Ezequiel 46
46
I uchak i aj-ok'al utzam i tinimit xaq i winaq pa taq nima'ij
1Yin in Ajwal, kinb'ij: I uchija re uwaja pa ja loq chi kkanaj prelb'al ij rajwaxik ktz'apix che i waqib' ij re chak, i kjaq ni che i ij sábado xaq che i ij are k'ak' i ik'. 2I aj-ok'al utzam i tinimit kok nu b'i che i okb'al chi o chwaja chisaq, i ktak'i ni chila chutzal jun chke aqan re uchija. Tz'aqat i je ajsujul sipon kekik'atsaj ni chikop re sipon, xaq kki'an ni sipon re chomb'al ib', chi kusujuj i aj-ok'al utzam i tinimit, chi kxuki ni chutzal i chapb'al uchija, chi kuqajsaj upalaj k'a chwach ulew, te'uri kel ni chila. I uchija ktz'api taj k'a kqaj ni ij. 3Che taq i ij sábado xaq are k'ak' i ik', i tinimit kkikoj ni u'ij i Ajwal, chila chwach uchija le. 4I chikop chi kusujuj i aj-ok'al utzam i tinimit che i ij sábado, chi kporoxik pacha jun sipon chwach i Ajwal, je waqib' ral taq chij xaq jun chij ma, konojel rajwaxik chi nti jun k'ax chke. 5Chkijujunal mama'ib' taq chij kusujuj ni kawinaq k'ox nimaq re sipon ch'irajil, i chkiwach i ral taq chij ni'pa i kraj. I kawinaq k'ox nimaq re sipon ch'irajil xaq kusujuj ni jun xar ru' nik'aj aceite chwach. 6Che i ij are k'ak' i ik' kusujuj ni jun ral me', waqib' ral taq chij i jun chij ma, konojel nti jun k'ax chke. 7Chkijujunal ral taq me' ksujux ni kawinaq k'ox nimaq re sipon ch'irajil, xaq junam chke chkijujunal i chij mama'ib', i chke i ral taq chij ni'pa i kraj. Che taq i kawinaq k'ox nimaq re sipon ch'irajil kusujuj ni jun xar ru' nik'aj aceite che.
8I aj-ok'al utzam i tinimit are kok b'ik, chila kok nu b'i che i okb'al re uchija, xaq chila tan chik kel wi loq. 9Are pa nima'ij i tinimit kok b'i chukojik u'ij i Ajwal, o uchak keje iri ku'ano: I jub'an chi ke'ok b'i che uchija pa moxab' ke'el ni che uchija chi o pa wiqab', I jub'an chi ke'ok b'i che uchija chi o pa wiqab', ke'el ni che uchija chi o pa moxab'. Ketzalij ti chik che uchija ipa xe'ok wi b'ik, xa che uchija chi o chwach ke'el wa loq. 10I aj-ok'al utzam i tinimit kok nu b'i junam ku' i winaq xaq junam ke'el chali ru' ire. 11Che taq uk'iyal uwach nima'ij kkisujuj ni kawinaq k'ox nimaq re sipon ch'irajil chkijujunal ral taq me', xaq junam chke jujun chij mama'ib'; i chke i ral taq chij xa pachike unimal kkaj. Che kawinaq k'ox nimaq re sipon ch'irajil ksujux na xwi ta la ile, xaq jun xar ru' nik'aj aceite.
12I aj-ok'al utzam i tinimit are kuya jun sipon che i Ajwal ru' ronojel uk'ux, pacha jun chikop re kporoxik o we are jun sipon re chomb'al ib', kjaq ni uchija che chi o prelb'al ij xaq kusujuj ni usipon xaqjun pacha ku'ano are sábado. Are ya elnaq chaloq, ktz'aptaj ni uchija.
I sipon re ij ij
13Ronojel ij are ksaqirik ksujux ni jun chij chi o jun junab' che, chi lik nti jun k'ax che, re kk'atsaxik sujb'al re chwach i Ajwal. 14Xaq keje ile ij ij re usaqirb'al k-an ni jun sipon che i Ajwal kajlajuj k'ox nimaq re sipon ch'irajil xaq nik'aj xar aceite, chi kjam puwi i arin. I aniki lik arewi rajwaxik k-anik. 15I sipon chi kporoxik chi are ral chij, sipon re ch'irajil xaq i aceite, lik arewi pa taq usaqirb'al ksujuxik.
I rajwaxik chi ku'an i aj-ok'al utzam i tinimit chrij ulew
16Yin in Ajwal, kinb'ij: We i aj-ok'al utzam i tinimit kusipaj jub'i' rulew che jun chke i rak'al, k-ax uri pki'ab' umuq uxikin rumali keu'on ni rajaw. 17Xwiri we i aj-ok'al utzam i tinimit kusipaj jub'i' rulew che jun chke i rajchak, xwi kya' ni pu'ab' are kchakun chila, k'a are keuriqa i junab' re i o'tanik, chrijil chik ile k-ax chik pu'ab' i aj-ok'al utzam i tinimit, xaq kkanaj ni pki'ab' i rak'al. 18I aj-ok'al utzam i tinimit nti pu'ab' kresaj li jun prulew. Are i kujach chke i rak'al re kuxtab'al re, o ni uchak chi are i rulew ire kuya chke; keje ile mijun kkanajik nti rulew xaq mitene kkichersaj b'i intinimit.
I kosino re i rachoch i Ajwal
19Te'uri i achi xinuk'am b'i che i okb'al chi o chutzal i uchija, che taq i tasaj upam ja chi kkanaj pa moxab', chi lik elsam ke i ajsujul sipon. Kuk'ut jun k'ijib'al chwe chi kkanaj puqajb'al ij, chrij li ja, 20xub'ij chwe: Waral che i k'ijib'ali i ajsujul sipon kkipo'owsaj i ti' ke i chikop chi sujum re sipon rumal i mak atzalal, xaq kcha'sax ni sipon ch'irajil. Keje ile ke'elsax tu b'i i b'iroxik le chwaja re chisaq, mitene i tinimit kok b'i chila ru' i b'iroxik le chi o u'ij.
21-22Te'uri xinuk'am chub'i chwaja re chisaq i xu'an chwe chi xinb'in pa taq kajib' uch'uk ja. Xwilo chi chkijujunal taq uch'uk ja re chwaja o jun uwaja ch'utin. Konojel xaqjunam kinimaqil o oxlajuj xik'ab' che unajtil kaqan i lajuj xik'ab' che uwach; 23chkij chkiwach ike le o jun tapial re ab'aj, chuxe' ronojel i tapial le o nuk'b'al a'. 24Are uri xub'ij chwe: Iri are i kosino ke i kechakun prachoch i Ajwal, chila na kkipo'owsaj wi chikop chi tinimit kusujuj re sipon.
Currently Selected:
Ezequiel 46: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
