Jerem%EDas 11
11
Uqelik i trat
1I Ajwal xch'aw chwe yin, chi in ma Jeremías, xub'ij chwe: 2“I aj Israel chkikojo retalil i tziji re i trat. Chatlapan ku' i winaq aj Judá xaq ku' ni'pa je jeqel pa Jerusalén. 3Chab'ij chke chi Yin in Ajwal, chi i Dios ke aj Israel, lik kinsaqij chi kink'oqoj i jun chi kkojon ti che i tzij re i trati. 4Are i trat chi xin-an ku' i katit kimam are xewesaj li pa Egipto, chi are te'eq jun nim laj tinimit chi pacha jun orno ipa kyayursax wi i ch'ich' chke ike. Xinb'ij chke: Chixkojon chwe, chi'ana ronojel ni'pa kixintaq che, man keje ile yix ni uri ix intinimit xaq Yin in i-Dios. 5Yix we kikoj retalil chwe, yin kin-an ni uri ni'pa xinb'ij chke iwatit imam, chi kinya i ulew, chi are ulew chi ipa ix jeqel wi wo'or, chila ipa o wi i leche xaq i uwa'al kab' chi lik kk'is taj pacha i ya.”
Yin xinla' uwach che, “Utzi', Ajwal.”
6Are uri i Ajwal xub'ij chwe: “Chatzijoj i tzijoniki pa taq tinimit re i Judá xaq pa taq b'e re i Jerusalén. Chab'ij chke i winaq: Chitatb'ej i tzij re i trati xaq chi'ana wach kub'ij. 7Are xewesaj li iwatit imam pa Egipto, lik xinb'ij chke chi lik chekojon chwe, lik k'a arewi wo'or kintijin chub'ixkil chke. 8Xwiri xkikoj ti retalil chwe xaq xekojon ti chwe, are i xki'ano xkiya kib' che kib'uyil chu'anik i utz ti laj urayijb'al kik'ux. Xkaj ti u'anik wach kub'ij i tzij chi yin xeintaq che, rumali xin-an chke chi xpe i utojb'alil pkiwi chi tzijojtal chupam i trat.”
9I Ajwal lik xub'ij chik chwe: I winaq je aj Judá xaq ni'pa i je jeqel pa Jerusalén kkaj u'anik ch'oj chwij yin. 10Xetzaq chik chupam i mak atzalal chi xki'an i katit kimam ujer, ike xkaj ti xekojon chwe, xa xeterej chkij i jub'an chik dios xaq xkikoj ki'ij. I aj Israel lik xaqjun kipalaj ku' aj Judá kiqelom i trat chi xin-an ku' i katit kimam. 11Rumali kintaq b'i jun nim laj k'ax piwi, chi lik kixtotaj ti chwach. Tupu lik kixsik'in chutz'onoxik itob'al chwe lik kixinta taj. Yin in Ajwal, xinb'iw ile. 12Are uri i winaq aj Judá xaq ni'pa i je jeqel pa Jerusalén ke'e ni chutz'onoxik kitob'al chke i dios chi kporox pom chkiwach, xwiri ike ketiki ti chkito'ik are kupon i k'ax pkiwi. 13I je aj Judá lik k'i i dios o ku' keje pacha nimaq taq tinimit, xaq ni'pa i je jeqel pa Jerusalén kiyakom k'iyal taq sujb'al sipon, porb'al re pom chwach i tiox Baal, keje pacha k'iyal taq b'e chi o pa nim laj tinimit. 14Rumali yet ma Jeremías, ma'an i tz'onb'enik chwe tob'al ke i tinimit le; lik match'aw taq chkij are je o pa k'ax man yin keinta taj are kkitz'onoj taq kitob'al chwe are je o chupam i k'ax.
15I je aj Israel chi k'ax kixinna'o, ¿Wach kitzukuj pwachoch
chrijil chik u'anik i k'iyal taq b'iroxik chi utz taj?
¿Kich'ob' b'a taq wa yix chi ru' usujuxik i xepu xaq i ti'ij chinwach re isipon,
kujek' taq rib' i k'ax iwu',
xaq kixtotaj ni chwach i k'ax?
16U'onom loq yin in Ajwal inya'om te'eq pib'i chi ix “olivo rojrik uxaq,
xaq lik chom ch'uych'ik uwach.”
Xwiri wo'or chupam uch'awb'al i ray,
kinporoj ni uxaq,
xaq lik ktoqow ni u'ab' i che' le.
17Yin in Ajwal chi ronojel kintiki che, chi xattikawik, intaqom uqajik i k'ax pawi rumal i mak atzalal chi ki'anom i aj Israel xaq aj Judá, man kiqajsam in-ij rumal kkiporoj pom chwach i dios Baal.
I je ajch'oj chrij ma Jeremías kkaj ukamsaxik
18I Ajwal xuya retamaxik chwe chi i je ajch'oj chwij ketijin chuch'ob'ik jun utz taj chwij. Are ire xjaqaw inb'a'wach re kwetamaj wach ketijin chuch'ob'ik. 19Yin lik utz te'eq in olik, pacha jun ral chij chi kk'am b'i pa kamsab'al re, weta'am taj chi ketijin chuch'ob'ik wach kki'an chwe. Kkib'ij: Chqak'atzij i che' wo'or chi lik o ucho'ab'; chqamich'a chwach i jyub' ta'aj chkixol i je k'aslik, man keje ile lik mijun kk'un chik i che' le chuk'ux.
20Xwiri yet, Ajwal chi ronojel kattiki che,
at suk'ul laj atol tzij;
yet lik aweta'am wach kuch'ob' i winaq puk'ux.
Chak'utu chwe wach uya'ik utojb'alil ka'an chke i winaq le,
man pa'ab' yet xinya wi i tojb'alil chi xintz'onoj.
21I achiyab' aj Anatot chi kkitzukuj te inkamsaxik xaq kkib'ij chwe chi kinlapan ti pub'i i Ajwal, we kwaj taj kinkikamsaj, 22i Ajwal chi ronojel ktiki che kub'ij chke: “Are utojb'alil iri kinya piwi: I k'ojolab' kekam ni pa taq ch'oj, i ak'alab' alab'om xaq i altom kekam ni rumal i numik. 23Lik mijun chik kkanaj kan chke i ak'alab' le, man kuriq ni jun ij chi Yin kinya i utojb'alil piwi, yix chi ix achiyab' aj Anatot, kink'am na li k'ax laj taq yob'il piwi.”
Currently Selected:
Jerem%EDas 11: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
