Santiago 2

Xaqjun kilik i winaq chi'ana

1Ix, wachalal chwach i Cristo, yix chi ikub'am ik'ux che i Ajwal Jesucristo, utz taj we kik'aq b'i ki'ij i winaq, lik xaqjun kilik chi'ana. 2Yix, we imolom iwib', i ke'ok b'i keb' achiyab' pa molb'al ib', jun b'eyom, i jun nib'a', i b'eyom lik chom u'u', o b'aq an-o'oj che uwi u'ab', xwiri i nib'a' xa k'ojk'oj u'u', 3we yix xwi utz rilik ki'an che i jun chi b'eyom, chi xaq lik chom u'u', we kib'ij che: “Chatkul chupam i chom laj kub'ib'ali”. Te'uri moq kib'ij che i nib'a': “Chattak'al ni yet chila, o chatkul ni pulew.” Chuqul taq waqan, 4we keje ki'an ile, utz taj, man junam ti kilik i winaq ki'ano. Kixtijin uri chu'ankil pacha kki'an i atol tzij chi suk'ul ti atb'al tzij kki'ano.

5Ix, wachalal chwach i Cristo, chi k'ax kixinna'o, chita pe': I Dios je u'ulum i je nib'a' chwach i jyub' ta'aj, kuyab'ej re i nim laj b'eyomal re ukub'ib'al k'uxij chke. Xaq keje ile kkik'am i kuxtab'al re i ajawinik re i Dios chi usujum chke ni'pa i k'ax kkina'o. 6Xwiri yix xa junwi u'ankil ki'ano; xa kiya kik'ix i nib'a'ib', i kikoj ki'ij i b'eyomab'. ¿Xatab'a are ti b'eyomab' kixkiya pa k'ax? Kumal ike kitij uyej; ¿Xatab'a are ti ike kki'an b'i pen chiwe chi kixkik'am b'i chwach i atb'al tzij? 7¿Xatab'a je are ti b'eyomab' kkiyo'ya i lo'laj ub'i i Jesucristo, chi Tol iwe?

8Yix utz ki'ano we ki'ano pacha kub'ij uwuj i Dios: “K'ax chana alok'anij keje pacha k'ax una'ik awib' yet ka'ano.” Ile are i atz laj atb'al tzij re i Dios. We lik kixkojon che i tzij le, lik utz uri ki'ano.#2.8 Levítico 19.18. 9Xwiri, we xa o jujun kik'aq b'i ki'ij, kixtijin uri chu'ankil i mak atzalal, xaq o imak chwach i atb'al tzij re i Dios.#2.9 Cf. Deuteronomio 1.17. 10Jun, we ktijin chu'anik ronojel pacha kub'ij i atb'al tzij re i Dios, xwiri we o jun che upixab' i Dios ku'an taj, kel uri chi o umak chwach ronojel i lajuj utzij pixab' i Dios.#2.10 Cf. Mateo 5.19. 11Are i Dios chi xub'ij i tziji: “Mamin awib' ru' jun chi at k'ulinaq ti ru'” xaq xub'ij: “Matkamsanik.” B'ay, jun achi, tupu kumin ti rib' ru' jun chik chi k'ulinaq ti ru', xwiri we kkamsanik, lik kkojon ti uri che ronojel u'atb'al tzij i Dios. 12Yix china iwib' ru' wach i kib'ij, xaq wach i ki'ano pacha i jub'an chi k-at tzij pkiwi ru' i atb'al tzij chi rok'am li elik chisaq chqe.#2.12 Rumal i k'axnab'al uk'ux i Dios, xixel chisaq; rumali xaq o uchak chi yix o uk'axnab'al ik'ux. 13Man i Dios lik kril ti tob'al kiwach i winaq we kilom ti tob'al kiwach i kachi'il. Xwiri, we yoj qilom tob'al kiwach i winaq, i Dios kril uri tob'al qawach yoj are ku'an i atb'al tzij pqawi.

Ukub'ib'al qak'ux k-aljin che i wach kqa'ano

14Wachalal chwach i Cristo, nti uchak we kqab'ij chi o ukub'ib'al qak'ux che i Dios we kqa'aljinsaj ti ru' wach taq i kqa'ano; we keje ukub'ib'al qak'ux ile, nti k-on re uri chqe; man ile lik kojuto taj.#2.14 Lik o uchak chi o uk'axnab'al qak'ux chke i winaq. Cf. Mateo 7.21; Gálatas 5.6; 1.22. 15Chita pe', we o jun qachalal chwach i Cristo ixoq, o we achi, lik nib'a', lik nti u'u' xaq nti uwa, 16we o jun chqe kub'ij che: “Chawila awib'; kwaj yin joron ti tew kana'o, nti numik katijo,” Xwiri we kqaya ti che wach i rajwaxik che, nti ke'el wi uri che ire. 17Keje k-on ukub'ib'al qak'ux ile che i Ajwal, moqxa kqab'ij chi lik olik, xwiri we nti jun utz kqa'an chke i winaq, nti uchak uri; man k-aljin taj we oj re i Ajwal.

18Moqxa o jun kub'ij: “Yet o ukub'ib'al ak'ux che i Dios, yin o i utz laj anik in-anom chke i winaq. Wo'or kwaj rilik ukub'ib'al ak'ux che i Dios, xwiri nti utz a'anom chkiwach i winaq; te'uri yin kink'ut ni ukub'ib'al ink'ux che i Dios ru' i utz laj taq anik chi in-anom chke i winaq.” 19Yet kab'ij xaq lik kakojo chi xa jun i Dios olik; qatzij lik utz i kach'ob'o le, xwiri, xaq i itzel taq tew kkikoj ile, xaq kesiksat rumal kixib'rikil. 20Ma'an che awib' pacha taq nti anojb'al, chata ub'e: I ukub'ib'al qak'ux nti uchak we nti jun utz kqa'ano aljinsab'al re ukub'ib'al qak'ux che i Dios. 21Ujer, i qamam, mam Abraham, utz xel chwach i Dios rumal wach i xu'ano, man xkojon che i Dios are xtz'onox i rak'al che chi a Isaac. Xusujuj ukamsaxik i rak'al puwi i sujb'al sipon chwach i Dios.#2.21 Génesis 22.1-14; Hebreos 11.17. 22Chawila chi: I mam Abraham xuk'utu chi o ukub'ib'al uk'ux chrij wach ni'pa i xu'ano. Rumal ile lik xutz'aqatsaj ukub'ib'al uk'ux. 23Keje utz'aqatsaxik uwach i tzij ile chi tz'ib'tal kan chupam uwuj i Dios ujer: “I mam Abraham xukoj i Dios, rumali i Dios xub'ij chi lik utz xel chwach Ire.” Are u'anik uri chi mam Abraham, ramiy i Dios.

24Chi, kiwil wi chi jun winaq, utz kel chwach i Dios, xwi ti rumal ukub'ib'al uk'ux, xaq lik rumal i utz chi ku'ano. 25Keje xu'an ati Rahab ile ujer, jun ixoq, chi chwach uch'akul kuch'ak wi umer, xwiri, i Dios utz xrilo rumal i xu'ano. Ire xuya kiposar i winaq chi je re i Dios, xeuto xaq xeutaq chub'i che jun chik b'e ani'al, elsab'al ke pki'ab' i winaq chi je ajch'oj chkij.#2.25 Josué 2.1-21; 6.17; Hebreos 11.31. 26I kub'ib'al k'uxij ke'el uri pacha k-on jun ch'akulaj. We nti ranima lik, kamnaq uri. Xaq keje ile k-on ukub'ib'al qak'ux; we kqa'an ti utz laj anik, xa kamnaq uri ukub'ib'al qak'ux.

Currently Selected:

Santiago 2: ACHICUB

Highlight

Compare

Copy