Ezequiel 3
3
1Are uri xub'ij chwe: “Yet, at rak'al winaq, chatija i b'orom tz'umi chi o tz'ib' chwach, te'uri jalapa che i tinimit Israel.”
2Xinjaq inchi', ire xu'an chwe chi xintij b'i b'orom tz'um chi o tz'ib' chwach. 3Te'uri xub'ij chwe: “Wo'or chab'i'a b'i tz'ib'taliki chi kinya chawe, i ru' ile chanojsaj apam.”
Yin xintij b'ik lik ki xinna'o pacha i uwa'al kab'. 4Te'uri xub'ij chwe: “Jat pa tinimit Israel chab'ij intzij chke pacha inch'ob'om ub'ixkil. 5Yin katintaq tu b'i che jun tinimit chi junwi kich'ab'al xaq we ktataj ti ub'e wach kkib'ij, yin xa pa tinimit Israel katintaq wi b'ik. 6Katintaq tu b'i pa taq k'iyal nimaq taq tinimit chi lik k'ax utayik ub'e i kich'ab'al, chi mitene yet kata ub'e. Tupu we yin katintaq b'i chke i tinimit le, ike katkitatb'ej neri. 7Xwiri i tinimit Israel kraj ti utayik ub'e chawe, man kraj ti kkojon chwe yin. Konojel i winaq re i tinimit Israel lik je b'uy xaq lik ko kijolom. 8Xwiri yin kin-an chawe chi at b'uy xaq lik ko ajolom pacha ike. 9Lik kin-an ko chawe pacha i wo' ab'aj, chi lik mas ko chwach i ab'aj. Lik maxij awib' chke, are kki'an kipalaj chawe, tupu lik je b'uy.”
10Te'uri xub'ij chwe: “Lik chata ub'e wach kinb'ij chawe, xaq lik chaya kan pa jolom. 11Wo'or jat jeawila i awachi'il chi je elsam b'i pa cho'ab' chwach kulew tupu we kekojon chawe o kekojon taj, chab'ij chke: Keje iri kub'ij i Ajwal.”
12Are uri i utewal i Dios xinuyako, xaq chwij yin xinta jun luk'latik pacha re kab'raqan are xwalij li uchomalil i Ajwal puk'ijib'al. 13I luk'latik le are kixik' i b'iroxik chi pacha winaq ketzunik are kuk'ulaj rib' kixik' chkiwach, xaq i sotsaq chi o chkik'ulel ike; i luk'latik le keje pacha re jun nim laj kab'raqan. 14I ucho'ab' i Dios xinuyako xaq xinresaj chila, yin kinb'isonik xaq kinoywarik xin-ek, tz'aqat i Ajwal ko xinuchap ru' u'ab'. 15Xinupon che i tinimit Tel-abib, chuchi' i raqana Quebar, ipa je jeqel wi te'eq aj Israel chi je elsam li chwach kulew, xinkanaj kan wuqub' ij chila ku' tupu lik weta'am taj wach kin-ano xaq wach kinb'ij.
I Dios kuya ma Ezequiel pa ajchajinel
16Are xk'is i wuqub' ij, i Ajwal xlapan wu' yin i xub'ij chwe: 17“Yet, winaq, yin at inya'om kan pa chajinel re i tinimit Israel. Are kinb'ij jun tzijonik chawe, o uchak chi katzijoj pinb'i yin, man keje ile kketamaj. 18We xuk'ulmaj chi yin kinb'ij jun tzij re kamik chrij jun utz ti laj winaq; xwiri we yet ka'ijla ti utz ti laj winaq le i kab'ij ti che chi kuya kan uk'aslemal chi utz taj man keje ile kk'asi na, ire kkam ni rumal umak, xwiri chaqul yet kinya wi ukamik. 19We yet kab'ij usuk' che utz ti laj winaq le xwiri ire we kuya ti kan i utz ti laj uk'aslemal, ire kkam ni rumal umak, xwiri yet ktotaj ni ak'aslemal. 20Xaq we xuk'ulmaj chi jun utz laj winaq, suk'ul uk'aslemal, kuya kan i utz laj uk'aslemal i ku'an i utz taj, xaq yin kin-an che chi ktzaq pa k'ax; we yet kab'ij ti usuk' che, kkam na. Yin kinkoj ti pajil ni'pa i utz chi u'anom, lik kkam ni rumal umak, xwiri chaqul yet kinya wi ukamik. 21Xwiri we yet kab'ij usuk' che i winaq le chi kmakun taj, ire we kmakun taj, o ni uri uk'aslemal, man xkojon che i utz chi xb'ix che, i yet ktotaj ni ak'aslemal.”
I ma Ezequiel x-on kan mem
22I Ajwal chila xuya u'ab' pinwi xaq xub'ij chwe: “Chatwalijoq, chatel li chwa ta'aj man chila kinlapan ni awu'.” 23Yin xinwalijik xaq xinel b'i chwa ta'aj, chila xwil wi uchomalil i Ajwal, pacha xwil chila chuchi' i raqana Quebar. Xinluk wij, lik k'a chwach ulew xinqasaj inpalaj. 24Xwiri i utewal i Dios xok pink'ux xaq xu'an chwe chi xintak'i'ik. Are uri i Ajwal keje in-ijlaxik iri xu'ano: Jat i chatz'apij awib' chupam awachoch. 25Chawila pe', katyut' ru' laso, man keje ile katel ta loq xaq katk'iji pa tinimit. 26Kin-an ni chawe chi knak'i utzam awa' pachi' man keje ile kel ti chik ach'ab'al. Keje ile kattiki ti uri chula'ik uwach chke, tupu lik qelqel laj tinimit. 27Xwiri yin, are o kwaj kinb'ij chawe, kintzalij chik ach'ab'al, te'uri kab'ij chke. Keje iri kub'ij i Ajwal: Pachin kraj utayik, chuta, xwiri pachin kraj ti utayik, muta ta. Man lik are jun tinimit qelqel.
Currently Selected:
Ezequiel 3: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
