Hebreos 7

I Jesús, rajpatan i Dios pacha i mam Melquisedec

1I mam Melquisedec le, keb' upatan. Ajawinel pa tinimit Salem#7.1 I tinimit Salem are i tinimit Jerusalén wo'or., xaq rajpatan i Dios. U'anom loq are i mam Abraham xch'akan che i ch'oj ku' i ajawinelab'. Are ktijin che i b'e tzalijik li re, i mam Melquisedec x-e chuk'ulaxik xaq xutz'onoj utzil chomal re i Dios puwi. 2Are uri i mam Abraham le, ni'pa i xuch'ak che i ch'oj le, xu'an lajuj mutzaj che, xujach jun mutzaj che i mam Melquisedec. I ub'i i mam Melquisedec ke'eloq: “Ajawinel suk'ulik.” I tinimit ipa xu'at wi i tzij Salem ub'i, chi ke'eloq: “Ajawinel re chomb'al ib'.” 3I mam Melquisedec le, etamam taj we o uqajaw uchuch xaq ratit umam; xaq nti tz'ib'awnaq wach alaxik xu'ano, xaq wach ukamik xu'ano. Xwiri i upatan chi xu'ano are i rajpatan i Dios chi nti uk'isik, rumali ire kmajawik pacha Uk'ojol i Dios.

4Chi kqata wi, chi i mam Melquisedec lik nim u'ij, man i nim laj qamam, mam Abraham, xuya jun mutzaj che, chi xresaj che i lajuj mutzaj chi xuch'ak che i ch'oj.#7.4 Génesis 14.20. 5Chrij pacha i atb'al tzij re i mam Moisés, i umuq uxikin i mam Leví o ke che kkik'am jun mutzaj che i lajuj chi kkich'ak i jub'an aj Israel winaq. O ke che we je rajpatan i Dios. Keje ile kub'ij i atb'al tzij chi tz'ib'talik. Nti k-ono we je kach aj tinimit, nti k-ono we xaqjun kijayil, nti k-ono we konojel je umuq uxikin i mam Abraham, lik rewi o ke che chi kkik'am i tzuqb'al kib' chke. 6Xwiri, i mam Melquisedec le, tupu umuq uxikin ti mam Leví. Xwiri xuk'am i jun mutzaj re i lajuj mutzaj che i nim laj qamam, mam Abraham. I mam Abraham i Dios usujum i nim laj utzil chomal che. I mam Melquisedec xaq xuya utzil chomal puwi i nim laj winaq mam Abraham. 7Qonojel qeta'am chi we o jun kuya u'ab' puwi jun rachi'il, ire mas nim u'ij chwach i rachi'il.#7.7 Rumali, qeta'am chi i mam Melquisedec, mas nim u'ij chwach i nim laj qamam, mam Abraham. 8Chi, che i k'aslemali ni'pa i kkitz'onoj i lajuj mutzaj, ike le xa je winaq i kekamik are kuriq i ij. Xwiri tz'ib'tal chupam uwuj i Dios chi mam Melquisedec, lik pacha k'a k'aslik. 9Ya itom chik chi i mam Abraham xuya jun mutzaj re i lajuj mutzaj che i mam Melquisedec. I mam Abraham le, are umam i mam Leví. Ke'el uri chi i mam Leví pacha ya xutoj jun tant re i lajuj che i mam Melquisedec. Are i mam Leví le, are i kimam i rajpatan i Dios. 10I mam Leví le, k'amaja kalaxik are xk'ulax umam, mam Abraham pa b'e rumal i mam Melquisedec. Xwiri konojel ike le k'a je o puch'akul i mam Abraham.

I keb' chak chi o chkiqul i rajchak i Dios

11I tinimit Israel xuk'am i atb'al tzij rumal i chak chi xki'an i rajpatan i Dios aj Leví. Wetene i rajpatan i Dios le lik utz u'anik i kichak xki'an ku' i winaq, lik rajwaxik tene chiki chi kwinaqir jun chik rajpatan i Dios chi umuq uxikin ti chik ma Aarón xwiri umuq uxikin ma Melquisedec.#7.11 Chi umuq uxikin i mam Leví. 12Man are kjalwachix i kichak i rajpatan i Dios, xaq kjalwachix uri i atb'al tzij. 13I qajwal chi kub'ij wach tz'ib'tal chupam uwuj i Dios, chi kach-il chik jun tzob'ajil re Israel, chi lik mijun rajpatan i Dios elnaq chke. 14Ujer, mijun chke umuq uxikin i mam Judá xki'an i chak re rajpatan i Dios, man i mam Moisés xuya ti kan i patan le pki'ab' ike.

15Iri lik mas ne saqil we i k'ak' laj rajpatan i Dios chi kwinaqirik lik keje pacha i mam Melquisedec. 16I Jesucristo, xya' upatan, rumal ti ratit umam, xwiri, yatal upatan rumal uk'aslemal chi o ucho'ab' chi kk'is taj. 17Man keje iri xub'ij i Dios chrij i Jesucristo:

Yet at wajpatan chi nti uk'isik apatan.

Xaqjun apatan pacha re i mam Melquisedec ujer.#7.17 Keje ile tz'ib'tal chupam uwuj i Dios. Salmos 110.4.

18Keje uri ile, chi i atb'al tzij re ujer xkanaj kanoq, man nti ucho'ab', xaq nti uchak chkito'ik i winaq. 19I ujer atb'al tzij re kan i mam Moisés, xtiki ti chkiyijb'axik i winaq chwach i Dios. Puk'exel ile xkanaj kan jun atb'al tzij chi lik utz, i lik qakub'am qak'ux che; rumali wo'or o chik usuk' kojtejeb' ru' i Dios.

Uchak i Jesús lik mas nim u'ij

20I Dios, are xu'an ile, lik xukuxtaj ub'i Ire puwi utzij, k'utb'al re chi qatzij i xub'ij. Xwiri keje ti ile xu'ano are xuya kipatan i jub'an winaq chwach Ire. 21Xwi che i Jesucristo, i Dios lik xukuxtaj ub'i Ire puwi utzij, man i uwuj i Dios Kub'ij che:

Lik xinkuxtaj inb'i puwi intzij are xinya chawe,

lik kinjalwachij ti innojb'al. Man xinb'ij:

“Yet at wajpatan ronojel ij saq.”#7.21 Keje ile tz'ib'tal chupam uwuj i Dios. Salmos 110.4.

22Keje ile i Jesús chi Tol qe lik xu'an jun trat, yab'al re ukowib'al qak'ux yoj chupam utzij, i trat le mas utz chwach i jun nab'e. 23I jub'an chik rajpatan i Dios mas je k'i, xwiri xa xek'isik, kekamik, man ike yatal ti kik'aslemal chi nti uk'isik. 24Xwiri, i Jesús kkam taj, rumali lik kuya ti upatan che jun chik. 25Rumali ronojel ij saq, ketotaj ni winaq chi ketejeb' ru' i Dios, lik rumal ukub'ib'al kik'ux che ire. Man lik k'aslik ronojel ij saq, kutz'onoj che i Dios pkiwi ike.

26Xel uri, chi Jesucristo are i atz laj rajpatan i Dios chi lik rajwaxik te'eq chqe. Ire lik utz, lik ch'am, nti mak atzalal chrij. Ire elsam chkixol i winaq chi je ajmakib', x-an che chi mas nim u'ij chwach i kaj. 27Ire keje taj pacha jub'an atz laj taq rajpatan i Dios, kkikamsaj i chikop ij ij, kkisujuj chwach i Dios. Tojb'al re i kimak ike; te'uri rumal i kimak konojel i winaq re i tinimit.#7.27 Levítico 9.7; 16.6. Xwiri i Jesús nti uchak ku'ano keje ile. Ire lik xa julaj xusujuj rib' che i kamik, tojb'al re kimak i winaq k-e ij saq.#7.27 Isaías 53.10. 28I atb'al tzij utz'ib'am i mam Moisés ujer, kuya i atz laj taq rajpatan i Dios pki'ab' achiyab' chi xa je ajmakib'. Xwiri, x-on panoq, i Dios xuya i patan le pu'ab' Uk'ojol. Lik xukuxtaj ub'i ire puwi utzij, chi saq laj tzij i kub'ij are xuya upatan pu'ab'. I Uk'ojol i Dios chi lik utz antal che uk'aslemal, lik arewi k-e ij saq chrij.

Currently Selected:

Hebreos 7: ACHICUB

Highlight

Compare

Copy