Oseas 1
1
Rixoqil xaq i je rak'al ma Oseas
1Iri are i tzijonik chi xub'ij i Ajwal che ma Oseas chi rak'al i ma Beeri che taq i ij re ajawinik re i ma Uzías, ma Jotam, ma Acaz xaq ma Ezequías, ajawinelab' re i tinimit Judá, xaq che taq i ij re ma Jeroboam, rak'al i ma Joás, ajawinel re i tinimit Israel. 2I Ajwal keje iri xujeq ub'ixkil i utzijonik chi kraj ub'ixkil, rumali xub'ij che ma Oseas: I ulew re i tinimit Israel xujeq u'anik i xaqmanal ru' uch'akul rumali xujek' rib' wu' Yin. Xaq keje ile, jat yet xaq chak'ama jun chke ixoqib' chi chwach kich'akul kkich'ak wi kimer re awixoqil, xaq chek'iji i awak'al ru' ire; man keje ile ike je rak'al ni jun ixoq chi chwach uch'akul kuch'ak wi umer.
3Are uri ma Oseas xuk'am ati Gomer re rixoqil, ralit ati Diblaim, xu'on raxwinaq i xk'iji jun rak'al. 4Are uri i Ajwal xub'ij che ma Oseas: “Chaya pub'i i ak'al a Jezreel, man pa keb' oxib' ij panoq kink'ajsaj ni kiwach i je umuq uxikin ma ajawinel Jehú, rumal taq i kamsanik chi ire xu'an chila pa Jezreel, keje ile kink'is ni uwach i ajawinik pa tinimit Israel. 5Che i ij le kinsach ni kiwach i achiyab' aj Israel chi je yij che i ch'oj che uwa ta'aj re Jezreel.”
6I ati Gomer xu'on tan chik raxwinaq, are uri xalax jun ralit, i Ajwal xub'ij che ma Oseas: “Chaya pub'i i ali le Lo-ruhama, man lik nti chik tob'al inwach che rajawinik i tinimit Israel. Lik kinkuy ti chik kimak. 7Xwiri, kwil ni tob'al uwach i rajawinik i tinimit Judá: Lik Yin in Ajwal, ki-Dios, keinto na. Xwiri Yin keinto ti pa ch'oj, Yin keinto ru' ti k'aqb'al ch'ab', ru' ti ch'ich' chi k'ulala o uware, ku' ti kaway, xaq mitene ku' achiyab' chi je ajrij taq kaway.”
8Are xmaj tz'um che al Lo-ruhama, i ati Gomer xu'on chik raxwinaq i xalax chik jun ralab'. 9Are uri i Ajwal xub'ij che i ma Oseas: “Chaya pub'i i ak'al le a Lo-ammi, man yix ix intinimit ti chik, xaq Yin in i-Dios ti chik.”
Uyakik tan chik i tinimit Israel
10Che jun ij k-on panoq i aj Israel
keu'on na pacha i seneb' re i mar,
chi mijun ktiki chupajik xaq lik mijun ktiki chrajlaxik.
Puk'exel kb'ix iri chke
“Yix ix intinimit ti chik”,
i Dios kub'ij ni chke:
“Yix ix rak'al i Dios k'aslik.”
11Are uri kkimol ni kib'
i winaq re i tinimit Judá xaq re i Israel,
i kkich'ik ni rij jun aj-ok'al utzam chke chi lik xwi ni ire,
i kepe ni che ronojel taq k'ijib'al, ketzalij li pa Jerusalén.
Man ¡Lik nim ni i ij re i Jezreel!
Currently Selected:
Oseas 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
