Ezequiel 4
4
I ma Ezequiel kutzijoj i ch'oj chrij i tinimit Jerusalén
1Yet, winaq, chak'ama jun xan, chaya chawach xaq chwach i xan le cha'ana uk'exwach i nim laj tinimit Jerusalén. 2Te'uri chasutij rij ku' i achiyab' chi je yij che i ch'oj xaq ru' i b'iroxik re ch'ojb'al, cha'ana jun tapial chrij chwach, i jun anb'al b'ik, man keje ile k-aljinik pacha jun tinimit sutim rij. 3Te'uri chak'ama jun uxaq lámina re ch'ich' xaq chakojo chaxol yet ru' i nim laj tinimit, chi lik pacha jun tapial, chat-ol chwach i nim laj tinimit, pacha taq ka'an ch'oj ru'. Iri kajwax na re k'utb'al chke aj Israel.
4Yet katkotz'i na i katxoti ni pa moxim, xaq kaya ni awib' chuxe' umak i tinimit Israel. Lik arewi katkotz'i na i katxoti na, xaq lik kawuk'aj ni uri umak chawij. 5Lajuj b'elejlajujwinaq (390) ij kawok'aj umak i tinimit Israel, ke'eloq jun ij che jujun junab'. 6Are atz'aqatsam chik i ij le, katkotz'i ni chik uri i katxoti ni pa wiqab'im xaq kaya ni chik awib' chuxe' umak i tinimit Judá, kawinaq (40) ij ke'eloq jun ij che jujun junab' rumal umak. 7Te'uri kattzalij chik pa tinimit Jerusalén, sutim rij kumal i ajch'oj; kab'or ni u'ab' i akoton chrij ateleb' xaq katlapan pinb'i chrij i tinimit rumal i umak. 8Chawila pe', katinyut' ru' laso, man keje ile kattiki ti chupisklixik awib' k'a katz'aqatsaj ni ij chi katij uyej.
9Chak'ama jub'i' trigo, cebada, mijo, avena, habas, lentejas; cha'ana junam chke ronojel ile chupam jun b'oj, ru' ile cha'ana awa re trigo. Are ile katij ni che lajuj b'elejlajujwinaq (390) ij are at kotz'olik xaq at xotol pa moxim. 10Katij ni awa che u'oril chi ach'ikom, pa taq tasaj re nik'aj pexu che jujun ij; 11I aya' katu' ni che u'oril chi ach'ikom, pajb'al re keb' tu'b'al ya che jujun ij. 12I awa are ni pacha jun wa lejom re cebada, cha'sam pa a', i puk'exel si' are ni ukis winaq kakojo, xaq kayijb'a ni che jun k'ijib'al ipa katkil wi winaq.
13Te'uri i Ajwal xub'ij chik: “Ch'am ti laj ti'b'alil, lik keje pacha ile kkitij ni aj Israel pa nimaq taq tinimit ipa keintaq wi b'ik.”
14Yin xinla' uwach che: “Xwiri, Ajwal, yin mita juyak pink'aslemal inchapom b'iroxik ch'am taj; mita juyak intijom ti' re jun chikop chi kamnaq utukel, o we xa raqch'im taq kumal itzel laj taq chikop, xaq intijom ti ti' chi ch'am taj.”
15Are uri ire xub'ij chwe: “Utzi', kinya chawe chi kakoj ukis chikop puk'exel i ukis winaq, re cha'sab'al awa re trigo.”
16Te'uri xub'ij chwe: Kin-an na chi kpe wa'jal pa tinimit Jerusalén. I ti'b'alil xa kpaj chik chke, xaq i winaq ru' b'is kkitij na; xaq i ya lik kpaj ni chke, i ru' xib'in ib' kkitu' na. 17Kk'is ni ya xaq ti'b'alil, xaq kkitaqej ni kib' chkiwach, lik kkixij kib'. I rumal kimak lik je k'aslik k-ay kich'akul kok'ilal.
Currently Selected:
Ezequiel 4: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
