Oseas 2
2
1Are uri kib'ij ni yix chke iwatz icha' achiyab':
“Utinimit i Dios”
xaq chke iwanab':
“Yatal tob'al kiwach”.
I suk'ul ti laj uk'aslemal i tinimit Israel
2I Ajwal kub'ij:
Chixch'ojin ru' ichuch, chixch'ojin ru' ichuch,
man ire wixoqil ti chik
xaq Yin in rachijil ti chik.
¡Chumayij utz'ajik upalaj chi sujb'al rib'!
¡Chresaj chomiq taq ruwaj chi o chuqul ke ixoqib' chi utz ti kinojb'al!
3We ku'an taj, lik kinch'anb'a ni kanoq:
Kin-an ni che pacha i ij are xalaxik,
kin-an ni pacha jun tz'inilik jyub' chaqij che,
lik pa chaqij ulew kinya wi,
i kin-an ni che chi kkam ni rumal k'atik.
4Kwil ti tob'al kiwach i rak'al, chi je alaxnaq ru'
man je rak'al jun ixoq chi chwach uch'akul kuch'ak wi umer.
5I kinan xuk'ayij rib';
lik xuk'aq b'i u'ij, are xub'ij:
Kin-e chkitzukuxik i achiyab' chi je we ani'al,
chi are keyaw inwa re trigo, inya',
inchij, in-lino,
in-aceite xaq i uwa'al uva muqb'am.
6Rumali kintz'apij ub'e ru' taq k'ix
xaq kinkoj ni jun koral chrij chwach,
man keje ile kuriq ti ub'e.
7Kterej ni chkij i achiyab' chi je re ire ani'al,
xwiri keumaja taj;
lik keutzukuj na, xwiri lik keuriq taj.
Kub'ij ni uri:
“Kintzalij ni chik ru' i nab'e wachijil,
man ru' ire lik utz te'eq in olik chwach i wo'or.”
8Xwiri ire xretamaj taj
chi Yin are kinyaw te
i trigo, uwa'al uva muqb'am xaq i aceite che;
chi are Yin kintz'ab'ij
i saq-o'oj xaq i an-o'oj chi ru' ile xu'an wi i utiox chi xaril je antalik.
9Rumali, kintzalij chik
xaq kink'am in-trigo xaq uwa'al in-uva muqb'am
che i ij are o i molonik,
xaq kink'am ni chik in-lana xaq in-lino,
chi inya'om te'eq che, re kuch'uqb'ej rib'.
10Chkiwach achiyab' chi je re ani'al
kinch'anb'a ni chisaq.
¡Lik mijun ktiki chrelsaxik pin-ab'!
11Kinsach ni uwach ukikotemal,
che taq unima'ij xaq i k'ak' taq ik',
che taq i ij sábado
xaq che ronojel ni'pa taq i unima'ij.
12Kinsachsaj ni uwach i tikb'al u-uva xaq tikb'al taq u-higo,
chi kub'ij ire:
Iri are i tojb'al
chi xkiya achiyab' chwe chi je we ani'al.
Kin-an ni chke pacha je patzpaq laj taq es k'ix,
xaq kekitij ni itzel laj taq chikop aj pa taq es.
13Kinya ni utojb'alil che rumal i ij chi xik'awik
chi xusujuj pom chke taq i tiox,
are kuwiq rib' ru' b'aq re uwi ab'aj xaq i uwaj,
re kterej chkij achiyab' chi je re ani'al
xwiri Yin lik xinusach puk'ux.
Yin in Ajwal, xinb'ij.
I Dios k'ax kuna utinimit Israel
14Yin qus kwilo, lik xumaj inwach:
Kink'am b'i pa tz'inilik jyub' chaqij
xaq kin-ijla ni ranima.
15Te'uri kintzalijsaj chik utikonb'al uva che,
i kin-an ni che i uwa ta'aj re i Acor
chi are ni jun uchija re roy-exik uk'ux ire.
Chila kula' ni uwach chwe pacha are k'a ali,
keje pacha i ij are xel li pa Egipto.
16Are uri kub'ij ni chwe wachijil yin,
chi puk'exel ile kub'ij taq chwe Baal we yin.
Yin in Ajwal, xinb'ij ile.
17Xaq kwesaj ni puchi'
i kib'i i baal,
chi lik arewi kekuxtax ti chik.
18Che taq i ij le kin-an ni jun utzil che i tinimit Israel
jun trat ku' chikop aj pa taq es,
ku' tz'ikin xaq ku' i kumatz;
kwesaj na xaq kinraqij i utz taj chupam i tinimiti
i k'aqb'al ch'ab', i ch'ich' chi k'ulala o uware xaq i ch'oj,
man keje ile intinimit utz na kk'iji'ik.
19Tinimit Israel, Yin kin-an ni wixoqil chawe ronojel ij saq,
lik at saqil laj wixoqil, pacha kub'ij i atb'al tzij,
man lik k'ax katinna'o ru' ronojel ink'ux.
20Yin kin-an ni wixoqil chawe xaq lik kinjikb'a ni ink'ux chawe
i katint'or taj, are uri i yet kawetamaj na chi Yin in Ajwal.
21Yin in Ajwal, kinb'ij:
Che i ij le Yin kinla' ni uwach che i kaj,
xaq i kaj kula' ni uwach che i ulew;
22i ulew kula' ni uwach che i trigo,
che i uwa'al uva muqb'am xaq che i aceite,
ike le kkila' ni uwach che a Jezreel.
23Kinkub'a ni intinimit che ulew
chi lik we Yin;
kwil ni tob'al uwach i Lo-ruhama,
xaq i Lo-ammi kinb'ij ni che: Yet at intinimit,
ire kub'ij ni chwe ¡Yet at in-Dios!
Currently Selected:
Oseas 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
