Santiago 5

Pixb'anik chke i b'eyomab'

1Yix ix b'eyomab', ¡Chita iri! Chixo'oq xaq chixsik'inoq rumal i k'ax kpe ni piwi. 2I ib'eyomal chi ik'olom, xa aynaq chik; xaq i i'u' chom chi ik'olom, xa pok'arnaq chik. 3Xaq i pwaq ik'olom, chi anpwaq i saqpwaq, xa pusirnaq chik. Are i pus le, are k'utb'al re chi o imak. Are ku'at tzij i Dios, i pwaq chi o pus che, kukoj ni imak; kuk'atsaj ni i ch'akul pacha a'. Yix wo'or xa kixtijin chumolik ipwaq re k-on panoq, xwiri, ya oj o chik pa taq k'isb'al ij. 4I kajil i mokom chi xitij yix, are ktz'onow i k'ax piwi tojb'al re imak. I nim laj Ajwal utom chik i kijilawik i mokom le.#5.4 Cf. Levítico 19.13. 5Yix, waral chwach i jyub' ta'aj nti uyej itijom, to' itijom i utz, to' iya'om iwib' churiqik taq irayijb'al. Itzuqum iwib' pacha ketzuq i chikop chi keti'ojirsaxik; xwiri ya kuriq i ij re i kamsanik. 6Yix itzukum kimak ike chi nti kimak i xeikamsaj; ike xkito ti kib' chiwach.

Oy-enik ru' rutzil k'uxij

7Xwiri yix, ix wachalal chwach i Cristo, chiya unimal ik'ux chroy-exik uk'unik i Ajwal Jesús. Chi'ana yix pacha ku'an jun ajtikanel; kok'il kroy-ej i jab'. We xpetik, ktikanik; te'uri kok'il kroy-ej uwach i lik o u'ij utikon. 8Keje ile chi'ana yix. Mixk'achirik, mb'a'krij ik'ux, man i Ajwal lik ya kk'un tan chik.

9Ix, wachalal chwach i Cristo, are kitij i k'ax, miya iweqan chiwach. Man jun, we kukoj umak i rachi'il, i Dios ku'an i atb'al tzij uri che ire. Chi'ana kwent, i Dios lik ya ku'an i atb'al tzij pqawi. 10Ix, wachalal chwach i Cristo, chiwila pacha xki'an i profeta. Ike xkitij i k'ax rumal ub'ixkil utzij i Ajwal, xwiri o unimal kik'ux che wach taq i xkiriqo, xek'achir taj. 11Qeta'am pachin kkitij i k'ax rumal ukub'ib'al kik'ux che i Dios, k-on panoq kkitij ni utz. Iweta'am yix wach xu'an i mam Job ujer: Are xutij i k'ax, xb'a'krij ti uk'ux che; rumali i Ajwal,#5.11 Job 1.21-22; 2.10; 42.10-17. lik nim xuya che. Keje i Ajwal ile, lik nim i rutzil uk'ux chqe, lik kril tob'al qawach.

12Ix, wachalal chwach i Cristo, chita pe': Mikuxtaj ub'i i Dios puwi itzij k'utb'al re we saq laj tzij i kib'ij, xaq mikuxtaj ub'i i kaj ulew, xaq mikuxtaj jun chik b'iroxik. Xwiri, we o i kib'ij chi qatzij, chib'ij: “Lik qatzij.” We qatzij taj, chib'ij: “Lik qatzij taj.” Xwi ile chib'ij; man keje ile i Dios kuya ti utojb'alil chiwe.#5.12 Cf. Mateo 5.34-37.

Lapanik ru' i Dios

13We o jun chiwe o pa k'ax, chutz'onoj ucho'ab' che i Dios. We o jun chiwe kkikotik, chub'ixaj u'ij i Dios. 14We o jun iwab' chiwe, cheusik'ij i kinimaqil i qachalal ru', man kkib'ak uch'akul ru' aceite xaq kkitz'onoj che i Ajwal puwi. 15Are kixlapan ru' i Ajwal, we lik kul ik'ux che, i iwab' kutzirik, man i Ajwal kresaj ni yob'il che. Xaq we o umak u'anom, kkuytaj ni che. 16Rumali, chib'ij chiwach we o imak i'anom. Ni'pa i je iwab' chixol, chitz'onoj che i Dios pkiwi man keutzirik. Utz'onb'enik jun we suk'ul uk'ux chwach i Dios, lik o uri ucho'ab'. 17Chk'un chik'ux wach xu'an i mam Elías, chi profeta. Ire xa winaq keje pacha yoj, xwiri ru' ronojel uk'ux xutz'onoj che i Dios chi nti jab' kpetik; rumali, i Dios xuya che wach i xutz'onoj; oxib' junab' ru' nik'aj, xpe ti jab' chwach i jyub' ta'aj. 18Te'uri, xutz'onoj chik che i Dios chi kpe i jab', are uri xpe chik. Te'uri i tikon xuya chik uwach.#5.18 1 Reyes 18.42-45.

Ujachik rib' i ajmak pu'ab' i Dios

19Ix, wachalal chwach i Cristo, we o jun chiwe yix kel chupam i utz laj b'e, xaq we jun chik chiwe ku'an che chi ktzalij chaloq, 20chiwetamaj uri chi i winaq le kelsax uri i ranima pu'ab' i kamik, xaq k'i i mak atzalal ksachsax ni rumal ile.

Currently Selected:

Santiago 5: ACHICUB

Highlight

Compare

Copy