Santiago 4

I k'axnab'al k'uxij ke i winaq

1¿Ipa kpe wi ch'oj chixol yix? Are utz ti laj urayijb'al ik'ux chi lik arewi kch'ojin pik'ux. 2Yix o i kiwaj, xwiri, kya' ti chiwe, rumali kixkamsanik. Lik o i kirayij, xwiri, kixtiki ti churiqik, rumali kpe i ch'oj chixol. Kya' ti chiwe wach i kirayij, man kitz'onoj ti che i Dios. 3Xaq are kitz'onoj, kya'taj ti chiwe, man utz ti kitz'onoj; xa re irayijb'al yix kitz'onoj. 4Winaq chi ix suk'ul taj chwach i Dios. ¿Iweta'am ti b'ari yix, chi we xa k'ax kina i to' re uwach i jyub' ta'aj, tzel uri kiwil i Dios? Pachin i xa k'ax kuna i to' re uwach i jyub' ta'aj, ke'eloq xa ajch'oj uri ru' i Dios. 5Rumali lik kub'ij Uwuj i Dios ujer: “I Dios lik k'ax kuna i utewal chi o pqanima pacha jun winaq selos.” 6I Dios lik kojuto rumal i rutzil uk'ux chqe. Xaq keje iri kub'ij uwuj Ire: “I Dios keu'atij i kki'an nim che kib', xwiri ni'pa i kki'an ti nim che kib', i Dios keuto rumal i rutzil uk'ux chke”; keje ile tz'ib'talik.#4.6 Proverbios 3.34 (gr.). 7Rumali, chiya iwib' pu'ab' i Dios. Chi'atij itzel, xaq ire k-anmaj uri chiwach. 8Chixtejeb' ru' i Dios, xaq Ire ktejeb' uri iwu' yix. Yix chi ix ajmak, chiwo'taj kan i utz taj. Yix chi kib'ij chi k'ax kina i Dios, xwiri xaq k'ax kina i to' re uwach i jyub' ta'aj, chijos-ij uri iwanima. 9Chixb'isonoq, chixo'oq, k'ax chuna ik'ux rumal imak i'anom. Are itzej, chijalwachij che o'ej; are ikikotemal, chijalwachij che i b'is. 10Chi'ana ajaj laj taq winaq che iwib' chwach i Ajwal, xaq Ire lik kuya i'ij.

11Ix, wachalal chwach i Cristo, mich'ach'a iwachi'il chiwach. Pachin kuch'ach'a jun rachi'il, o we ku'at tzij puwi wach u'anom, ke'el uri chi ktijin chuch'ach'axik i atb'al tzij re i Dios; ke'eloq pacha kub'ij chi i atb'al tzij re i Dios utz taj.#4.11 Man i utzij i Dios kub'ij: “Chiwaj iwib' chiwach”; keje ile tz'ib'talik. Are ti ichak yix ile chi ki'at tzij; are ichak yix are chixkojon che i atb'al tzij,#4.11 Cf. Mateo 7.1-2; Lucas 6.37-38; Romanos 14.4. 12Man xwi i Dios chi yawnaq i atb'al tzij, xwi Ire o pu'ab' ku'at tzij puwi jun winaq. Are Ire o pu'ab' we kojuto o kojuya pa tojpen. Xwiri, yet ¿At pachinoq chi ka'at tzij puwi jun winaq?

Utz taj kqa'an jun ch'ob'onik we qa'anom nim che qib'

13Chita iri: O jujun chiwe chi kkib'ij: “Wo'or, o chweq, koj-e che i tinimit; chila kojk'iji wi jun junab'. Chila kqa'an ni qak'ay, kqach'ak ni uk'iyal qapwaq”; kecha. 14¿Xatab'a qeta'am wach i kqariq chweq? Qeta'am taj. ¿Wach unimal i qak'aslemal? Nti unimal. Keje pacha i mayuy, xa jo'taj tan olik, te'uri ksachik. 15Are i o uchak kib'ij, keje iri: “We kraj i Ajwal, oj k'as chweq, xaq kqa'an uri wach i qach'ob'om.” 16Xwiri yix keje ti ile kib'ij; yix lik nim i kixch'awik, ile utz taj. 17Are i reta'am u'ankil i utz i ku'an taj, ajmak laj winaq uri ke'eloq.

Currently Selected:

Santiago 4: ACHICUB

Highlight

Compare

Copy