Oseas 10
10
Usachik kiwach i sujb'al sipon re i tinimit Israel
1I tinimit Israel lik keje pacha jun raqan uva chi lik nojnaq uwach;
xwiri are lik mas k'i uwach,
lik mas k'i sujb'al sipon kyijb'axik;
are lik mas chom i rulew, xaq lik mas chom ab'aj chi o u'ij.
2I tinimit Israel u'anom keb' che i ranima,
i wo'or kutij ni k'ax rumal umak.
I Ajwal kusachsaj ni uwach i kisujb'al sipon
xaq keuwulijsaj ni i ab'aj chi o u'ij je o ru'.
3Wo'or i tinimiti kub'ij na:
Nti qajawinel
man qaya'om ti qak'ux che i Ajwal.
Xwiri ¿Wach nawi jun utz ku'an jun ajawinel chqe yoj?
4Lik xwi lapanik, to' lapanik,
ket'oron che kisujunik xaq kkijuch' uwach i wuj re i trat;
i u'atb'al tzij keje na pacha jun b'enen es
chi kk'iy xol taq cholaj pa taq es.
5I winaq re i tinimit Samaria keb'arb'atik;
ke'o' che usachik uwach i uk'exwach i me' re i Bet-avén.
Rumal ire ketz'uyin i tinimit
xaq i ajsujul sipon,
man i uchomalil lik sachnaq.
6Tupu i me' lik kk'am nu b'i pa Asiria
sujb'al re che i nim laj ajawinel.
Keje ile i tinimit Efraín lik kk'ix ni che:
I tinimit Israel kk'ix ni che utiox chi xaril antalik.
7Ksach ni uwach i ajawinel re i Samaria
pacha uxuruk' che' chi ksayay puwi i ya.
8Lik kewulijsax ni'pa taq i lo'laj k'ijib'al ke i tiox chi xaril je antalik
ipa te'eq kmakun wi i tinimit Israel.
Puwi i kisujb'al kisipon ke'alax ni tzakam xaq i k'ix,
i winaq kkib'ij ni chke i jyub': “¡Chojich'uqu!”
Xaq kkib'ij chke i k'ujk'ik jyub': “¡Chixwulij na li pqawi yoj!”
Uch'ikik utojb'alil umak i tinimit Israel rumal i Ajwal
9Kub'ij i Ajwal:
I tinimit Israel umayim ti u'anik umak
chi ujeqom li u'anik k'a che i jyub' Gabaa.
¡Che i kimak kiya'om wi kib'!
Rumali, i ch'oj
keumaj ni itzel laj taq winaq pa Gabaa.
10I tinimiti kinya ni utojb'alil umak che are kwaj Yin.
Chrij ire kkimol ni kib' i nimaq taq tinimit
are kinya utojb'alil chke rumal i nim laj kimak atzalal.
11I tinimit Efraín keje pacha te jun b'akil chi lik manxo
chi lik qus kril te ujich'ik i trigo.
Xwiri Yin wo'or inkojom jun yuku
che i chom laj uqul,
jek'b'al re i kareta;
i Judá kujek' ab'ixb'al,
i a Jacob kujukukej i jokb'al ulew.
12Xinb'ij chke: Chitika yix i suk'ul laj atb'al tzij
i chimolo uwach re k'axnab'al k'uxij.
Chiyijb'a chik i ulew re jun chik k'ak' tikanik,
man are i ij tzukb'al re i Ajwal,
k'a kk'un ni ire xaq kuk'am na li
i jab' re tob'al piwi yix.
13Xwiri yix itikom i mak atzalal,
imolom uwach i suk'ul taj
xaq itijom uwach i t'oronik.
Rumal xakub'a ak'ux chke akareta re i ch'oj
xaq chke awinaq chi je yij che i ch'oj,
14o ni ch'oqowik chkixol awinaq
xaq konojel ni'pa i kattowik lik ksachsax ni kiwach,
keje pacha usachik x-an che i Bet-arbel rumal i ajawinel Salmán
che i ij re i ch'oj,
are xya'yax upam i chuchxel ku' i rak'al.
15Keje ile kik'ulmaj ni yix,
winaq aj Betel,
rumal i nim laj imak atzalal.
¡I ajawinel re i Israel
kkam na are ksaqirik!
Currently Selected:
Oseas 10: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
