Santiago 3

Tzij chi kub'ij qachi'

1Ix, wachalal chwach i Cristo, moq ix k'i kirayij ki'an ix tijonelab' che iwib'. Xwiri iweta'am, yoj chi oj tijonelab' o chqaqul ni'pa uchak i Dios. We utz ti kqa'ano, mas nim i qamak kel chwach i Dios, chkiwach ike chi je tijonelab' taj. 2Qonojel olik kojmakunik. We o jun nti umak ku'ano ru' wach taq i kub'ij, lik nti umak uri chwach i Dios, lik suk'ul uri, man ktiki chu'atixik ronojel uch'akul. 3Jun kaway, kkoj jun tak'b'al re puchi',#3.3 Freno, kb'ix che. pek'b'al re, keje ile ku'ano pacha i kqaj yoj, xaq kojuk'am b'ik xaipa kqaj koj-e wi. Keje ile kojtiki chu'atixik ronojel uch'akul. 4Xaq keje jun nim laj barco. O jun k'amb'al ub'e che,#3.4 Timón, kb'ix che. rumali ktiki i rajaw chupek'ik xaipa kraj k-e wi. Nti k-ono we nim i tew chwi ya chi kretz'b'ej i barco, i rajaw ktiki chupek'ik ru' i ral k'amb'al ub'e le. 5Xaq keje utzam qa' ile. Nim taj, xwiri olik nim i k'ax ku'ano, nim i tzij kub'ij. Keje pacha i a', tupu xa jub'i' kjeqanik, nim i kuk'ato; lik ktiki chuporoxik uk'iyal che'. 6Qeta'am chi utzam qa' keje pacha jun a'. Rumal utzam qa', lik k'i i utz ti laj taq tzij kqab'ij, rumali, kojumin chupam i utz taj. I utzam qa' kjuluw ru' i a' chi lik ru' itzel petnaq wi; kojumin pa k'ax, kojumin pa a'. 7Yoj kojtiki chkipek'ik xab'i chi chikopil chwach i jyub' ta'aj: Itzel chikop, tz'ikin, kumatz, kar; is kojtiki chke. 8Xwiri i utzam qa' kojtiki ti chupek'ik. I utzam qa' keje pacha jun kumatz nojnaq che b'enen, xapachinoq ktiki chukamsaxik. 9Ru' utzam qa' kqakoj u'ij i Qaqajaw Dios, xaq ru' i utzam qa' keqak'oqoj i winaq chi je u'anom i Dios pacha ktzun Ire.#3.9 Génesis 1.26-27. 10Ru' i qachi' kqakoj u'ij i Dios, xaq ru' i qachi' kqab'ij i tzel taq tzij. Ix, wachalal chwach i Cristo, kmajaw taj kqa'an keje ile. 11Jun ralaxb'al ya, xa jun uwach ujelal i ya kel che. We k'a i ya kel che, kel ti uri i ya ki che. 12Ix, wachalal chwach i Cristo, jun uche'lal higo, are kuya uwach, ¿Xatab'a uwach i olivo kuya'o? Keje ti ile. Xaq i jun uche'lal uva, are kuya uwach, kuya ti higo. Xaq keje i ralaxb'al ya, xa jun uwach kel che, kel ti ya ki che jun ralaxb'al ya tza.#3.12 Keje yoj ile, we utz qak'ux, xwi i utz laj tzij kqab'ij.

I saqil laj no'oj

13We o jun chiwe yix o unojb'al, we lik kuta ub'e, chu'ana uri i utz, aljinsab'al re unojb'al. We k-on ti nim che rib', ku'aljinsaj uri chi o unojb'al. 14Xwiri yix we kiya che i titb'al pamaj ku'an k'a che pik'ux, xaq ki'an i b'iroxik xa rumal kirayij olem che u'ij jun chik, nti uchak uri we ki'an taq nim che iwib' xaq kiwuwaj uwach i saq laj tzij. 15Man are ti nojb'al ile chi kpe ru' i Dios; ile xa nojb'al re uwach i jyub' ta'aj; xa are pacha kkich'ob' i to' winaq. I nojb'al le xa ru' itzel petnaq wi. 16Ipa o wi i titb'al pamaj xaq we kqarayij wach o ru' jun chik, lik o uri i utz taj pqak'aslemal xaq ronojel i utz taj chqaxol. 17Xwiri, we ru' i Dios petnaq wi i qanojb'al, i nab'e k'utb'al re, are jun qak'aslemal ch'am; xwi ta la ile, kqaj ti ch'oj, xaq utz qak'ux chke konojel, xaq oj sik'aj chutayik jun chik, xaq kqil tob'al kiwach konojel, xaq kqa'an i utzil chomal, xaqjun kilik kqa'ano, kojt'oron taj, lik saqil i kqab'ij. 18Pachin kurayij chi i rachi'il chom je o chkiwach, chu'ana che rib' ire chi utz ch-oloq. We keje ile kki'an konojel, ke'el uri chi is suk'ul i kik'aslemal konojel.

Currently Selected:

Santiago 3: ACHICUB

Highlight

Compare

Copy