, xaq kutaq ma Nabucodonosor chujek'ik rib' chu'anik ch'oj chqij.”
Are uri i Ajwal xch'aw che ma Jeremías, 3rumali ma Jeremías xub'ij chke i je utaqom li ma Sedequías: Chib'ij che ma Sedequías 4chi i Ajwal, ki-Dios aj Israel, kub'ij: Kin-ano chi ketzalij b'i je awajch'oj chi je are i achiyab' chi je yij che i ch'oj, chi kisutim chik rij i tapial nim uwach re kki'anb'ej ch'oj chrij i ajawinel re i Babilonia xaq chkij aj Caldea, xaq kinmol ni kichi' pa nik'aj che i nim laj tinimit. 5Xaq lik yin na kin-an ni ch'oj chiwij yix, ru' i nim laj cho'ab' xaq ru' nim laj oywal. 6Keinkamsaj ni konojel ni'pa je jeqel chupam i nim laj tinimiti, winaq xaq i chikop kekam ni rumal jun itzel laj yob'il. 7Te'uri kinjach ni ma Sedequías, chi ajawinel re i tinimit Judá, pu'ab' ma Nabucodonosor, xaq pki'ab' i jub'an chik ajch'oj chrij, junam ku' i kaj-atzil, xaq i je ajch'oj xaq i winaq chi xek'asi kan pa nim laj tinimit chrijil chik itzel laj yob'il, chrijil chik i ch'oj xaq chrijil chik i wa'jal. Yin kin-an na chi kekamsax ru' ch'ich' chi k'ulala o uware, chi lik k-il ti pich' tob'al kiwach. Yin in Ajwal, xinb'iw ile.
8Xaq chatzijoj che i tinimit chi yin in Ajwal, kinb'ij iri: Kinya chiwe chi ki'ul i b'e re i k'aslemal xaq re i kamik, pachike kiwaj yix che. 9I jun chi kkanaj kan pa nim laj tinimiti kkam ni pa ch'oj, we ntaj rumal wa'jal kekam ni che numik, xaq we ntaj rumal i itzel laj yob'il. Xwiri i jun chi kel loq xaq kujach rib' chke aj Caldea chi ketijin chu'anik ch'oj chrij i nim laj tinimit, kkam ti uri; ktiki ni uri chuto'ik uk'aslemal. 10Man yin inch'ob'om chik uk'amik li i utz taj puk'exel i utz puwi i nim laj tinimiti. Kinjach ni pu'ab' i ajawinel re i tinimit Babilonia, ire lik kunak' ni a' che. Yin in Ajwal, xinb'iw ile.
Tzijonik chrij i ajawinel aj Judá
11-12Ix aj chi rachoch i ajawinel aj Judá xaq yix chi ix aj chi rachoch i ajawinel ma David, chib'ij iri pinb'i yin:
Chita utzijonik i Ajwal: Man keje iri kub'ij i Ajwal:
Chi'ana i suk'ul laj atb'al tzij ronojel ij,
xaq chiwesaj i nti ucho'ab' pu'ab' i k-anaw k'ax che,
man moqxa rumal i utz ti ki'ano,
kwalij jub'an woywal pacha jun a'
kjuluwik chi lik mijun ktiki chuchupik.
Utzijoxik i tojb'alil puwi i Jerusalén
13Tinimit chi katajawin puwi i ta'aj,
pacha at nimaq taq ab'aj chwa ta'aj,
yin in Ajwal, lik kinsaqij chi kinch'ojin ni chawij.
Yix kib'ij: ¿Pachin wa ku'an ch'oj chqij?
¿Pachin wa ktiki che uponik k'a che i k'ijib'al ipa kqato wi qib'?
14Yin kinya ni utojb'alil chiwe, pacha kmajaw che i utz taj chi xi'ano,
kinnak' ni a' che ik'achelaj,
i a' le kuk'at nu b'i ronojel chrij chwach.
Yin in Ajwal, xinb'iw ile.
Currently Selected:
Jerem%EDas 21: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
