Ezequiel 6
6
Ma Ezequiel kukoj kimak i tiox chi xaril je antalik
1I Ajwal xinu'ijla xaq xub'ij chwe: 2“Chattaqen pkiwi i jyub' re Israel xaq chatch'aw chke pinb'i yin. 3Keje iri chab'ij: Chita yix jyub' re Israel, wach kub'ij i Ajwal chke i jyub', tzam taq jyub', raqana xaq uwa taq ta'aj: Kin-an ni chiwe chi kpe i ch'oj piwi, xaq usachsaxik utzam taq jyub' re awulew pa koksax wi ki'ij i tiox chi xaril je antalik. 4Kin-an ni ch'aqa taq che i k'ijib'al ipa kisuj wi sipon, ipa kik'at wi pom xaq kin-an ni chke i achiyab' ketzaq pulew kekam chkiwach i tiox chi xaril je antalik. 5Kinjab'ij na li ch'akulaj kamnaq ke aj Israel chkiwach i kitiox chi xaril je antalik xaq kinkichersaj b'i kib'aqil chrij chwach i k'ijib'al ipa kporox wi sipon. 6Che ronojel i k'ijib'al ipa ix jeqel wi yix, nimaq taq tinimit ksach ni kiwach xaq ni'pa i k'ijib'al re kojb'al ki'ij i tiox chi xaril je antalik lik kewulij na. I sujb'al kisipon lik ksach kiwach, ni'pa i kitiox chi xaril je antalik, ke'on ch'aqa taq; xaq i sujb'al sipon ipa kkiporoj wi pom kewulij na; ronojel ni'pa i'anom yix, lik ksach ni uwach. 7Yix are kiwilo chi je k'i winaq kekam chixol, kiwetamaj ni uri chi are Yin in Ajwal. 8Xwiri Yin kin-an na chi jujun chiwe yix kixtotaj ni chwach i kamik xaq kixk'asi na, chi ix kichersam b'i pa nimaq taq tinimit. 9Ni'pa i xek'asi kanoq kink'un ni chkik'ux pa nimaq taq tinimit le; kk'un ni chkik'ux ni'pa i k'ax xin-an chke rumal xekojon ti chwe xaq xinko'taj kanoq man xeterej chrij i tiox chi xaril je antalik re kojb'al ki'ij. Ike lik kmuluw ni kik'ux chke kib' rumal ni'pa i utz taj ki'anom, xaq rumal ni'pa i ch'am taj chi xki'an pkik'aslemal. 10Rumali kiwetamaj na chi Yin in Ajwal i are xinb'ij chi kintaq li k'axi piwi, lik to' ti xinb'ij.”
11I Ajwal xub'ij chwe: “Chatjilawoq, chakojo ab' xaq chakojo aqan; chatsik'in ru' k'axk'ol rumal i mak atzalal chi ch'am taj re i tinimit Israel, man kkam ni rumal i ch'oj, rumal i numik, xaq rumal i yob'il. 12Ni'pa i je o naj kekam ni rumal i yob'il, ni'pa i je o naqaj kekam ni pa ch'oj, are i kek'asi kanoq, kekam ni rumal numik. Keje ile kintz'aqatsaj i woywal chkij ike. 13Are kekil i kamnaq chkixol i kitiox chi xaril je antalik, xaq chrij chwach i porb'al sipon, xaq chwi nimaq taq jyub', tzam taq jyub', xe taq rax che', xe taq sik'al chi lik rojraq uxaq, xaq che taq i k'ijib'al ipa xkisujuj wi i kunb'al muy che i kitiox chi xaril je antalik, are uri kketamaj na chi Yin in Ajwal. 14Kinyak ni in-ab' pkiwi re uya'ik utojb'alil kimak, pa wiqab' tz'inilik jyub' chaqij k'a pa jyub' Diblat pa moxab', kin-an ni che utinimit xaq ni'pa taq kk'ijib'al jun tz'inilik jyub' chaqij chi lik xib'in ib'. Are uri kketamaj na chi Yin in Ajwal.”
Currently Selected:
Ezequiel 6: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
