Oseas 11
11
I Dios k'ax kuna utinimit qelqel
1I tinimit Israel are keje te'eq pacha jun ak'al, Yin lik k'ax xinna'o;
ire chi wak'al te'eq, xinsik'ij li pa Egipto.
2Xwiri are mas kinsik'ij,
mas kujek' rib' wu'.
Intinimit kusujuj te i sipon chkiwach i t'oronel laj taq dios
xaq kkiporoj pom chkiwach taq i tiox chi xaril je antalik.
3Ru' ronojel taq ile, Yin xinnab'ej chwach i tinimit Efraín
i xink'ut b'e che;
xwiri ike xkita ti ub'e chi are Yin keinchajij.
4Ru' laso re ch'uch'anik, ru' k'am re k'axnab'al k'uxij,
xeink'am li wu' Yin;
xeintejeb'saj che k'ulala che inchi'
chi pacha taq je noch' chi ketz'umanik;
xinchaki chuya'ik kiwa,
5xwiri ike xkaj ti xetzalij li wu' Yin.
Rumali ketzalij chik pa Egipto,
i Asiria are ni krajawin pkiwi ike.
6I ch'ich' chi k'ulala o uware ktzaq ni pkiwi i kitinimit
xaq kuwulijsaj i kik'ijib'al ipa kkik'am wi kicho'ab',
kewulijsax na rumal taq i kich'ob'onik chi kki'ano.
7Intinimit kutij u'ij chujek'ik rib' chinwach;
kesik'in an chikaj, xwiri mijun ketowik.
8¿Wach u'anik kin-an che we katinkanaj kanoq, tinimit Efraín?
¿Wach u'anik kin-ano we katwo'taj kanoq, tinimit Israel?
¿Kintiki nawi chusachik awach pacha usachik xin-an che i tinimit Adma,
o xaq kin-an chawe yet pacha xin-an che i tinimit Zeboim?
¡I wanima lik k-ututik,
lik nojnaq che i tob'al awach!
9Kin-an taj pacha kub'ij ujuluwik i woywal:
Kinsachsaj ti chik uwach i tinimit Efraín,
man Yin in Dios, in achi taj.
Yin in lo'laj Dios, chi in o chuxol atinimit,
xaq in k'unnaq ti chusachik awach.
10Ike keterej ni chrij i Ajwal,
Ire kuraq ni puqul chke pacha jun koj.
Lik kuraq ni puqul, are uri i rak'al
kesiksatik kepe chila puqajb'al ij.
11Pacha tz'ikin, kesiksatik ke'el na li pa Egipto;
xaq ke'el na li pa Asiria pacha palomax;
i kin-an ni chke chi kejeqi tan chik pkachoch.
Yin in Ajwal, kinb'ij.
I mak atzalal re utinimit i Dios
12I tinimit Efraín usutim wij ru' i t'oronik;
xaq i tinimit Israel usutim wij ru' saqil ti laj tzij.
I Judá xujek' rib' ru' i Dios,
i wo'or lik uya'om uk'ux chke utiox chi xaril je antalik.
Currently Selected:
Oseas 11: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
