Sofon%EDas 1
1
Ij re i roywal i Ajwal
1Iri are tzijonik tzij chi Ajwal xub'ij che i ma Sofonías che taq i ij are i ma Josías, chi uk'ojol ma Amón, are ajawinel re i Judá. I ma Sofonías uk'ojol ma Cusi, i ma Cusi uk'ojol i ma Gedalías, i ma Gedalías uk'ojol i ma Amarías, i ma Amarías uk'ojol i ma Ezequías.
2Iri are kub'ij i Ajwal:
“Lik kinsach uwach ronojel
ni'pa o chwach i jyub' ta'aj.
3Kinsachsaj ni kiwach i winaq xaq i chikop, kinsachsaj ni kiwach i tz'ikin xaq i kar,
kinkoj ni tzaqsab'al ke itzel laj taq winaq,
xaq kinsachsaj ni kiwach i winaq chwach i jyub' ta'aj.”
Iri are i Ajwal kub'ij:
4“Kinrip nu b'i in-ab' chrij i tinimit Judá
xaq chkij konojel i je jeqel pa tinimit Jerusalén.
Kinchup nu b'i uwach che i k'ijib'ali ronojel ni'pa kkuxtaw ub'i
i saqil ti laj dios Baal,
xaq keje ile kin-an chke i kib'i i je ajsujul sipon.
5Kinsach ni kiwach ni'pa i ke'an b'i chwi taq ja
kojb'al ki'ij i ch'umil,
xaq keje ile kin-an chke i kexuki
chukuxtaxik inb'i chi xaq kikuxtaj ub'i i dios Milcom.
6Xaq kinsach ni kiwach ni'pa i kkijek' kib' chinwach,
xaq ni'pa i kinkitzukuj taj xaq kek'un ti chutz'onoxik chwe.”
7¡Mixch'oqow chwach i Ajwal,
man u'ij i Ajwal lik naqaj chik o wi!
¡I Ajwal usujum jun sipon,
ke konojel i je usik'im ru'!
8“Che i ij re i sipon kinya ni utojb'alil chke i je aj-atzil, kub'ij i Ajwal,
xaq chke i rak'al i ajawinel
xaq chke konojel ni'pa i kkikoj ki'u' re jun chik tinimit.
9Xaq ke'inya ni pa tojpen che i ij le
ni'pa ike chi ke'ik'aw puwi taq uchija,
xaq ni'pa ike chi kki'an ch'oj xaq i t'oronik
chi kachoch i kajaw.”
10Keje iri kub'ij i Ajwal:
Che taq i ij le ktataj ni sik' re tz'onb'al tob'al ib'
k'a che li Uchija ke i Kar.
Kesik'in na li winaq che Ukab' Tasaj re i Tinimit
xaq ktataj ni uch'awb'al i ul chi kwulij li chwi taq jyub'.
11¡Chixwuyuyoq, winaq re i jutasaj re i tinimit Mactes,
man konojel ajk'ayinel kekamik,
konojel ni'pa i kechakun ru' mer ani'al lik ksachsax kiwach!
12Kuk'ulmaj ni che i ij le,
chi kinsolij ni Jerusalén na'al ru' jun tzuk'b'al
xaq kinya ni utojb'alil
chke i winaq chi to' je uxlannaq
pacha u'anom i uwa'al uva muqb'am are k'olom xaq qajnaq uxe',
chi keje iri kkib'ij pkik'ux:
“¡I Ajwal lik nti ku'ano, ku'an ti i utz xaq ku'an ti i utz taj!”.
13Rumali i kib'eyomal kel-ax nu b'i chke
xaq ni'pa i kachoch ksachsax ni kiwach.
Kkiyak ni ja, xwiri kejeqi ti chupam;
kkitik ni uva, xwiri kkitu' ti uwa'al uva muqb'am che.
14¡Lik xa naqaj chik o wi i nim laj u'ij i Ajwal!
¡Lik naqaj chik o wi, lik juntir kk'unik!
Che i ij le ktataj i sik'inik chi tzel ktatajik i konojel ni'pa ko kiwach ke'o' na!
15Lik are ni jun ij re i oywal,
re uyej xaq re i b'is,
re tzaqik puyej
xaq jun ij re equmal chi lik tz'inilik equm,
re eqmuj xaq re k'iyal taq muj chi lik equm ktzunik;
16Lik are ni jun ij re kich'awb'al i trompeta xaq sik'inik
chkij i nimaq taq tinimit chi lik sutim kij,
xaq i nimaq taq ja tak'taq.
17I Ajwal kub'ij:
“Keink'achirsaj ni winaq.
Keb'in na pacha taq je potz',
man xemakun chinwach Yin.
I kkik'el klemem na pacha i uk'aj ulew,
xaq i kiti'lal t'ub'ul ni chila pacha taq kis.”
18Che i ij re i roywal i Ajwal,
lik ketotaj ti i winaq mitene ru' i kisaq-o'oj xaq i ki'an-o'oj,
man i u'a'ul i roywal i Ajwal
kuk'at nu b'i ronojel i tinimit.
¡Lik konojel i winaq chwach i jyub' ta'aj
lik juntir ksachsax b'i kiwach!
Currently Selected:
Sofon%EDas 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
