Hebreos 6

1Rumali, chqamaja b'i qab'e, chojk'iyoq k'a kojrijab' na. Chqamayij ch'ob'onik chrij i nab'e taq k'utunik chrij i Jesucristo; Mqakamulij chik ub'ixkil i ax qeta'am wi; To' ti xaqmanal taq kqach'ob'o, chqamayij u'anik i utz taj, Chojterej chrij i Cristo. Xaq chqamayij makunik man keje ile kojkam taj. Qeta'am chik chi rajwaxik kqakub'a qak'ux che i Dios. 2Xaq ujer tan ix nawnaq chik che i k'utunik chrij uqajsaxik ya piwi, xaq iweta'am chik usuk' uya'ik i'ab' pkiwi i winaq chi kekojon che i Dios, xaq i kiwalijik i kamnaq che i kamik; xaq iweta'am wach i tojb'al mak chi nti uk'isik kpe ni pkiwi i ne te re i Dios. 3Chqa'ana uri pacha xqab'ij, we kuya i Dios chqe kqa'ano.

4Man i jub'an chi xeb'in te'eq chisaq, xaq kina'om i utzil chomal re ire, xaq kina'om Lo'laj Utewal i Dios pkanima. 5Kilom chi utzij i Dios lik utz. Xaq kina'om ucho'ab' Lo'laj Utewal i Dios che i k'ak' laj kik'aslemal chwach i jyub' ta'aj chi kk'unik. 6We kjech'ab' kinojb'al lik ketzalij ti chali ru' i Dios, man ke'eloq chi ketijin tan chik churipik xaq chutz'awik i Jesús chwach i krus xaq kkiya uk'ix chkiwach konojel i winaq. 7Je keje pacha ulew chi k'iyalmul kutij jab', kuya uri uwach i tikon chke i ketikan chwach; ile utz laj ulew uri, i Dios kuya uri utzil chomal che. 8Xwiri i uwach ulew we xa k'ix kuya'o, we xa utz ti laj es kuya'o, nti uchak uri; o ni uri chwach kk'oqox rumal i Dios, xaq pa k'isb'al re, kporoxik.

9Qatzij, keje inb'im ile chiwe, wachalal chwach i Cristo; chi kinya rutzil iwach. Man kul ink'ux che chi kixtijin chu'anik i utz chi kmajaw chiwe; ki'ano man imajom b'i ib'e re tob'al ib'. 10Man i Dios, suk'ul i ku'ano. Ksach ti chuk'ux wach i utz i'anom yix; ksach ti chuk'ux i k'axnab'al ik'ux yix chke i je re i Cristo chi kkitij uyej. Xi'aljinsaj chi lik k'ax kina i Dios are xeito ike. Xaq k'a are kixtijin chu'anik wo'or. 11Lik kqaj yoj chi yix chijujunal mk'is i rayijb'al chu'ankil i utz. We keje ik'ux yix ile k'a pa k'isb'al ij, iweta'am uri chi kiriq ni chomal chi iwoy-em. 12Lik kqaj taj we xa kik'ayo, are chi'ana pacha kki'an ike chi kiriqom ronojel i usujum i Dios chke. Xkiriqo, man xkub'i kik'ux che i Ajwal, xaq xb'a'krij ti kik'ux chroy-exik ile. Keje ile chi'ana yix.

Sujunik xaq ub'ixkil pub'i i Ajwal

13I Dios are xusujuj che i mam Abraham ujer chi k-on panoq, kuya ni nim laj utzil chomal puwi. I Dios are xub'ij i tzij le, lik xukuxtaj rib', man nti jun chik atz u'ij chwach Ire. 14Keje iri xub'ij che: “Qatzij, lik nim laj utzil chomal kinya ni chawe xaq kin-an na chi kek'iyar ni amuq axikin”.#6.14 Génesis 22.16-17. 15I mam Abraham xb'a'krij ti uk'ux chroy-exik wach ub'im i Dios che. X-on panoq xuriq utzil chomal chi b'ital che rumal i Dios. 16I winaq, are kkaj kki'aljinsaj chi qatzij wach i kkib'ij, kkikuxtaj ub'i jun chik chi atz u'ij chkiwach ike. We xkib'ij ile, te'uri kuxlan i tzij. 17Keje xu'an i Dios ile. Xraj Ire chi kketamaj umuq uxikin i mam Abraham chi qatzij ku'an na pacha i ub'im, xaq pacha uch'ob'om. Rumali, xwi ti xub'ij chke wach i ku'an na, xaq xukuxtaj ub'i puwi utzij chi xub'ij, k'utb'al re chke chi kkiriq na wach usujum chke. 18Keb' tzij xub'ij i Dios. Nab'e, xub'ij chke chi kuya ni utzil chomal chke; i Dios kt'oron taj. Te'uri, i ukab' tzij, ire lik xukuxtaj ub'i puwi utzij le, chi ku'an na pacha ub'im chke. I keb' tzij le kjalwachix taj. Rumali, yoj chi qariqom qato'ik ru' i Dios lik kul qak'ux che chi kqil na pacha ub'im chqe. 19I oy-eniki ku'an chqe chi o ukub'ib'al qak'ux, xaq lik jikil i qanima. Keje pacha u'anom jun barco chi ksilab' taj are yuqul che i b'iroxik chi ancla ub'i.#6.19 Iri are jun b'iroxik re ch'ich' chi lik al, rumali kuya ti che i barco ksilab'ik. Kk'aq b'i k'a chupam i ya ru' i nimaq taq laso xaq kajwaxik man i barco kuyin ti rib'. Are jun oy-enik chi lik oknaq b'i k'a chrij i kortin prachoch i Dios chila chikaj. 20I Jesús chila xok wi che i k'ijib'al le#6.20 I mer tzij xub'ij are iri: Xok chrij i kortin. I usuk' ile: Xok che i K'ijib'al atz u'ij. I rachoch i Dios pa Jerusalén lik nim. Pa kkikoj wi u'ij i Dios, i pa ja le tasom upam, kojtal jun k'ul chunik'ajal. I nab'e tas, “Lo'laj k'ijib'al” kb'ix che. I ukab' tas, “K'ijib'al atz u'ij” kb'ix che; ile kkanaj chrij i kortin. Xwi i atz laj ajsujul sipon o pu'ab' kok chila, i xa julaj kok che i jun junab', kutz'onb'ej kuyb'al kimak i winaq. (Levítico 16), jaqb'al re i qab'e yoj. Keje xu'an ire ile, chi oknaq che upatan chi atz laj rajpatan i Dios. I upatan nti uk'isik, keje pacha upatan i mam Melquisedec ujer.#6.20 Salmos 110.4.

Currently Selected:

Hebreos 6: ACHICUB

Highlight

Compare

Copy