Habacuc 1
1
I ma Habacuc kch'ojin chrij i suk'ul ti laj atb'al tzij
1Iri are i tzijonik chi Ajwal xuya retamaxik che i profeta ma Habacuc.
2Ajwal, ¿K'a junpa kinata na man kinsik'in chutz'onoxik tob'al we chawe,
i yet kinata taj?
¿K'a junpa kintz'onoj ni chawe rumal i ch'oj,
i yet katk'un ti chqato'ik?
3¿B'uchak ka'an chwe chi kwil k'iyal taq k'ax xaq k'iyal taq uyej?
Sutim wij che i ch'oj xaq i sachanik;
xa'ipa o wi ch'oj xaq i oywal.
4K-an taj pacha kub'ij i atb'al tzij,
man lik xa kya'yax ki'ij i winaq,
man i utz taj kuterb'ej i utz,
i kujech'ab'saj b'i suk'ul laj atb'al tzij.
Ula'ik uwach rumal i Ajwal
5“Yix chiwila i nimaq taq tinimit chi kisutim iwij;
lik chiwila xaq lik chixija iwib' che.
Man lik ya kinjeq u'anik i b'iroxik
chi yix lik kikoj taj, we o taq jun kulap chiwe.
6Lik keinyak ni aj Caldea che i ch'oj,
chi je are winaq chi lik je k'an,
chi lik arewi kiya'om kib' che i b'inik chwach taq i jyub' ta'aj,
chi ke'e k'ulala kki'an ke che i ulew chi ke taj.
7Lik ko kiwach, lik je xib'in ib',
lik keta'am ti jun chik atb'al tzij, lik xwi keta'am i ke ike.
8I kikaway lik mas kkich'ij i anem chkiwach i b'alam,
lik mas je itzel chikop chkiwach i utiw chi je o pa tz'inilik jyub' chaqij.
I je ajrij taq kaway lik je k'i ke'anik
xaq k'a chinaj loq kkijeq li ch'oj, keje
pacha i kotxik chi kuk'aq li rib' chrij uti' are kuchapo.
9Ni'pa kkik'ulaj chkiwach is kki'an k'ax che;
are ktijin kib'inik lik kkiya kan i xib'rikil,
i lik mas je k'i i winaq kekik'am b'i prexil
chwach i seneb' re i mar.
10Kekiyo'ya i ajawinelab'
xaq i winaq chi o ki'ij.
Xa kkitze'ej i tapial nimaq uwach,
man kkit'ub'a ulew re kik'aw pkiwi i te'uri kekichapo
xaq lik kekik'am b'ik.
11Are keik'awik je keje pacha jun jab' tew upam;
keta'am ti uwach jun dios, lik xwi taq i kicho'ab' ike keta'am.”
K'ak' uch'ojinik i profeta Habacuc
12Ajwal, ¿Xatab'a at o ti Yet ronojel ij saq,
lo'laj in-Dios Yet chi lik katkam taj?
Ajwal xaq at tol we,
Yet aya'om kicho'ab' aj Caldea
man keje ile ike kki'an ni i a'atb'al tzij.
13Yet lik at ch'am rumali kach'ij ti rilik i utz taj,
man kawil ub'e rumali kawaj ti rilik i mak atzalal;
¿B'uchak ut to' keataqej xaq nti kab'ij chke i ajkamsanel,
xaq lik nti kab'ij che utz ti laj winaq
are ku'an k'ax chke i mas je utz chwach ire?
14¿B'uchak ka'an chke achiyab' chi
pacha je kar aj pa mar,
chi xaq pacha je chikop chi nti k-ataw tzij pkiwi?
15I aj Caldea kki'an ke chke jub'an chik tinimit
pacha i ajchapol kar ku'an re che i kar:
Kuchap ru' i ral xok ch'ich' xaq ru' atraya,
are je umolom chik, lik kkikotik.
16Rumali i ajchapol kar lik kukoj ki'ij i ratraya xaq i xok ch'ich',
xaq kusujuj i poronik xaq kuk'at pom kojb'al re ki'ij,
kumal ike le o wach kutijo xaq lik k'i o ru'.
17Keje ile, ¿Xatab'a kkimayij ti qachapik aj Caldea ru' katraya?
¿Lik nti k'axnab'al kik'ux chke i winaq man kkimayij ti kikamsaxik?
Currently Selected:
Habacuc 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
