Hebreos 4

1Tz'aqat k'a o i okb'al pa uxlanem le chi usujum i Dios, chi'ana kwent uri, man to' iwach uri we o jun chiwe chi kok ti che i uxlanem le. 2Man yoj xya' i utz laj tzij chqe keje pacha i qatit qamam, xwiri xajwax ti chke, xwi xkita, man ike xkijunamsaj ti kib' xaq xkikub'a ti kik'ux ku' jub'an chi xkikoj i utzij i Dios. 3Xwiri yoj chi qakub'am qak'ux che i Ajwal Dios kojok ni che i uxlanem chi sujtal rumal Ire. Qeta'am ile, man i Dios xub'ij i tziji:

Xpe woywal chke rumali xinb'ij:

“Qatzij, lik kinya ti chke ke'ok che i uxlanem wu' yin.”#4.3 Keje ile xub'ij, man ike xkikub'a ti kik'ux che. Salmos 95.11.

I Dios, are xub'ij i tzij le, ax uyijb'am wi i uxlanem le, k'a chuxeb'al li ij saq. 4Qeta'am ile, man chupam uwuj i Dios keje iri tz'ib'talik:

I Dios xu'an ronojel uchak, te'uri che wuqub' ij xuxlanik.#4.4 Keje ile tz'ib'talik. Génesis 2.2.

5Xaq kub'ij juyak chik uwuj i Dios:

Ke'ok ti che i uxlanem wu' yin.#4.5 Keje ile xub'ij i Dios. Salmos 95.11.

6Kraj i Dios chi o i k'a ke'ok ni che i uxlanem le, man i winaq chi xkita i utz laj tzij re i Dios ujer, xekojon ti che, rumali, xe'ok ti che i uxlanem le. 7Rumali, i Dios uch'ikom jun chik ij. X-on panoq xub'ij chik i tziji chke i winaq; “wo'or”; xcha. I tzij le xuya pujolom i mam David. Rumali, i mam David xub'ij i tziji chi tz'ib'tal kan chupam uwuj i Dios chke i winaq:

Wo'or, we yix kita uch'awb'al i Dios,

mi'an ko che iwanima.

8 # 4.8 Rumali, qeta'am chi k'a o i okb'al che i uxlanem, man xub'ij i mam David i tzij le. Qatzij, i ajk'amol b'e i katit kimam ujer, chi mam Josué, xeuk'am b'i che jun uxlanb'al. Xwiri, are ti saqil laj uxlanem chi kub'ij i Dios warali. Wetene are ile, keje teneri xub'ij i Dios, chi o chik jun ij. 9Rumali qeta'am chi k'a o jun chik uxlanem saqil re i tinimit re i Dios; 10man ni'pa i ke'ok pa uxlanem chi uyijb'am i Dios, ke'uxlan uri che ronojel wach i kki'ano, pacha xu'an i Dios, xuxlan che uchak. 11Chqa'ana pen uri qokik che i uxlanem chi sujtal chqe rumal i Dios. Man keje ile mijun ku'ano pacha xki'an i qatit qamam chi xkiqel utzij i Dios.

12Man i utzij i Dios lik k'aslik xaq o ucho'ab'. I utzij i Dios xaqjun ru' pacha jun ch'ich' jutut utzam, chi k'ulala o uware; naj kok wi chupam i qak'ux, xaq chupam i qanima. Ku'aljinsaj wach taq urayijb'al i qanima, xaq wach taq kuch'ob' i qajolom. 13Ronojel ni'pa i olik, nti kruwaj rib' chwach i Dios man lik are Ire anawnaq. Ronojel o chisaq chwach Ire; chwach ire lik nti ch'uqtal uwach. K-on panoq qonojel kqab'ij ni chwach ire wach i qa'anom waral chwach i jyub' ta'aj.

Jesús are i utz laj rajpatan i Dios

14I Jesús chi Uk'ojol i Dios, are atz laj rajpatan i Dios qe yoj, chi xel b'i chikaj. Rumali rajwaxik chi arewi lik kul qak'ux che i k'utunik chi qakojom. 15Are Ire, are jun atz laj rajpatan i Dios chi kril tob'al qawach, man reta'am xa oj winaq chi nti qas qacho'ab'. Xaq Ire ktzaqsax te'eq chupam i mak atzalal, pacha taq i tzaqsab'al chi kojik'aw wi yoj, xwiri, Ire nti jun umak xu'ano. 16Rumali chqakowirsaj qak'ux che i tejeb'ik ru' ukub'ib'al i Dios chi o u'ij i k'ax kojuna'o. Ire kril ni tob'al qawach xaq kuya ni utzil chomal chqe are o rajwaxik chqe.

Currently Selected:

Hebreos 4: ACHICUB

Highlight

Compare

Copy