Oseas 5
5
1Ix, ajsujul sipon, chita iri;
chaya axikin, chutayik tinimit re Israel;
chita yix chi ix o prachoch i ajawinel:
Chiwij yix k-an ni atb'al tzij
man ix keje pacha jun tzaqsab'al uwam kojtal pa Mizpa,
xaq ix pacha jun k'at riptal b'i puwi i jyub' Tabor,
2Rumal kimak chi ki'anom lik pacha taq kiqajsam kib' k'a pa jul.
Rumali kinya ni utojb'alil chke.
3Yin weta'am uwach a Efraín;
i tinimit Israel are ti jun tinimit chi etamam ti uwach.
I a Efraín u'anom i ch'am taj ru' uch'akul;
i tinimit Israel xtz'itajik.
4Rumal umak i tinimit
kuya ti che chi ktzalij chik ru' u-Dios.
Lik la'pum chik rumal i xaqmanal ku'an ru' uch'akul,
kukoj ti u'ij i Ajwal.
5I u'anik nim che rib' i tinimit Israel lik ktzaq ni chupalaj;
i a Efraín ktzaq ni rumal umak ire,
¡Xaq i Judá ktzaq nu b'i ku' ike!
6Ku' uchij xaq ku' taq ub'akib'
ke'e ni chutzukuxik i Ajwal,
xwiri kkiriq taj
man xel chkiwach ike.
7Xemakun chwach i Ajwal,
rumali o kak'al chi re jun chik achi.
Rumal ile wo'or lik xa che jun ik'
i kulew kmaj ni chke.
Tojpen re Israel xaq re i Judá
8¡Chixut'ij i rok'a' i chikop re i ch'oj pa Gabaa
xaq i trompeta pa Ramá!
¡Chiya utzijol pa tinimit Bet-avén!
¡Chitika i xib'in ib' pa Benjamín!
9Yin kintzijoj pa taq tzob'ajil re i tinimit Israel
wach i kk'ulmaxik chi lik qatzij:
Efraín lik kkanaj ni utukel che i ij re i tojb'al mak.
10I Ajwal kub'ij:
I je aj-atzil re i tinimit Judá je keje pacha i winaq le
chi kkijalk'atij i mojon re uchi' ulew.
¡Xwiri lik keinmuq nu b'i ru' i woywal!
11I a Efraín lik o pa k'ax,
lik xelsax i b'iroxik chi o te re che,
man lik ukoch'im rib' che i terejik chkij
i dios chi je saqil taj.
12Xwiri Yin in keje na pacha i pok' che i Efraín,
i pacha taq in jarsanel che i tinimit Judá.
13I Efraín are kuna'o chi lik iwab',
xaq i Judá kril i soktajnaq che rib',
i Efraín k-e ni pa Asiria
chutz'onoxik tob'al rib' che i nim laj ajawinel,
xwiri i ajawinel le ktiki ti
chrutzirsaxik.
14Yin lik in keje pacha jun koj are kchapanik,
xaq keje uchapik ile kin-an Yin che i Efraín xaq che i Judá;
lik are ni Yin kin-an ch'aqa taq chke, te'uri kin-ek
keink'am b'i wu', lik mijun kemajaw ni chwe.
15Te'uri kintzalij la chik pink'ijib'al,
k'a kketamaj ni ike chi o kimak,
keje ile kepe chintzukuxik.
¡Chupam i uyej, kinkitzukuj na!
Currently Selected:
Oseas 5: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
