Ezequiel 45
45
Unimal i ulew chi o u'ij chi yatal pu'ab' i Ajwal
1Are ki'an sakinik chrij i k'ijib'al re kya' ke chkijujunal i tzob'ajil, o uchak kkikanaj kan jub'i' ulew chi o oxib' lew che unajtil i raqan, xaq o keb' lew ru' nik'aj che uwach, ile rajwaxik chi kya' pu'ab' i Ajwal. Ronojel i k'ijib'al le lik are i ulew chi o u'ij. 2Are ile kk'olik re i rachoch i Ajwal i unimal kya' wuqub' wajxaqwinaq (167) xik'ab' pa taq utzal, ksutix rij ru' jun jamjik k'im chi o waqlajuj xik'ab' ru' nik'aj che uwach. 3I k'ijib'al chi k'oltalik re i Ajwal kkoj ni k'utb'al che ulew le chi o oxib' lew che unajtil raqan i mas che jun lew o che uwach, chi lik are i k'ijib'al chi lik mas o u'ij: Chila na kyak wi rachoch i Ajwal. 4I k'ijib'al le kya' ni chke i ajsujul sipon chi kki'an kipatan prachoch i Ajwal xaq ketejeb' ru' Ire re kki'an kipatan. Chila o ni kik'ijib'al re kachoch. Are ni jun k'ijib'al chi elsam re u'anik patan re i Ajwal, lik yijb'am re rachoch i Ajwal. 5Xwi ta la ile, o chik jun ulew chi o oxib' lew che i raqan, i uwach mas che jun lew o che, ile k'oltalik re kik'ijib'al aj Leví chi kki'an kipatan prachoch i Ajwal, man keje ile o ni kitinimit ipa kejeqi wi. 6Pa k'isb'al re, o ni uchak kk'ol jun k'ijib'al re i tinimit chi unimal o oxib' lew che unajtil i raqan, mas che i nik'aj lew o che uwach, chutzal i k'ijib'al chi yatal pu'ab' i Ajwal. I ulewi ke ni konojel i winaq aj Israel.
I k'ijib'al chi k'oltalik re i aj-ok'al utzam i tinimit
7Xaq o ni jun k'ijib'al chi k'olom re aj-ok'al utzam i tinimit. Jun uchi' ktzun ni prelb'al ij, i jun chik uchi' o puqajb'al ij, chi ke'eloq, uchi' kkanaj che utzal i k'ijib'al chi o u'ij xaq keje i jun chik uchi' kkanaj che i k'ijib'al re i tinimit. Re prelb'al li ij xaq re puqajb'al ij, xaqjun kinimaqil kaqan pacha jun chke i k'ijib'al chi yatal che jutzob'aj aj Israel. 8I ulewi, re ni aj-ok'al utzam i jalajuj taq tinimit pa Israel; keje ile kki'an ti chik k'ax i aj-ok'al utzam i jalajuj taq tinimit chke inwinaq, man keje ile kkiya kan kulew chke aj Israel chrij i kitzob'ajil.
Taqanik chi yijb'am usuk' re aj-ok'al utzam i tinimit
9Yin in Ajwal, kinb'ij: ¡K-on ile, aj-ok'al utzam i tinimit Israel! ¡Nti chik uchak mas ch'oj xaq mitene kya'ix chik mas k'iyal taq chak chkiqul ajchakib'! ¡Chi'ana i atb'al tzij xaq i suk'ulik! ¡Chimayij rel-axik ulew chke inwinaq! Yin in Ajwal, kinya i taqaniki.
10Chichapb'ej konojel i pexu xaq tz'aqat chi'ana che ipajanik. 11I pajb'al ke taq i b'iroxik ch'irajil keje na pacha i pajb'al re ya. I homer o kawinaq jumo' (440) nimaq taq k'ox che, are i nab'e pajb'al ke i jub'an chik. Jun eqb'ala ya, kupaj ni ulajuj re homer, xaq i jun xar re ch'irajil xaqjun ru' ulajuj re homer.
12Xaq keje ni'pa taq pajb'al re alil: Juwinaq jera, ke'eloq jun siclo chi o julajuj gramo che; oxwinaq (60) siclo ke'eloq jun mina.
13Iri are i sipon chi kumajo kiya'o: Kijach ni uxol i molonik re trigo xaq i cebada che oxwinaq (60) t'ub'aj chi xaqjunam uk'iyal, xaq o jun chke ike le kiya pisipon. 14Xaq keje i aceite chi kiriq na, kijach ni pa taq jo'winaq (100) uk'iyal xaqjunam unimal, xaq jun chke ike kiya ni pisipon. 15Xwiri i chij kk'am ni jujun chke pa taq lajujwinaq (200), chi je o che i chom laj wayb'al rax es re i tinimit Israel. Iri re i sipon ch'irajil, re kporoxik xaq re ksujux na re chomb'al ib', chi ksujuxik re kuyb'al mak. Yin in Ajwal, kinya i taqaniki.
16Konojel i aj pa tinimit lik o chkiqul re kkijach i siponi che i aj-ok'al utzam i tinimit re Israel, 17o ni chkiqul kkiya ni chikop re kporoxik, xaq i rajwaxik re i sipon ch'irajil xaq re i uwa'al uva muqb'am are k'ak' ik', che taq i ij sábado xaq ronojel taq nima'ij pa tinimit Israel. Xaq o uchak kkisujuj ni sipon rumal i mak atzalal, sipon ch'irajil, porom taq sipon xaq i sipon re ksujux na re chomb'al ib', man keje ile kkuytaj ni umak i tinimit Israel.
Nima'ij Pascua
18Yin in Ajwal, kinb'ij: Che i nab'e ij re nab'e ik', yix kisujuj ni jun ral me' chi nti jun k'ax che re i sipon, re ch'ajb'al i mak atzalal prachoch i Ajwal. 19I ajsujul sipon, kuk'am ni jub'i' che i kik' re i chikop chi sujum re sipon rumal i mak atzalal, xaq kuloj ni che i raqan uchija re rachoch i Ajwal, che kajib' taq k'ijib'al re sujb'al sipon xaq chke taq aqan re taq uchija chi o li chwaja pa ja loq. 20Xaq keje ile ka'an ni che uwuq ij che i ik' re tob'al ke i jub'an chi xemakunik chi chu'anik ti xki'ano xaq xkina taj are xki'ano. Keje ile kch'ajtaj ni rachoch i Ajwal. 21Che i kajlajuj ij re nab'e ik' kijeq ni yix u'anik i nima'ij Pascua, xaq wuqub' ij kitij ni wa re trigo chi nti kunb'al ru' kuk'iysaj xaq ku'an putzutz che. 22Che i ij le i aj-ok'al utzam i tinimit kusujuj ni jun ral me' re sipon re kuyb'al umak ire xaq kuyb'al kimak i uwinaq, 23ij ij che i wuqub' ij chi kuch'ij i nima'ij kusuj ni wuqub' ral taq me' xaq wuqub' mama'ib' chij, konojel nti jun k'ax chke, chi kporox ni chwach i Ajwal. Xwi ta la ile, ij ij kusujuj ni jun chab'at re sipon rumal i mak atzalal. 24Chkijujunal ral taq me' xaq chkijujunal mama'ib' taq chij ktz'ab'ix ni jun sipon re kawinaq k'ox nimaq re sipon ch'irajil xaq jun xar ru' nik'aj aceite.
Nima'ij ke i mujb'al re es
25Xaq che i nima'ij le ke i mujb'al re es, chi k-an u'ij che i jo'lajuj ij re uwuq ik', i aj-ok'al utzam i tinimit o ni chuqul kusujuj, che ronojel wuqub' ij, xaqjun usujuxik sipon re i mak atzalal, xaq keje kik'iyal uk'atik i chikop xaq keje u'anik che i sipon ch'irajil xaq i aceite.
Currently Selected:
Ezequiel 45: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
