Oseas 13
13
Utzaqik ronojel i tinimit Israel puyej
1I uwinaq ma Efraín are kech'awik,
i jub'an chik tzob'ajil re i tinimit Israel kkik'utu chi lik kkikoj retalil che wach i kub'ij;
xwiri ire xa xukoj u'ij i tiox Baal
rumal i makunik le, xkamik.
2¡Xwiri lik kimayim ti makunik!
Kkich'ay i kisaq-o'oj xaq kki'an uk'exwach taq tiox che,
xa pachike taq kkinojij anoq xaq are taq pacha i kkaj i je aj-anol ke.
Te'uri kkib'ij: ¡Chisujuj poronik chkiwach!
I winaq kkitz'ub'aj taq i tiox chi pacha taq kemajaw i me'.
3Rumali je keje na pacha i solot saqb'ach re usaqirb'al
xaq keje pacha uxaqk'aj re usaqirb'al chi we' ksachik,
keje pacha k'im chaqij chi kuk'am b'i tew,
keje pacha i sib' chi kel b'i pa nuk'b'al a'.
4Kub'ij i Ajwal:
Yin in Ajwal, arewi in a-Dios
are at o te pa Egipto:
Lik mawetamaj uwach jun chik dios, lik xwi Yin,
man lik xwi Yin in tol awe.
5Yin xatinchajij pa k'atan laj taq ulew chila pa taq chaqij jyub'.
6Xwiri yix are lik xk'iyar wach i tijawik re iwu' chi kik'is ti chik,
iwanima lik xu'an nim che rib'
i xinsach chik'ux.
7Rumal uri, in keje na chke ike pacha jun koj,
pacha jun b'alam chi kk'ak'alin pa b'e re kixukamsaj.
8Kin-el b'i chuk'ulaxik pacha jun ati yum
chi usachom ral taq rak'al,
xaq lik kin-an ni ch'aqa taq che i kanima.
Pacha taq jun koj keintij nu b'i chila;
pacha jun itzel laj chikop kin-an ni k'ax chke.
9Kinsachsaj ni awach Israel,
xaq lik mijun ktiki chu'atixik.
10Rumali ¿Ipa o wi i awajawinel wo'or,
chatuto chupam konojel atinimit?
¿Ipa je o wi i je aj-ok'al utzam,
chi xatz'onoj i ajawinel xaq i je aj-atzil chke?
11Lik mi'naq woywal awu', xinya awajawinel,
xaq mi'naq woywal awu', xeinmaj chawe.
12I umak atzalal i ma Efraín lik tz'ib'talik;
i umak lik tz'ib'tal kan pa wuj.
13I tinimit Israel ya xuriq i ij re i ralaxb'al,
xwiri lik are jun ak'al chi lik nti uno'oj
chi lik ktiki tene chuyijb'axik rib'
puk'ijib'al are kalaxik.
14¿Kewesaj nawi chwach ucho'ab' i jul re kamnaq?
¿Kewesaj nawi chwach i kamik?
¿Ipa o wi, acho'ab' yet kamik chi katkamsanik?
¿Ipa je o wi, muqb'al kamnaq, ni'pa taq asachanik?
¡Lik nti chik tob'al inwach chke i winaqi!
15Tupu i tinimit Israel kpe usij pacha ichaj,
kpe ni tew prelb'al ij,
are i tew chi lik o ucho'ab' chi kjuk'uk' pa tz'inilik jyub' chaqij,
i kchaqij na xaq kk'is ni ni'pa taq ralaxb'al ya ru'.
I ajch'oj chrij kumaj nu b'i ub'eyomal che chi are i chomiq laj taq uwiqb'al rib'.
16I tinimit Samaria kuk'am nu b'i i utojb'alil umak,
man rumal xuqel u-Dios.
Kekam ni che uware i ch'ich' chi k'ulala o uware,
i ni'pa kak'al kexa'ix ni pulew
xaq i ixoqib' je raxwinaq kraqix ni kalanb'al.
Currently Selected:
Oseas 13: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
