Oseas 7
7
1are kwaj kinkunaj intinimit Israel, are uri kel li chisaq kimak i tinimit Efraín xaq i Samaria,
xaq i utz taj chi ki'anom.
Man konojel kki'an i t'oronik;
pacha taq je ili'om ke'ok pa taq ja
xaq kkel-aj ub'itaq ke i winaq pa taq b'e.
2Kkikoj ti pajil
chi Yin lik kk'un chink'ux ronojel i kimak atzalal.
Wo'or lik sutim ni kij rumal i xaqmanal chi xki'ano,
chi lik arewi je o chinwach Yin.
El-anik kumal i je aj-atol tzij
3Ru' i utz taj chi ku'ano xaq ru' i ut'oronik,
intinimit ku'ano chi i ajawinel xaq i aj-ok'al utzam i tinimit lik qus kkilo.
4Konojel kjuluw kich'akul chu'anik xaqmanal;
je keje pacha i orno, are nuk'um chik a' chupam,
i aj-anol kaxlanwa kumayij uxut'ixik i a',
tz'aqat ku'an putzpik i or re i kaxlanwa.
5Che i ij are xoksax i koron che ujolom i qajawinel,
i je aj-atzil xki'ab'arsaj ru' i uwa'al uva muqb'am.
¡Ire xuya u'ab' chke i jub'an chi keyo'yanik!
6Ike kkiyijb'a i kanima chu'anik i utz taj,
pacha unuk'ik a' chupam jun orno;
te'uri kwar i aj-anol kaxlanwa ronojel a'ab',
xwiri are ksaqirik i orno lik k'a kjuluw a' chupam.
7Qatzij ile, konojel ike kejuluwik pacha jun orno,
chi xeub'i' b'i aj-atol tzij.
Konojel i kajawinelab' je tzaqnaq,
i lik mixatjun kutz'onoj utob'al chwe.
I tinimit chi xro'taj kan u-Dios
8I tinimit Efraín xumin rib' chkixol jub'an chik tinimit.
I Efraín keje pacha jun lejom wa
chi xa juperaj cha' che.
9Winaq chi etamam ti kiwach kik'isom ucho'ab' che
chi ire lik xunab'ej taj.
¡I uwi lik xu'on saq,
ire xunab'ej taj!
10I unimarsaxik rib' i tinimit Israel lik are ajsaqinel tzij chrij ire.
Mitene ru' ronojel ile, ike xetzalij ti chaloq
xaq xkitzukuj ti Ajwal ki-Dios.
11I tinimit Efraín keje pacha jun palomax
chi kch'ob'on taj xaq nti uno'oj:
Kutz'onoj utob'al che i tinimit Egipto,
te'uri k-e chik pa Asiria.
12Xwiri are ke'e chila,
kink'aq ni ink'at pkiwi ike;
kin-an ni chke chi pacha tz'ikin ketzaq li chikaj,
keinchap ni rumal i kimak.
13¡To' kiwach ike man xinko'taj kanoq!
I sachanel wachij keumaj na
man xinkiqelo.
Yin kwaj keinto,
xwiri ike xa ket'oron chwij Yin.
14Tupu kesik'inik are je o chwi kich'at,
xwiri kkikoj ti in-ij ru' kik'ux.
Are kkitz'onoj ki-trigo xaq uwa'al ki-uva muqb'am, kkisok kib';
¡Lik in kiqelom!
15Yin lik ink'utum te'eq chke
xaq inya'om te ucho'ab' kiteleb',
xwiri ike xa xkich'ob' u'anik i utz taj chinwach Yin.
16Xetzalij chik ku' i tiox chi xaril je antalik;
je keje pacha jun k'aqb'al ch'ab' chi xa jech' chik,
are kk'aq b'i i ch'ab' ke'etzaq ti chila ipa kk'aq wi b'ik.
Rumal i ch'awik chi kki'ano suk'ul taj,
kekam ni i kaj-atzil ru' uware i ch'ich' chi k'ulala o uware,
xaq chila pa Egipto keyo'yax na.
Currently Selected:
Oseas 7: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
