Habacuc 3
3
Ub'ix i ma profeta Habacuc
1Iri are jun ulapanik i ma profeta Habacuc.
2Ajwal are intom yin iri chawe,
che ronojel ni'pa a'anom,
lik ku'an chwe chi lik o usuk' ukojik a'ij kin-ano.
Cha'ana wo'or che qak'aslemal
ni'pa i nimaq taq anik chi pacha xa'an ujer,
man keje ile xaq yoj kqetamaj na.
Chak'utu i tob'al awach chqe
tupu o awoywal.
3I Dios kpe che i ulew Temán;
che utzam jyub' Parán kpe wi i Lo'laj Dios.
I uchomalil klik'taj b'i chwach ronojel i kaj,
i ronojel uwach i jyub' ta'aj knoj che ub'ix.
4Kk'unik upasim rib' chupam uwalch'inik
chi lik krepratik, i che u'ab' ke'alax li utzunb'al a'
chi kkik'ut i cho'ab' chi o che Ire.
5Chwach Ire keupon uk'iyal taq b'iroxik chi lik xib'in ib',
i chrij teren b'i a' chi kjarsanik.
6I jyub' ta'aj ksiksatik are ktak'i Ire;
i tinimit lik ke'ok il che are kkilo;
i nimaq taq jyub' chi lik ax je o wi kewulij loq
xaq i ujer utzam taq jyub' kejarik;
xwiri ub'e i Dios lik re ronojel ij saq.
7Yin je wilom i winaq re Cusán
lik je sachnaq chupam uyej,
i winaq re i Madián
kuwam kib' rumal kixib'rikil.
8¿Mi'naq awoywal Ajwal chkij i raqana?
¿Lik mi'naq awoywal chkij i mar?
¿Rumal ile lik katb'in rij taq akaway
xaq keje ile lik kat-an chupam ach'ich' re ab'inb'al xaq re ch'akanel?
9Lik ayijb'am chik i k'aqb'al ach'ab'
xaq je yijil chik ronojel ach'ab'.
Ru' i raqana ajaqom upam ulew a'anom cholajil che.
10I nimaq taq jyub' naj uwi kesiksatik are katkilo;
lik nim ucho'ab' i jab' kpe chikaj,
i uchoyil i nim laj mar lik krojojik
tz'aqat ke'el b'i nimaq taq ub'olol puwi.
11I ij xaq i ik' ke'el ti ipa kuwam wi kib'
chwach i walch'inik re ach'ab'
xaq chwach i a' chi ktzijlaj che i ache' ch'ich' utzam.
12Are petnaq awoywal katmalkat chwach ronojel ulew;
xaq ru' i nim laj awoywal kaya'ya kiwi i nimaq taq tinimit.
13Yet at elnaq chuto'ik atinimit
xaq chuto'ik i ajawinel chi yet xach'ik rij.
Xasachsaj uwach uwi i rachoch i utz ti laj winaq,
xaq lik xaya kan ukub'ib'al rachoch chisaq.
14Lik ru' uch'ab' i aj-atzil xakamsaj,
i achiyab' chi je ajrij taq kaway lik je keje pacha jun nim laj jab' tew upam,
kejuk'uk'ik xkik'aq li kib'
jachb'al re kixol i jub'an chi nti kich'ojb'al
kamsab'al ke ani'al.
15Rij taq akaway katb'in puwi i mar,
chi lik nim uwach xaq lik tz'intz'ik cho.
16Are xinta ronojel iri lik xinxij wib'.
Inchi' lik xujeq yutzyatik,
i wa' lik xelokrijik,
lik ronojel inch'akul xsach ucho'ab'.
Tupu keje ile, lik utz roy-exik i ij kin-ano
are i Dios keuya i winaq pa k'ax
chi je yij che i ch'oj chqij.
17-18Are uri lik kinkikot ni rumal i Ajwal
chi tol we. Kinkoj ni u'ij tupu kesijan ti uche'lal i higo xaq kewachin ti uva xaq i olivo;
tupu kewachin ti tikon pa taq es;
tupu kek'is i tzob'aj taq chij
xaq nti chik chikop pa kikoral.
19Man i Ajwal kuya incho'ab';
ku'an che iwa' chi lik kuch'ij b'e pacha i kej
xaq kinuk'am b'i tzam taq jyub' ipa kintotaj wi.
Currently Selected:
Habacuc 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
