Hebreos 8

I Jesucristo are qajpatan re i k'ak' trat

1Ni'pa i kojtijin chub'ixkil chiwe, lik o uchak chi kita ub'e, are iri: O jun atz laj ajsujul sipon chi kub'inaq chik puwiqab'im ukub'ib'al i Dios chi o u'ij chila chikaj. 2Ire ku'an upatan pacha ajsujul sipon chila pa saqil laj ja re riqb'al ib' ru' i Dios; ile lik mas o u'ij man are i Dios yijb'awnaq, are ti winaq.

3I je atz laj ajsujul sipon, yatal kipatan chi kkisujuj kisipon i winaq, xaq kukamsaj i chikop chwach i Dios. Rumali o uchak chi i Jesucristo lik o i kusujuj chwach i Dios. 4Wetene ire o chi chwach i jyub' ta'aj, ajsujul sipon ti neri, man chi ya je o chik ajsujul sipon chi kkisujuj i sipon chi utaqom kan i u'atb'al tzij i ma Moisés. 5Xwiri ike kki'an kipatan chi xa pacha uk'exwach i patan chi k-an chila chikaj. Qeta'am ile chi xa k'exwachij man i mam Moisés, are xujeq uyijb'axik i lo'laj k'ijib'al re i Dios ujer, xuta utzij i Dios. Keje iri xb'ix che: “Cha'ana pen awib' chuyijb'axik ronojel pacha k-anaw uk'exwach chi xink'ut chawe chila tzam jyub'.”#8.5 Éxodo 25.40. 6Xwiri, i upatan i Jesús, mas nim u'ij chwach atz laj ajsujul sipon, man Ire are i jun chi kch'aw chqij re jun qatrat k'ak' ru' i Dios chi mas utz chwach i jun ujer. Mas utz man i Dios usujum chi lik kojuto.

Nab'e trat utz ti xelik

7I nab'e trat wetene utz xelik, nti neri uchak jun chik trat k'ak'. 8Xwiri i winaq je utz taj xe'el chwach i Dios:

“Rumali i Ajwal Dios keje iri kub'ij: Kuriq ni ij

kin-an chik jun trat k'ak' ku' i aj Israel, xaq ku' i aj Judá winaq.

9Keje taj pacha i trat chi xin-an ku' i katit kimam ujer. I trat le xin-an ku' che i ij

are xinchap li che ki'ab',

elsab'al li ke pa Egipto.

Xwiri ike xko'taj kan u'ankil intrat;

rumali xewo'taj kanoq. Keje ile kub'ij i Ajwal Dios.

10Xaq kub'ij: Are kuriq chik i ij,

kin-an chik jun trat k'ak' ku' i aj Israel winaq.

I trat chi kin-an ku' are iri:

Kinya in-atb'al tzij pkik'ux;

xaq kintz'ib'aj inno'oj pkanima.

Kel uri, in ki-Dios ni ike;

xaq ike lik je intinimit yin.

11K-on panoq,

mijun kuk'ut chik chke i rachi'il, kuk'ut ti chik chke i ratz ucha'. Nti chik uri uchak ile,

man konojel kketamaj ni inwach, chi ch'utiq,

chi nimaq kketamaj ni inwach.

12Yin kinkuy ni kimak chke,

lik kink'unsaj ti chik chink'ux ronojel i mak atzalal ki'anom.”#8.12 Keje ile tz'ib'tal chupam uwuj i Dios. Jeremías 31.31-34 (cf. Hebreos 10.16-17).

13Are kub'ij i Dios chi o chik jun trat k'ak', alaj uri chi ya x-elab' i nab'e trat. Ni'pa taq i ktijin u'elab'ik chi qas ti utz chik, xa tijin uri ksachik.

Currently Selected:

Hebreos 8: ACHICUB

Highlight

Compare

Copy