Oseas 4
4
Ch'oj re i Ajwal chrij i tinimit Israel
1Israel, chita
wach kub'ij i Ajwal.
Ire lik uyijb'am jun nim laj ch'oj
chkij i je jeqel pa tinimiti,
man chi lik nti chik suk'ulik chkixol i winaq,
xaq nti suk'ul k'uxij xaq mitene retamaxik uwach i Dios.
2Are i olik xa are taq ub'ixkil i qatzij taj, t'oronik,
kamsanik, el-anik,
u'anik i ch'am taj ru' ch'akulaj, ch'oj,
xaq k-an kamsanik chrij kamsanik.
3Rumali, i tinimit o pa b'is;
lik nti chik kicho'ab' i je jeqel chila;
junam ku' itzel laj taq chikop aj pa taq es, tz'ikin
xaq i kar aj pa mar kekam na.
I Ajwal kukoj kimak i ajsujul sipon
4Kub'ij i Ajwal:
¡Lik mijun kutzukuj umak jun chik xaq muyajo!
Inch'oj xwi chawij yet at ajsujul sipon.
5Yet lik kattzaq ni pa'ij,
xaq i cha'ab'
ktzaq ni awu' yet i profeta,
i achuch lik kinsach ni uwach.
6Intinimit lik nti reta'am,
rumali lik xsachsax uwach.
I yet, at ajsujul sipon, chi xaxutuj i etamanik,
yin katwesaj ni che apatan.
Man yet xa ksach chak'ux ink'utunik chi in a-Dios,
xaq Yin kinsach ni chink'ux i je amuq axikin.
7Tz'aqat ktijin kik'iyarik i je ajsujul sipon, lik mas kemakun chinwach Yin;
rumali, kinqajsaj ki'ij man o te'eq ki'ij.
8Lik je k'as rumal umak intinimit;
rumali kkaj chi inwinaq kemakunik.
9Xaq keje ile che i tinimit xaq chke i je ajsujul sipon,
keinya ni pa k'ax rumal i utz taj chi kki'an pkik'aslemal.
10Rumal kiya'om kan u'anik uchak i Ajwal,
kkitij kiwa xwiri kenoj taj;
kki'an ni ch'am taj ru' kich'akul, xwiri kk'iji ti kak'al.
I tiox chi xaril je antalik ke aj Israel
11Rumal kki'an i ch'am taj ru' i kich'akul xaq rumal i uwa'al uva muqb'am
ksach ni kinojb'al.
12I intinimit kutz'onoj uno'oj chke utiox re che';
ru' tani kutijoj rib' che i nanik.
Lik chapom rumal i ch'am taj chi ku'an ru' uch'akul,
intinimit arewi kb'in che i b'e chi suk'ul taj:
Ku'an i ch'am taj ru' uch'akul jek'b'al rib' ru' u-Dios.
13Che unajtil uwi taq jyub', xaq chwi taq loma
kkik'at pom xaq kkisujuj i sipon porom,
xaq chuxe' i chomiq taq muj
re i b'aqit, re i álamo xaq re i sik'al.
Rumali i imi'al yix kkich'ak kimer chwach kich'akul,
xaq keje iwalib' kkimin kib' ku' achiyab' chi kachijil taj.
14Xwiri Yin kinya ti utojb'alil chke imi'al rumal uk'ayixik kich'akul,
xaq keje iwalib' chi kkimin kib' ku' achiyab' chi kachijil taj,
man xaq keje yix kimin iwib' ku' ixoqib' chi kkik'ayij kich'akul;
are kisujuj i porom sipon, keiwachi'ilaj b'i
ixoqib' chi kkik'ayij kich'akul chi pacha taq o ki'ij chiwach.
¡Keje ile kmuqtaj b'i jun tinimit chi nti unojb'al!
15We yet, Israel, ka'an i ch'am taj,
xwiri i tinimit Judá nti umak che ile.
¡Mix-e yix pa Gilgal
xaq mixel b'i pa Bet-avén
xaq mikuxtaj uk'aslemal i Ajwal puwi jun tzij! Man Ire lik k'aslik.
16I tinimit Israel lik b'uy
pacha ub'uyil jun ral b'akil ch'uj;
keje ile, ¿I Ajwal keuchajij ni pa chomiq taq wayb'al,
ku'an chke pacha je ral taq chij?
17-18I a Efraín uya'om rib' chukojik u'ij taq tiox
chi xaril je antalik.
¡Konojel je tzaqnaq pacha je jutzob'aj ab'arelab'!
Julaj i julaj chik kki'an i ch'am taj ru' kich'akul,
lik mas ne qus kkil i k'ixb'alil chwach we o ki'ij.
19¡Kk'un jun tew keuchararej b'ik,
i lik kek'ix ni che rumal ukojik u'ij i kitiox!
Currently Selected:
Oseas 4: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
