Hebreos 5

1Konojel i atz laj taq ajsujul sipon re i Dios, are achiyab' chi je chatal chkixol i winaq. Ch'iktal kij re kuk'utb'ej iwach chwach i Dios, xaq kukoj ik'exel xaq kusujuj chikop chi kuporoj chwach i Dios, tojb'al re kimak i winaq. 2I ajsujul sipon, lik juntir ktzaq chupam i utz taj, rumali o unimal uk'ux chke i winaq chi kemakunik, chi qas ti keta'am i saq laj tzij i xa je sachnaq. 3Rumal umaktajik lik rajwaxik chi kusujuj porom sipon rumal ronojel umak xaq rumal ronojel kimak i tinimit. 4Mijun to' ku'an aj-atzil ke ajsujul sipon che rib'; man kmajaw taj. Xwi i Dios o pu'ab' kch'ikaw rij xaq kyaw i nim laj patan le, keje ile xu'an i Dios are xucha i mam Aarón#5.4 Éxodo 28.1. ujer. 5Xaq keje i Jesucristo. Ire to' ti xu'an i atz laj rajpatan i Dios, are i Dios x-uluwik man ub'im che:

“Yet at ink'ojol;

wo'or inya'om ak'aslemal#5.5 Keje ile xub'ij: Salmos 2.7..”

6Xaq o jun chik tzij chupam uwuj i Dios chi kub'ij keje iri:

“Xaq yet at rajpatan i Dios chi nti uk'isik apatan.

Xaqjun apatan pacha re i mam Melquisedec ujer#5.6 Keje ile tz'ib'talik. Génesis 14.17-20; cf. Hebreos 7.1-2..”

7I Jesucristo are o chi chwach i jyub' ta'aj, reta'am chi i Dios o pu'ab' kuto chwach i kamik.#5.7 Mateo 26.36-46. Rumali, xo'ik xutz'onoj utob'al che; ko xch'awik are xutz'onoj che. I Dios lik xuta wach xtz'onox che, man i Jesucristo uya'om rib' pu'ab', wach kraj i Dios. 8Tupu Ire uk'ojol i Dios, xwiri chupam ronojel ni'pa i k'ax Ire xnawik chi rajwaxik chi lik arewi kkojon che i Dios. 9Keje ile, i Jesucristo xe'eloq jun suk'ul laj ajtol qe, rumali chi Ire are uxeb'al i totajik. Ni'pa i kkikoj utzij Ire, kkiriq ni kik'aslemal chi nti uk'isik. 10Rumali, i Dios xuya upatan chi are atz laj rajpatan ire, pacha upatan i mam Melquisedec ujer.

Chi'ana kwent moqxa kiwo'taj kan ukub'ib'al ik'ux che i Jesucristo

11K'a o te mas kqaj ub'ixkil chiwe chrij ile, xwiri, k'ax u'aljinsaxik chiwe, man k'ax umajik usuk' ki'ano. 12Lik ujer tan kixtijin chutayik utzij i Dios; lik kmajawik ix ajk'utunel chik. Xwiri, keje ti ile; xa o uchak kjeq tan chik uk'utik chiwe ni'pa i k'ax ti k-anik. Pacha ix ral taq ak'alab' chi k'a ketz'umanik, chi k'amaja kkitij wa. 13Ike chi k'amaja kkita ub'e pachike i utz chwach i Dios, je keje pacha i ak'alab' chi k'a ketz'umanik, nti kino'oj. 14We kkitij chik i wa, ya je nimaq chik uri, xaq o chik uri kino'oj. Man ujer tan keta'am chik pachike i utz, xaq pachike i utz taj.

Currently Selected:

Hebreos 5: ACHICUB

Highlight

Compare

Copy