Ezequiel 44
44
Uchapb'exik uchija chi o prelb'al ij
1I achi xinuk'am chub'i che i okb'al chisaq re rachoch i Ajwal chi kkanaj kan prelb'al ij, chi tz'apilik.
2Chila i Ajwal xub'ij chwe: I okb'ali kkanaj na tz'apilik; lik kjaqtaj taj. Lik mijun kok b'i chila, man chila oknaq wi b'i i Ajwal, i Dios aj Israel. Rumal uri kkanaj na tz'apilik. 3Xwi utz kok b'i chila are i aj-ok'al utzam i tinimit, re kkub'i chutijawik i lo'laj wa'im chwach i Ajwal. Kok nu b'i chila che uchija re okb'al, xaq chila na kel wi chaloq.
Pachin i kmajawik ke'ok prachoch i Ajwal
4Te'uri i achi xinuk'am b'i che i okb'al chi kkanaj pa moxab', chwach i rachoch i Ajwal. Xwilo chi uchomal i Ajwal xunojsaj i rachoch, xaq xinxuki'ik xinqajsaj inpalaj k'a chwach ulew. 5Are uri i Ajwal xub'ij chwe: Yet, achi, lik chajaqa ab'a'wach xaq lik chakojo retalil ronojel wach i kinb'ij chawe, chrij i atb'al tzij xaq chrij usuk' i anik re rachoch i Ajwal. Lik chawila ub'e pachin i utz ke'ok b'i prachoch i Ajwal chi xaq ke'el li chupam.
6Chab'ija che i qelqel laj tinimit Israel: Iri are kub'ij i Ajwal: Lik chimayij u'anik i ch'am taj, tinimit Israel. 7Yix kiqajsaj u'ij wachoch chi kiya okik chke i winaq aj naj, winaq chi nti retalil intrat ku' pkijolom xaq pkich'akul; kkiqajsaj in-ij man kkisujuj taq ti'b'alil re xepu xaq re kik' chwe chi re ksujux re sipon xaq keje ile kkiqel intrat ru' ni'pa taq anik chi ch'am taj kki'an pkik'aslemal. 8Xaq ki'anom ti ni'pa taq ink'utunik chi o u'ij, xa kiya'om pki'ab' i winaq aj naj.
9Rumali Yin in Ajwal, kinb'ij: Kok ti pwachoch jun winaq we nti retalil intrat, pujolom xaq puch'akul; mitene jun aj naj chi jeqel chkixol i aj Israel. 10I je aj Leví, chi xinkikanaj kanoq are xel i tinimit Israel che inb'e xaq xinro'taj kanoq rumal ukojik ki'ij i tiox chi xaril je antalik, o ni uchak kkitoj ni kimak. 11Utz kki'an ni kipatan pwachoch pacha je ajchajinel re okb'al b'ik che i rachoch i Ajwal, xaq chke jub'an chik anik prachoch I Ajwal; are ni ike kkikamsaj i chikop chi keporox pa a' chi i tinimit kusujuj na re porom sipon xaq xwi ta la ile, o uchak kkiyijb'a kib' chu'anik kipatan chrij kitinimit. 12Ike xechakun ku' aj Israel re ukojik ki'ij i tiox chi xaril je antalik, keje ile x-an chke xemakunik. Rumali kkitoj ni kimak. Yin in Ajwal, kinb'ij. 13Kumaj taj kki'an kipatan chwij chi pacha je ajsujul sipon chinwach xaq kumaj taj ketejeb' ru' ub'itaq we chi o u'ij xaq mitene che ub'itaq we chi lik mas o ki'ij. Lik kkeqaj ni uqajsaxik ki'ij rumal taq b'iroxik chi ch'am taj xki'ano. 14Kinya ni chkiqul i uchajixik i rachoch i Ajwal, man keje ile kki'an ni ronojel ni'pa i rajwaxik chila.
I je ajsujul sipon
15I ajsujul sipon chi je aj Leví je umuq uxikin i ma Sadoc, chi xkimayij ti u'anik kipatan pwachoch, are xkikanaj kan inb'e aj Israel, utz we ketejeb' li wu' Yin re kki'an kipatan chwij. Ike kumajo kek'un chinwach re kkisujuj i xepu xaq i kik' chwe re i sipon porom. Yin in Ajwal, kintaq u'anik. 16Xaq utz ke'ok pwachoch xaq ketejeb' li che i k'ijib'al re sujb'al sipon anb'al kipatan chwij, xaq lik o chkiqul chi kki'an kipatan chwij. 17Are ke'ok li che uchija re uwaja pa ja loq, o uchak kkikoj nu b'i ki'u' re lino. Are je o che i kipatan re uwaja pa ja loq xaq prachoch i Ajwal, kkikoj tu b'i ki'u' re lana. 18Kkikoj nu b'i jun pasb'al kijolom re lino xaq kisaraw re lino, nti jun b'iroxik kkikoj xe kipam chi ku'an chke ke'el k'atan. 19Are k'amaja ke'el che uwaja chisaq, ipa o wi i tinimit, rajwaxik kkesaj i ki'u' chi kikojom are xki'an kipatan prachoch i Ajwal xaq kkiya kan chila pa taq tasaj re upam rachoch i Ajwal, i junwi ki'u' kikoj chik, man keje ile i uch'amil ki'u' k-ax ti che i tinimit.
20Kkisol tu b'i kiwi che i kijolom, xaq kkiya ti che kiwi ku'an nimaq raqan, xwi kkik'upij jub'i' che. 21Lik mijun chke ajsujul sipon kutu' i uwa'al uva muqb'am are kok b'i che uwaja pa ja loq. 22Kk'uli ti ru' jun ixoq malkan o we xaq jachtal kanoq, xwi ru' jun apoj ali aj Israel xaq ru' jun ixoq malkan xwiri we rixoqil kan jun ajsujul sipon.
23I ajsujul sipon rajwaxik kkik'ut che intinimit ilb'al re pachike o u'ij xaq nti u'ij, xaq i ch'am xaq i ch'am taj. 24Che i ch'oj, ike kki'an na pacha je aj-atol tzij, kki'at ni tzij chrij wach kub'ij in-atb'al tzij. Kki'an na ni'pa taq kub'ij intzij xaq k'utunik chrij taq ronojel innima'ij, xaq kkikoj ni retalil i ij chi o u'ij chi are i ij sábado we Yin.
25Lik kkichap ti jun kamnaq, man keje ile kritzij ti kib' ru', xwi we lik are uqajaw, uchuch, uk'ojol, umi'al, ucha' xaq jun ranab' we k'ulinaq taj. 26We kki'ano, o uchak kkijos-ij kib', te'uri kkoy-ej wuqub' ij. 27Are ke'ok tan chik che uwaja pa ja loq re i rachoch i Ajwal anb'al re kipatan, kkisujuj ni jun sipon rumal kimak. Yin in Ajwal, kintaq u'anik.
28Lik xwi Yin in kuxtab'al chi kkik'am i ajsujul sipon puk'exel i kulew. Lik kya' ti kulew pa Israel. Lik xwi Yin in kuxtab'al ke ike. 29Kkitij ni sipon ch'irajil chi aj Israel kkisujuj chwe, xaq i chikop chi ksujux puk'exel i mak atzalal xaq rumal i kimak. Xaq keje ronojel ni'pa taq kkisujuj aj Israel chwe lik ke ni ike. 30I ajsujul sipon kkik'am ni utz laj taq b'iroxik chke i nab'e taq molonik xaq che ronojel i sipon. Yix are kiyijb'a i or re i wa re trigo, lik are ni i utz kiya ni chke ike. Keje ile i utzil chomal we Yin arewi kk'iji ni puwi iwachoch yix. 31I ajsujul sipon lik utz taj kkitij jun tz'ikin o we jun chikop chi kamnaq utukel, o we antal taq ch'aqa taq che rumal jun itzel chikop.
Currently Selected:
Ezequiel 44: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
