Ezequiel 5
5
1I Ajwal xub'ij chwe: Winaq, wo'or chak'ama jun kuchil chi lik o uware pacha i nawax re elsab'al ismachi', xaq chasolo b'i awi che ajolom xaq keje awismachi'. Chak'ama jun pexu, i chajacha upam awi, cha'ana oxib' mutzaj che. 2Are kutzin i ch'oj che i tinimit, chak'atsaj jun chke i mutzaj re awi punik'ajal i nim laj tinimit; te'uri chak'ama jun kuchil, xaq chak'atzij i ukab' mutzaj re awi chrij chwach i nim laj tinimit, i k'isb'al mutzaj re awi kakichersaj b'i pa tew. Yin kin-e ni chkij i winaq re i nim laj tinimit, ru' jun ch'ich' pin-ab' chi k'ulala o uware. 3Chak'ama keb' oxib' che i wi'ij le, i chaxima che uchi' a'u'. 4Te'uri chak'ama keb' oxib' chik, chak'aqa pa a' man keje ile kek'atik. Chila kel wa li a' chrij i tinimit Israel.
5Yin in Ajwal, kinb'inik: Iri are i tinimit Jerusalén. Yin xinyaw chkixol ni'pa i tinimit xaq chkixol i nimaq taq tinimit. 6Xwiri ire xuqel in-atb'al tzij xaq intaqanik, i xe'eloq chi mas utz taj chkiwach i jub'an chik tinimit xaq nimaq taq tinimit chrij chwach, man kkojon ti che in-atb'al tzij xaq k-on taj wach kintaq chu'anik.
7Rumali, Yin in Ajwal, kinb'ij: Yix lik mas ix qelqel chkiwach jub'an chik tinimit chi je o chiwij chiwach, xaq i'anom taj wach ix intaqom che; mitene i'anom i atb'al tzij ke i tinimit chi o chiwij chiwach. 8Rumali, Yin in Ajwal, kinb'ij: Xaq Yin kin-an ni ch'oj chawij yet, tinimit Jerusalén; lik chkiwach i winaq kinya ni utojb'alil pawi rumal amak, 9are jun anik chi lik in-anom taj chi xaq lik kin-an ti chik. Lik ch'am taj ni'pa i ka'ano. 10Chaxol yet o ni qajawxelab' chi kekitij kak'al, xaq o ni i alk'uwalxelab' kekitij i kiqajaw. Kinya ni utojb'alil pawi, xaq ni'pa kek'asi na keinkichersaj nu b'i chwach ronojel i jyub' ta'aj. 11Yin in Ajwal, kinsaqij ru' ink'aslemal: Man yix i qajsam u'ij i lo'laj wachoch ru' i tiox chi lik je ch'am taj xaq ru' i ki'ano chi lik ch'am taj, xaq keje Yin kin-an k'ax chiwe, lik kwil ti tob'al iwach; xaq mitene kinya i k'axnab'al ink'ux chiwe. 12Jun urox uk'iyal chke i awinaq kekam ni rumal itzel laj taq yob'il xaq che i numik chaxol yet, jun chik urox uk'iyal kekamsax ni kumal i ajch'oj chkij chi je o chkij chkiwach, i urox uk'iyal chi xekanaj kanoq keinkichersaj nu b'i chwach ronojel i jyub' ta'aj. Yin kewoqtaj ike ru' jun ch'ich' pin-ab' chi k'ulala o uware. 13Are uri kwesaj li woywal; kin-an na chi kkub'i uk'ux i woywal chkij ike, keje ile kkub'i ni ink'ux. Are wesam chik i woywal chke, kketamaj na chi Yin in Ajwal are xinb'ij ile rumal woywal rumal keterej chrij jun chik. 14Yin kin-an ni chawe chi kattzaq pa k'iyal taq uyej, tinimit Jerusalén; kinqajsaj ni a'ij chkixol i tinimit chi je o chawij chawach, keje ile konojel katkilo ni'pa keik'awik. 15Yin are kin-at tzij pawi lik ru' jun nim laj woywal, kinya utojb'alil amak ru' nim laj woywal, lik nim utojb'alil kinya chawe, konojel kkib'ij k'ax chawe xaq katkiyo'ya, xaq ke'eloq chi to' at ajya'ol k'ix chke i tinimit chi je o chawij chawach. Yin in Ajwal, xinb'ij ile. 16Yin kin-an na chi kpe i numik piwi yix, pacha i ch'ab' chi kekamsanik. Qatzij, kin-an ni chiwe kpe i k'ax piwi sachb'al iwach, numik xaq i wa'jal. 17Qatzij, kin-an ni chiwe chi kpe numik, yob'il xaq kamik piwi, xaq itzel taq chikop kkitij nu b'i konojel iwak'al; xaq kin-an ni chiwe chi k'i chiwe yix kixkam ni pa ch'oj. Yin in Ajwal, xinb'ij ile.
Currently Selected:
Ezequiel 5: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
