Oseas 9
9
Utojb'alil umak i tinimit Israel chi xutzijoj ma Oseas
1Matkikotik, tinimit Israel;
matsak'lin rumal kikotemal pacha kki'an i jub'an chik tinimit,
man xa'an i ch'am taj ru' ach'akul
are xawo'taj kan a-Dios.
Chila ipa kjich' wi uwach i trigo,
qus kawil uk'amik rajil ni'pa taq i ch'am taj chi ka'an ru' ach'akul.
2I tinimit Israel nti u-trigo xaq nti uwa'al uva muqb'am;
i uwa'al uva muqb'am k'ak' le k-on teneri ile.
3I tinimit Efraín ktzalij chik pa Egipto,
i pa tinimit Asiria kutij ni i wa chi ch'am taj.
Lik kejeqi ti chik pa nim laj tinimit re i Ajwal:
4Kkitu' ti chik i uwa'al uva muqb'am yab'al u'ij i Ajwal,
xaq kkisujuj ti chik i porom sipon.
I wa re trigo chi kkitijo keje pacha i wa re trigo chi kya'ik are kkam jun winaq,
xaq pachin ketijawik kekanaj na ne te ch'am.
Ike kkitij ni i wa re trigo le,
xwiri utz taj we kkik'am b'i prachoch i Ajwal.
5¿Wach nawi ki'an yix che i ij re i nima'ij,
re i nim laj ij re i Ajwal?
6Ike je anmajnaq chwach i sachb'al kiwach;
i Egipto keumol na,
te'uri pa tinimit Menfis kemuq wi.
Ni'pa taq i kib'eyomal chi saq-o'oj keu'on na pacha i tzarab',
i k'ijib'al re kachoch ipa kimolom wi kib' kk'iy ni k'ix chwach.
7¡Ya xeuriq i ij re i tojb'alil!
¡Ya xeuriq i ij re i tojb'alil chi kmajaw chke!
¡I tinimit Israel lik kretamaj na chi ya xeuponik!
Yix kib'ij: “I profeta lik b'uy.
I achi chi kub'ij chomiq laj taq tzij xa ch'uj.”
Xwiri kkib'ij ile man je nojnaq che i utz taj,
man lik nim i titb'al kipam.
8I Dios ukojom i u-profeta chajinel re i tinimit Efraín,
xwiri yix kikoj i tzaqsab'al re pub'e;
¡Lik k'a prachoch ne i Dios ktitat ipam che!
9Lik xki'an i ch'am taj ru' ronojel kik'ux,
pacha taq che i ij re i Gabaa.
Xwiri i Ajwal kk'un ni chuk'ux i kimak
rumali kuya ni utojb'alil kimak atzalal.
I tinimit Israel kutij ni uyej rumal umak
10Kub'ij i Ajwal:
“Are xinriq i tinimit Israel, lik xinkikotik
pacha i jun chi kuriq uva pa tz'inilik jyub' chaqij.
I iwatit imam yix lik je keje chinwach Yin
pacha i nab'e uwach taq higo chi ke'anarik.
Xwiri are xeupon pa Baal-peor
xkiya kik'ux chukojik ki'ij i dios chi ne te saqil,
xaq lik xkiqajsaj ki'ij
pacha taq i tiox chi xaril je antalik chi lik k'ax kkina te ike.
11I unimal u'ij i tinimit Efraín krupup na pacha jun tz'ikin.
Ke'alax ti chik mas ak'alab',
nti chik mas ixoqib' keu'on raxwinaq,
lik nti chik mas ak'alab' ke'alaxik.
12Tupu we ketiki chkik'itsaxik kak'al,
Yin lik ke'inmaj ni chke i lik mijun kinya kan chke.
¡Lik to' kiwach i winaqi are kewo'taj kanoq!
13Yin kwilo chi tinimit Efraín ku'an chke i rak'al
je pacha taq kiti' i je ajmontiyar:
Keresaj b'ik re keujacha pu'ab' i kamik.”
14¡Chaya chke, Ajwal, pacha i kawaj kaya chke!
¡Cha'ana chke ixoqib' chi keu'on machor xaq nti upam kitz'um!
Roywal i Ajwal chrij i tinimit Efraín
15Kub'ij i Ajwal:
Chila pa Gilgal xki'an ronojel i utz taj,
xaq chila xinjeq li utitatik inpam chke.
Rumal u'anik i xaqmanal pkik'aslemal
kewesaj b'i pwachoch;
lik k'ax ti chik keinna'o,
man konojel i je kaj-atzil lik je qelqel.
16I tinimit Efraín lik soktajnaq;
keje pacha jun che' chi lik chaqijnaq i ra',
chi xaq umayim uya'ik uwach.
Tupu kk'iji rak'al,
Yin kin-an chke chi kekamik. Keje ile xub'ij i Ajwal.
17I tinimiti kraj ti kkojon che in-Dios; rumali in-Dios kuxutuj na, xaq to' keb'in pa taq tinimit, nti kejeqi wi.
Currently Selected:
Oseas 9: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
