Habacuc 2
2
K'isb'al ula'ik uwach rumal i Dios
1Lik in yijil na xaq lik kink'ak'alin na,
keje pacha ku'an i ajchajinel are o puk'ijib'al,
ilb'al re wach kub'ij i Ajwal chwe
xaq wach ula'ik uwach ku'an chwe rumal i xinch'ojij che.
2I Ajwal xula' uwach chwe:
“Chatz'ib'aj chwach tz'alam re xo'ol chrij wach kink'ut chawe,
man keje ile lik cholol rajlaxik uwach k-anik.
3K'amaja ni kuriq i ij
chi k-antaj i ilanik pwachiji;
xwiri lik k-antaj na.
Yet chawoy-ej tupu kb'aytajik,
xwiri lik kuriqa ni u'ijlal.
4Chatz'ib'aj chi i utz ti laj taq winaq kki'an nim che kib',
xwiri i je suk'ul laj taq winaq kek'asi ni rumal ukub'ib'al kik'ux che i Dios.”
¿Ipa kekik'isa wi i je aj-anol taq k'ax?
5I winaq chi kkikoj ki'ij kkaj wetene o i taqanik pki'ab';
lik arewi ke'uxlan ti chutzukuxik xaq lik arewi kkaj mas,
tupu i cho'ab' re taqanik olik xa t'oronel.
Kkijaq kichi', keje pacha i jul re kamnaq;
lik kenoj taj pacha i kamik,
rumali kkimayij ti ch'oj chkij
uk'iyal nimaq taq tinimit re kkich'akb'ej ke.
6Xwiri konojel i nimaq taq tinimit chi xech'akik
kkitze'ej ni jun chi xech'akawik, kkib'ixaj iri che:
“¡To' awach yet chi ka'an taq b'eyom che awib'
ru' taq i b'iroxik chi awe taj!
¿K'a junpa nawi kamayij umolik uchi'
i b'eyomal chi xamajo?”
7Are nti kach'ob' che, keupon ni o ak'as ku' chuk'amik i kimer,
kk'un ni saq chkiwach i katyaw pa k'achirik
xaq lik katkich'anb'a ni kanoq.
8I nimaq taq tinimit kkimol ni kib' chawij,
kkel-aj nu b'i ub'itaq awe pacha xawel-aj b'i yet chke.
Kki'an ni chawe chi katoj ronojel ni'pa i utz taj chi ka'ano,
i ch'oj chi xa'an pa tinimit
xaq chkij i nimaq taq tinimit i konojel uwinaq.
9¡To' awach yet chi anojsam awachoch
ru' awel-anik,
re tob'al awib' chwach i k'ax!
10Ru' i anik le xaya awachoch pa k'ixb'alil,
lik yet xatzukuj usachik awach
rumal xasach kiwach uk'iyal nimaq taq tinimit.
11I ab'aj ke i tapial xaq i che' re et kesik'in ni chawij yet.
12¡To' awach yet, chi keayak atinimit
puwi i uxeb'al i t'oronik tzij, xaq puwi u'anik i suk'ul ti laj atb'al tzij!
13I Ajwal chi ronojel ktiki che
ku'an ni che achak chi utz taj, lik to' katkosik,
man i a' kusachsaj nu b'i uwach ronojel i achak.
14I retamaxik uchomalil i Ajwal
kunojsaj ni uri ronojel uwach i jyub' ta'aj,
keje pacha i ya chi kunojsaj i mar.
15¡To' awach yet, chi kea'ab'arsaj awachalal
ru' uwa'al uva muqb'am chi a'anom junam che ru' itzel laj taq es chi pacha taq b'enen,
re qajsab'al ki'ij keje ile k-iltaj i kich'analik!
16Puk'exel uya'ik a'ij, lik kaya ak'ix,
man i Ajwal ku'an ni chawe chi katu' uwa'al uva muqb'am chupam jun tu'b'al,
chi ku'an ni chawe chi kak'ut ni ak'ixb'alil
xaq lik kuqajsaj ni uri unimal a'ij.
17I k'ax chi xa'an che i jyub' Líbano
ktzalij ni chawij yet,
xaq lik kaxij ni awib' rumal i kikamsaxik uchikop.
Ile kpe ni chawij rumal i k'ax chi a'anom
xaq i ch'oj chi xa'an pa nimaq taq tinimit
xaq chke i kiwinaq.
18¿Wach taq wa uchak jun k'exwach re ab'aj
are utzinnaq chik uyijb'axik?
¿Wach taq wa uchak jun k'exwach
chi xwi katuk'am b'i che i t'oronik?
I tiox chi xaril je antalik kech'aw taj;
¿B'uchak uri kukub'a uk'ux
i achi chke chi aj-anol ke?
19¡To' awach yet, chi che jun tiox chi xaril antalik re che'
kab'ij che chi chk'un saq chwach,
xaq kab'ij taq che jun ab'aj mem, chi ktak'i anoq!
¿Ketiki nawi ike chub'ixkil jun tzijonik?
¡Ketiki taj, man nti kik'aslemal,
tupu tz'ajom kij ru' an-o'oj xaq i saq-o'oj!
20Xwiri i Ajwal o chupam i lo'laj rachoch:
¡Konojel i winaq chwach ulew lik mech'oqow chwach Ire!
Currently Selected:
Habacuc 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
